Category: कवितेचा उत्सव 2

श्रीमती अनुराधा फाटक

 कवितेचा उत्सव 

☆ शोध … ☆ श्रीमती अनुराधा फाटक ☆ 

सागराला भेटण्याच्या ओढीने

त्याच्या मनाचा तळ शोधत

त्यात आपलं मन गुंतवत

 कित्येक वर्षाच्या तपश्चर्येने

नदी झेपावली

उंच कड्यावरून उड्या मारत

अंतरात काटेसराटे साठवत

विरहाचं अंतर कापत कापत

अखेर ती पोचली

सागर किनाऱ्याजवळ

सागरानं तिला आपल्यात घेतलं

आणि

तिचं नदीपण संपूनच गेलं

आता ती स्वतःला शोधते आहे

आपल्याच उगमाजवळ..!

© श्रीमती अनुराधा फाटक

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

आचार्य प्रल्हाद केशव अत्रे

  कवितेचा उत्सव  

☆ मनाचे श्लोक (निवडक) ☆ आचार्य प्रल्हाद केशव अत्रे ☆

मना,नीट पंथे कधीही न जावे

नशापाणी केल्याप्रमाणे चलावे

जरी वाहने मागुनी  कैक येती

कधी ना तरी सोडिजे शांतवृत्ती!

           *      *   *

सदा खाद्यपेयावरी हात मारी

बिले देई सारून मित्रासमोरी

“अरेरे,घरी राहिले आज पैसे-“

खिसे चाचपोनी मना बोल ऐसे !

          *        *   *

इथे पायगाडी तिथे वाद्यपेटी

इथे पुस्तके वा तिथे हाथकाठी

अशी सारखी भीक मागीत जावे,

स्वताचे न काही जगी बाळगावे !

          *      *   *

जिथे चालल्या खाजगी कानगोष्टी

उभी आणि धेंडे जिथे चार मोठी,

मना,कान दे तोंड वासून तेथे,

पहा लागतो काय संबंध कोठे !

          *       *   *

 – आचार्य प्रल्हाद केशव अत्रे

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री हरिश्चंद्र कोठावदे

 कवितेचा उत्सव 

☆ मी सांगतो कथा जी… ☆ श्री हरिश्चंद्र कोठावदे ☆ 

(वृत्त: शुद्ध सती  मात्रा:८+४)

मी सांगतो कथा जी

तुमचीच रे कहाणी

तुमचेच हुंदके हे

तुमचीच ही विराणी !

 

आमंत्रणाविनाही

येतो कबीर दारी

गीतात नित्य वाजे

त्याचीच एकतारी !

 

ती दूरची तुफाने

त्यांचीहि गाज श्रवणी

वणव्यात दूर राने

त्यांचीहि राख कवनी !

 

तारा अनाम कोणी

माझा प्रकाश होतो

शब्दांस चांदण्याचे

आभाळ एक देतो !

 

त्या पैलपार हाका

भरती शिडात वारा

त्यांचीच ही कृपा की

कधि लाभतो किनारा !

 

मातीतल्या कहाण्या

झाल्या दिगंत काही

त्यांचीच मंत्रबाधा

या अक्षरांस काही !

 

जादू भगीरथांची

ये ओंजळीत गंगा

करी कोरडे निमित्त

घेण्यास श्रेय दंगा !

 

© श्री हरिश्चंद्र कोठावदे

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्रीशैल चौगुले

 कवितेचा उत्सव 

☆ मित्रमूर्ती…  ☆ श्रीशैल चौगुले ☆ 

नित्य एक मूर्ती

नयनात वसते

हृदयात असते

कुणी बरे,प्रश्न.

 

तोच हात माझे

दृष्टी तोच होई

वेळ काळ माझा

त्याचीयाच ठाई.

 

वाणी वदे सत्य

कर्म जरी तथ्य

श्रवण-मनन

देहाशी निमीत्य.

 

श्वास स्पंद तोची

ज्ञान चेतनात

किती सांगू गाथा

क्रिया अंतरात.

 

अदृश्य प्रसन्न

घडे क्रम भाव

सुख-दुःख ठाव

प्रकृती स्वभाव.

 

आत्म तो संवाद

साधीशी मनात

नाद गुंज मंत्र

जीवाशी ऋणात.

 

तो सखा सतत

सोबती जीवनी

मी सुदाम भोळा

सृष्टी वृंदावनी.

 

प्रेम भक्ती पोहे

आवडीने रुची

तोच घास सत्व

कृष्ण या प्रपंची.

 

© श्रीशैल चौगुले

९६७३०१२०९०

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री रवींद्र सोनावणी

 कवितेचा उत्सव 

☆ देव… ☆ श्री रवींद्र सोनावणी ☆ 

देव दगडाचा तरी,

मन असावेच त्याला

म्हणूनच पुजायचा

आम्ही अट्टाहास केला-

 

आम्ही बांधीयली पुजा,

त्याचे हरवले मन

आणि आमच्या वाटेला

आला केवळ पाषाण-

 

कधीतरी पाषाणाला,

वाटे फुटेल पाझर

असा पिसारा फुलवी

 माझ्या मनाचा मयूर-

 

आता थकला मयूर,

 त्याचा झडला पिसारा

 आतातरी पाषाणाने

 व्हावे समाधीचा चिरा

 

© श्री रवींद्र सोनावणी

निवास :  G03, भूमिक दर्शन, गणेश मंदिर रोड, उमिया काॅम्पलेक्स, टिटवाळा पूर्व – ४२१६०५

मो. क्र.८८५०४६२९९३

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

साने गुरूजी

 कवितेचा उत्सव 

☆ बलसागर भारत होवो, विश्वात शोभुनी राहो ☆ साने गुरूजी ☆

हे कंकण करि बांधियले, जनसेवे जीवन दिधले

राष्ट्रार्थ प्राण हे उरले, मी सिद्ध मरायाला हो

 

वैभवी देश चढवीन, सर्वस्व त्यास अर्पीन

तिमिर घोर संहारिन, या बंधु सहाय्याला हो

 

हातात हात घालून, हृदयास हृदय जोडून

ऐक्याचा मंत्र जपून, या कार्य करायाला हो

 

करि दिव्य पताका घेऊ, प्रिय भारतगीते गाऊ

विश्वास पराक्रम दावू, ही माय निजपदा लाहो

 

या उठा करू हो शर्थ, संपादु दिव्य पुरूषार्थ

हे जीवन ना तरि  व्यर्थ, भाग्यसूर्य तळपत राहो

 

ही माय थोर होईल, वैभवे दिव्य शोभेल

जगतास शांती देईल, तो सोन्याचा दिन येवो

 

 – साने गुरुजी

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री नीलांबरी शिर्के

आयुष्य फाटले तेंव्हा

शब्दाने शिवित गेले

जोडून शब्द मी तेंव्हा

कविता करीत गेले

 

मुडपून दुखऱ्या भागा

हळूवार घातली टिप

प्रत्येक टाक्यामागे

मूरे अश्रू आपोआप

 

ते जिथे फाटले जादा

त्या कधी सांधले नाही

रफुच्या छान टाक्यांनी

मी केली हो चतुराई

 

ठिगळाच्या तुकड्यांनी मी

त्या कधी लपवीले नाही

..काढून त्वचेची साल

मी दुख: झाकले  बाई.

 

आयुष्य वाटते आता

सुरेख तलमसे वस्त्र

आतुन टोचते काही

की  तडजोडीचे अस्त्र

 

©  सुश्री नीलांबरी शिर्के