Category: कवितेचा उत्सव 2

कविराज विजय यशवंत सातपुते

कवितेचा उत्सव # 121 – विजय साहित्य

☆ महाबली हनुमान! ☆ कविराज विजय यशवंत सातपुते ☆

बलभीम वीर। आंजनेय सूत॥

केसरीचा पूत। हनुमान॥१॥

 

नाशिक हा जिल्हा । अंजिनेरी ग्राम॥

देवभूमी धाम। चिरंतन॥२॥

 

शक्ती सिद्धी युक्त। घेतलीसे धाव ॥

इंद्रवज्र घाव। हनुवटी॥३॥

 

शेंदूर नी तेल। रूई फुले पाने ॥

मंदिर घोषाने। निनादले॥४॥

 

शाप मिळालेला। विसर शक्तीचा॥

व्यासंग भक्तीचा। रामनामी ॥५॥

 

घडे रामभेट। शब्द चिरंजीव॥

दासभक्ती नीव । हनुमंत ॥६॥

 

जांबुवंत कृपे। परतली शक्ती॥

रामनामी भक्ती। स्थिरावली॥७॥

 

सीता शोध कार्य। झाला अग्रेसर ॥

रावणाचे घर। पेटविले॥८॥

 

जानकीचा शोध। वायुपुत्र घेई॥

संदेश तो देई। राघवासी॥९॥

 

जिथे जिथे राम। तिथे हनुमान॥

भक्ती शक्ती वाण। अलौकिक॥१०॥

 

चातुर्य नी शौर्य। पराक्रम गाथा॥

लीन होई माथा। बजरंगी॥११॥

 

मारुतीचे स्तोत्र। भीमरुपी पाठ॥

महारूद्र वाट। फलदायी॥१२॥

 

संकट मोचन। बल उपासना॥

समर्थ प्रेरणा। रामदासी॥१३॥

 

बजरंग बली। उपासना मंत्र॥

यशदायी तंत्र। हनुमंत॥१४॥

 

चिरंजीवी दास। देव पंचमुखी॥

रामनाम मुखी। अव्याहत॥१५॥

 

कविराज शब्दी। वर्णाया मारुती॥

द्यावी अनुभूती। रामराया॥१६॥

© कविराज विजय यशवंत सातपुते

श्री सुजित कदम

 कवितेचा उत्सव 

☆ सुजित साहित्य # 109 – एकटं एकटं वाटतं हल्ली…! ☆

एकटं एकटं वाटतं हल्ली कातरवेळी.

ओठावरती त्याच ओळी त्याच वेळी…!

 

तिची सोबत तिची आठवण बरेच काही

मांडून बसतो सारा पसारा अशाच वेळी…!

 

उडून जातो सूर्य नभीचा डोळ्यादेखत

तेव्हाच येते रात्र नभावर चंद्राळलेली…!

 

दाटून येतो अंधार थोडा चहू दिशानी.

अताशा मग फाटत जाते स्वप्नांची झोळी…!

 

डोळ्यांमधूनी वाहून जाते मग टिपूर चांदणे

बघता बघता मग रात्र ही सरते एकांत वेळी…!

 

एकटं एकटं वाटतं हल्ली कातरवेळी

ओठावरती त्याच ओळी त्याच वेळी…!

 

© सुजित कदम

संपर्क – 117, विठ्ठलवाडी जकात नाका, सिंहगढ़   रोड,पुणे 30

मो. 7276282626

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री प्रभा सोनवणे

☆ गझल… ☆

अशा वेळेस पूर्वीचे बहाणे शक्य नाही

 तरीही मी मला विसरून जाणे शक्य नाही

 

म्हणे अनयास राधा वागले धुंदीत एका

गळ्याशी दाटलेले गीत गाणे शक्य नाही

 

तरूणाईत मी दर्यात त्या पोहून आले

नदीनाल्यामधे आता नहाणे शक्य नाही

 

अशा वेळेस एकाकी करावे काय आता

विषारी वल्लरीचे मूळ खाणे शक्य नाही

 

जरी केला गुन्हा प्रीतीस साक्षात्कार म्हटले

झिजावे चंदनासह मी? सहाणे, शक्य नाही

 

दिशा अंधारल्या दाही दिसेना आज काही

उजेडाचे नवे घेणे उखाणे शक्य नाही

 

अरे कृष्णा कशाला नाद हा केला खुळा रे

प्रवाही कोणत्याही मी वहाणे शक्य नाही

 

© प्रभा सोनवणे

१५ /१६ एप्रिल २०२२ – सिंगापूर

संपर्क – “सोनवणे हाऊस”, ३४८ सोमवार पेठ, पंधरा ऑगस्ट चौक, विश्वेश्वर बँकेसमोर, पुणे 411011

श्री अशोक श्रीपाद भांबुरे

 

वंचितांसाठीच तळमळ पाहिजे

अंतरीचा बुद्ध प्रेमळ पाहिजे

 

ज्या गळाला लागते ही मासळी

जाहला तो रेशमी गळ पाहिजे

 

माणसांच्या गोठल्या संवेदना

वाटली शस्त्रास हळहळ पाहिजे

 

लष्कराच्या छावण्या येथे नको

साधुसंतांचीच वरदळ पाहिजे

 

चिंतनी एकाग्रता इतकी हवी

साधनेने गाठला तळ पाहिजे

 

कुंपनाने फस्त केले शेत तर

साक्ष देण्या एक बाभळ पाहिजे

 

नम्र हातातून घडतो देवही

त्याचसाठी सुज्ञ कातळ पाहिजे

 

© अशोक श्रीपाद भांबुरे

धनकवडी, पुणे ४११ ०४३.

[email protected]

मो. ८१८००४२५०६, ९८२२८८२०२८

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

महंत कवी राज शास्त्री

  हे शब्द अंतरीचे # 78  

☆ गंध मातीचा… ☆

गंध मातीचा, हृदयस्पर्शी

गंध मातीचा, मातृस्पर्शी

 

गंध मातीचा, सप्तरंगी

गंध मातीचा, चिरा चौरंगी

 

गंध मातीचा, मनास भुलवी

गंध मातीचा, तेज वाढवी

 

गंध मातीचा, मातृस्पर्श जैसा

गंध मातीचा, मोगरा फुलला तैसा…

 

© कवी म.मुकुंदराज शास्त्री उपाख्य कवी राज शास्त्री.

श्री पंचकृष्ण आश्रम चिंचभुवन, वर्धा रोड नागपूर – 440005

मोबाईल ~9405403117, ~8390345500

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈