Category: कवितेचा उत्सव 2

श्रीमती रंजना मधुकरराव लसणे 

 कवितेचा उत्सव 

☆ तंबाखू मुक्ती दिन – गुटका नको ग बाई ☆ श्रीमती रंजना मधुकरराव लसणे ☆

गुटका नको ग बाई

बाई बाई बाई!

     काय झालं बया?

    बया बया बया…..

     काय झालं बया…..

   बया बया बया……

     सांग की ग बया……

     मला गुटका नको ग बाई

 

 

     मला तंबाखू नको ग बाई..

अग पण का ग बाई…

     असं केलं तर काय त्यानं…

     या गुटक्याची घेली मी चव…!

   समद जग दिसाया लागलं नवं नवं…..

अगं मग बेस झालं की….

दमडी खिशात टिकनं बाई….।।१।।

 

मला गुटका नको ग बाई……

या गुटक्यानं नादावली सारी आळी…..

  अन् मग ग…

घरादारात अन् गल्ली बोळात..

अग झालं तरी काय….

काढली पिचकारीची रांगोळी …..

  मग छानच झालं की…

बायाच्या शिव्याला दमच नाई

   कुठं बसाया जागा नाही….

मला गुट का नको ग ……।।२।।

 

या गुटक्यान …

  या या गुटक्यानं,.

    अग पर केलं तरी काय,,,..

 या या गुटक्यानं लावली माझी कड….

    म्हंजी ग…

   या या गुटक्यानं लावली माझी कड….

  अन्  कॕन्सर  झोपवील माझं मडं……

आग ग ग ग  ….

        अग  परं ….

      तू sss तर …

   हे जिणं …

बी काय जिणं …

   हाय व्हय……

अन्  दिवसा ढवळ्या ….

     दिसाया लागलं मरणं…..

   लई वंगाळ झालं बघ….

   पोरं बाळ ती भिकंला जाई….।।४।।

 

   मला गुटका नको ग बाई…..

एका जनार्दनी  समरस झाले….

एका जनार्दनी  समरस झाले…..

  अन् शरण व्यसन मुक्तीला ssss गेले…..

 आता गुटक्याचं नावच नाई,……

मला गुटका नको ग बाई…..

मला गुटका नको ग बाई…..

मला तंबाखू नको ग बाई..,..

 

©  रंजना मधुकर लसणे

आखाडा बाळापूर, जिल्हा हिंगोली

9960128105

 कवितेचा उत्सव 

☆ मिठी ☆ मेहबूब जमादार ☆

आणेन चंद्र म्हणते

तुझे येणे लांबलेले

आणेन दिप म्हणते

धुके धरा लपेटलेले

 

विरहाचे क्षण कसे

काळजाला छेदलेले

आठवांचे पेव सा-या

भोवताली विखुरलेले

 

प्रेमात ऊर फुटता

नेत्र अश्रूंनी भारलेले

मोहक क्षण भेटींचे

तुझ्या पथी पसरलेले

 

तू नसताना कसे

क्षण मनी गोठलेले

पाहू दे सख्या मला

तुझ्या मिठीत गुंफलेले……

 

*️⃣ मेहबूब जमादार

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्रीमती अनुराधा फाटक

 कवितेचा उत्सव 

☆ अधांतरी… ☆ श्रीमती अनुराधा फाटक ☆ 

मानस सरोवरीच्या हंसा

जा उडून कुठंतरी

मीच आहे अधांतरी

तुला कसा सांभाळू ?

 

मनीच्या खोपीतल्या सुगरणी

नको बांधू नवे घरटे

नैराश्याचे बोचणारे काटे

तुझ्या घरट्यात अडकतील

अन् घरट्याची नाजूक वीण

विस्कटून विस्कटून जाईल !

 

लावू नकोस कोकीळे

मन जागविण्या पंचम

आघात सोसून सोसून

थंड पडलयं माझं मन !

 

या थंडगार मनात

कसे रहातील

हंस, सुगरण, कोकीळ ?

त्यांच्या मनानं घ्यावी भरारी

मनातून माझ्या जावे अंबरी

मला माहीत आहे

मीच आहे अधांतरी !

© श्रीमती अनुराधा फाटक

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ. उज्वला सुहास सहस्रबुद्धे

 कवितेचा उत्सव 

☆मुक्ता… ! ☆ सौ. उज्वला सुहास सहस्रबुद्धे ☆

(२५ मे रोजी मुक्ताई पुण्यतिथी होती, त्या निमित्ताने केलेली अभंग रचना…)

 निवृत्ती, ज्ञानाची,

 लाडकी बहीण,

 जगली क्षणक्षण,

 भावांसाठी !

 

बालपण गेले,

अकाली प्रौढत्व,

ज्ञानाचे तत्व,

सामावले !

 

ज्ञानदेव रुसला,

बंद ताटी केली,

मायेची मुक्ताई,

साद घाली !

 

पोरपण होते

मांडे करू वाटले,

ज्ञानाने चेतवले,

अग्नी रूप!

 

होती आदिमाया,

तिन्ही भावंडांची,

शिकवण  तिची,

नाम्यासही !

 

मुक्त झाली मुक्ता,

देह बुद्धी गेली ,

अमर राहिली ,

विठ्ठल कृपेत !

© सौ. उज्वला सुहास सहस्रबुद्धे

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री हरिश्चंद्र कोठावदे

 कवितेचा उत्सव 

☆ स्वीकारा वा नाकारा मज… ☆ श्री हरिश्चंद्र कोठावदे ☆ 

{वृत्त: पादाकुलक}

स्वीकारा वा नाकारा मज

मलंग मी तर चंचल वारा

तुमच्या संगे तुमची नगरी

माझ्या संगे माझा तारा !

 

खुशाल वगळा वस्तीमधुनी

दिशादिशांचा मज परवाना

दरबारी मी चराचराचा

ऋतूऋतूंचा मज नजराणा!

 

एक विश्व मी माझ्यामधले

त्या विश्वाचा मी तर स्वामी

अवघे गोकुळ अंकित तुमच्या

कान्हा वेणू माझ्या धामी !

 

रोज कालच्या क्षितिजावरती

पुन्हा नव्याने उदया येतो

प्राणांची झटकून काजळी

ज्योतिर्मय मी अजून होतो !

 

खळखळ माझी वाहत वाहत

अथांग आता होऊ पाहे

गाज माझिया मौनाचीही

पार तटांच्या जाऊ पाहे !

 

कधितरि माझा अलखनिरंजन

घुमेल तुमच्या अधिराज्यातुन

होइल जागा उरि तुमच्याही

सूर आतला एक विलक्षण !

© श्री हरिश्चंद्र कोठावदे

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री रवींद्र सोनावणी

 कवितेचा उत्सव 

☆ पारीजात… ☆ श्री रवींद्र सोनावणी ☆ 

आज अचानक, मनात फुलला, वृक्ष पारीजात,

गुपित कानी सांगून जाता, सुगंधित वात ||धृ.||

 

तृषार्त या धरणीवर पडता, पाऊल मेंदीचे,

मनात माझ्या मळे उमलले, ते निशिगंधाचे,

कसा पोहचला? कळले नाही, ताऱ्यांनाही हात ||१||

 

काळे काळे खडक प्रसवले, निर्झर मोत्यांचे,

निनादले कानांशी अवचित, कुजन सरीतेचे,

गंधर्वाचे थवे उतरले, प्रणयगीत गात ||२||

 

आज उराशी घट्ट बिलगले, ते स्वप्नांचे ससे,

माध्यांनीला चंद्र नभीचा, मन पंखावर बसे,

सलज्ज वदना अहा! प्रगटली, संध्या ऋतुस्नात ||३||

 

© श्री रवींद्र सोनावणी

निवास :  G03, भूमिक दर्शन, गणेश मंदिर रोड, उमिया काॅम्पलेक्स, टिटवाळा पूर्व – ४२१६०५

मो. क्र.८८५०४६२९९३

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्रीशैल चौगुले

 कवितेचा उत्सव 

☆ प्रणवरहस्य !… ☆ श्रीशैल चौगुले ☆

पायाखालची जमीन सरता

आभाळाची आस ऊरते

दिशांचे वार्यातले घरटे

जळी श्वास कुस तरते.

 

क्षितीजाची काया खण-खंबीर

ब्रम्हांडाचे ध्यास धरते

वज्रातून तप्त लहरी

प्रणव तेज प्रखरते.

 

समुद्राची माया वाहे अनंत

शीतल शशीत भरते

अन् शलाका होता डोळे

तिमीराचे भय सरते.

 © श्रीशैल चौगुले

९६७३०१२०९०

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈