Category: कवितेचा उत्सव 2

श्री अनिल वामोरकर

 कवितेचा उत्सव 

☆ संत समागम… ☆ श्री अनिल वामोरकर ☆

☆

मला हो

सदगुरु भेटले.. |धृ|

 

जिकडे पहावे

तिकडे सदगुरु दिसे

ते पाठीराखा आहे

एवढे मज पुरेसे…

 

एक छोटीसी

निस्तेज चांदणी होतो

प्रकाशमान मी

तूझ्या तेजानी…

 

मुक्या प्राण्यात

चराचरात तूचि

विलक्षण हलचल हृदयी

सरसावतो सेवेसी…

 

आत्मा एकचि

विभिन्न योनी

विषण्ण मन

कधी मिळेल तया मनुष्य योनी…

 

संत संगतीने

जळतील पापे त्यांचे

मिळेल पुढील जन्म

मनुष्य योनीचे…

 

जन्मोजन्मी 

लाभती तेची सदगुरु

कर्मानुसार मिळे योनी

साधने, सत्कर्मे भवसागर पार करू..

☆

© श्री अनिल वामोरकर

अमरावती

≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित  ≈

सौ. वृंदा गंभीर

कवितेचा उत्सव

☆ तुमचं यश तुमच्या हातात…  ☆ सौ. वृंदा गंभीर ☆

☆

एक वेळ असते त्या वेळेत 

कोणीच साथ देत नसतं 

जवळचेच तोंड फिरून जातात 

तेंव्हा कुणीच कुणाचं नसतं 

*

एक वेळ पुन्हा अशी येते 

प्रगती होऊन यशाचं शिखर 

गाठलेलं असतं, , , , ,

तेव्हा लांबचे नातेवाईक 

सुद्धा सांगतात हे आमचे 

पाहुणे आहेत, , , , ,

*

हेच जीवन असतं संघर्ष 

करत पुढे जायचं असतं 

ठेवायचा असतो एक आदर्श 

समाजासमोर कुणीच कमी नसतं 

*

फक्त वेळ यावी लागते 

न खचता करून दाखवायचं 

एक ध्येय मनात ठेवायचं असतं 

तुमचं यश तुमच्याच हातात असतं 

*

समाजामागे धावायचं नसतं 

समाज आपल्यामागे धावला पाहिजे 

हेच मनात ठेवायचं असतं 

स्वबळावर उभं राहायचं असतं 

☆

© सौ. वृंदा पंकज गंभीर (दत्तकन्या)

न-हे, पुणे. – मो न. 8799843148

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ.उज्वला सुहास सहस्त्रबुद्धे

  कवितेचा उत्सव  

☆ गुरू वंदना… ☆ सौ.उज्वला सुहास सहस्त्रबुद्धे ☆

☆

माता पिता असती,

आपले पहिले गुरू!

शाळेत जाता आपण,

शिक्षकांचा हात धरू!….१

*

गुरुजनांचा आदर,

हे संस्कृतीचे लक्षण !

समाज असतो थोर,

जिथे गुरूंना प्रणाम !…२

*

जीवनाच्या शाळेत रोज जाता,   

नवनवीन अनुभव घेता!

शिक्षण मिळते क्षणाक्षणाला,

देई आपणा तो बुद्धीदाता!…३

*

सृष्टी समाज शिकवती,

नित्य नूतन गोष्टी !

हे गुरुच पूज्य असती,

आपणास या जगती!…४

*

वंदन करू या आपण,

साऱ्या गुरुजनांना!

अखंड राहू दे विद्यार्थी,

हीच इच्छा आहे मना!

☆

© सौ. उज्वला सुहास सहस्रबुद्धे

श्री तुकाराम दादा पाटील

 कवितेचा उत्सव 

☆ जगणं… ☆ प्रा तुकाराम दादा पाटील ☆

☆

“शब्दातून जितकं घ्यायचं 

त्याच्याहून अधिक द्यायचं असतं

आपलं बळ वाढवण्यासाठी

धडपडत जगण्यासाठी

आपणच आपल्याशी,

आयुष्याशी प्रामाणिक राहून.

 

साम्राज्य आपल्यासाठी

नसतं उभारायचं

इतरांनाही त्यात

बरोबरीने वाटा द्यावा लागतो 

सुराज्य होण्यासाठी.

 

हे जेव्हा कळेल माणसाला

तेव्हा कोणालाही लागणार नाही 

काही सांगायला

आपलं तुपलं ओळखायला

जबाबदाऱ्या पेलायला 

आपापल्या

 

नाहीतर

पालथ्या घड्यावर पाणी टाकून काय उपयोग.

जेव्हा ते सुलटे होतील

तेव्हाच भरतील.

नाहीतर

आहेच त्यांची उतरंडी रचणं 

कोणाच्यातरी आशीर्वादवर जगणं.

अंधारबनातलं.

☆

© प्रा. तुकाराम दादा पाटील

मुळचा पत्ता  –  मु.पो. भोसे  ता.मिरज  जि.सांगली

सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३

दुरध्वनी – ९०७५६३४८२४, ९८२२०१८५२६

≈ संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈

श्री सुहास सोहोनी

 कवितेचा उत्सव 

 

☆ 👁️ डोळे… 👁️ ☆ श्री सुहास सोहोनी ☆

☆

एक सूख आनंदाने

डोळ्यांमधून हसू लागलं

एक काहूर अश्रू होऊन

डोळ्यांमधून वाहू लागलं

*

तृप्तीचा एक भाव

डोळ्यांवाटे मनांत जिरला

मनांवरचा एक घाव

डोळ्यांमधून गळून पडला…

*

राग लोभ द्वेष प्रेम

सारा भाव डोळ्यांत दिसतो

अंतर्बाह्य माणूस दिसे

डोळा एक आरसा असतो…

*

उघडे डोळे झाकले डोळे

विस्मयाने फाकले डोळे

विस्फारलेले ताठ डोळे

घाबरलेले बंद डोळे…

*

शांत डोळे क्लांत डोळे

दर्शन घेण्या उत्सुक डोळे

आतूर डोळे चतूर डोळे

परदु:खाने थिजले डोळे —

*

डोळे नसती कधीच पापी

नजर वाकडी असते

भला बुरा तर माणुस असतो

नाठी बुद्धी चळते —

*

काळ्या काळोखास बघावे

की तेजाने दिपून जावे

भव्य बघावे, दिव्य दिसावे

दृष्टीत सृष्टीला ओढावे —

☘️

© सुहास सोहोनी

रत्नागिरी

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर

प्रा डॉ जी आर प्रवीण जोशी

 कवितेचा उत्सव 

☆  सोड आता बाण रे… ☆ प्रा डॉ जी आर प्रवीण जोशी ☆

☆

पाहिले ना मी चंद्र सूर्य तारे

इतुक्यात राजा झोपलास का रे ?  ।। ध्रु ।।

*

सतार अजुनी अबोल आहे

अंगावरी तिच्या खोळं आहे

उघडना गवसणी आत चंद्र तारे ।। 1 ।।

*

लाव षड्ज तो तार सप्तकात

बहरू दे सतार उच्च आरोहात

अबोलीचे बोल जरा ऐक नारे ।। 2 ।।

*

पणतीमध्ये पेटू दे ती वात

भिजू दे सर्वांग तुझ्या प्रेमात

क्षितीवरती सुटू दे गार वारे ।। 3 ।।

*

छेडल्या तारात ठहराव घे रे

 गडबड नको अवरोहात कारे

चमकू दे गगनी शुक्र अन तारे ।। 4 ।।

*

दरबारी रागात गुलाबी ढंगात

फुलू दे मोगरा महिरपी कंसात

मदन मंजिरीचा सोड आता बाण रे ।। 5 ।।

☆

© प्रो डॉ प्रवीण उर्फ जी आर जोशी

ज्येष्ठ कवी लेखक

मुपो नसलापुर ता रायबाग, अंकली, जिल्हा बेळगाव कर्नाटक, भ्रमण ध्वनी – 9164557779 

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ. ज्योती कुळकर्णी 

 कवितेचा उत्सव 

☆ गोंधळ… ☆ सौ. ज्योती कुळकर्णी ☆

☆

गोंधळ मी घालते तुझा गं अंबाबाई

सत्वर मला पाव गं पूजा करते आई

*

पहिल्या गोंधळाला पूजा सरस्वती आई

विद्येची देवता तू आहे गं मायबाई

साक्षरतेचा संदेश देते सर्वांना मी आई

सत्वर मला पाव गं पूजा करते आई

*

दुसरा गोंधळ केला’ काली’ गं आमची आई

रोड रोमिओंची गुंडागर्दी बाई

अद्दल चांगली घडवू, शक्ति दे मला आई

सत्वर मला पाव गं पूजा करते आई

*

तिसर्‍या गोंधळाचा दुर्गावतार मीच घेई

सासरच्या छळाला कंटाळले गं बाई 

हुंड्यासाठी मला छळतात ठाई ठाई

सत्वर मला पाव गं पूजा करते आई

*

गोंधळ मी घालते तुझा गं अंबाबाई

सत्वर मला पाव गं पूजा करते आई

☆

© सौ. ज्योती कुळकर्णी

अकोला

मोबा. नं. ९८२२१०९६२४

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ. रेणुका धनंजय मार्डीकर

  चित्रकाव्य  

माझ्या गाईच हे गोरं… ☆ सौ. रेणुका धनंजय मार्डीकर ☆

☆

माझ्या गाईच हे गोरं

दिसामासांनी वाढलं

खोंड देखणं झालेल

नांगराला मी जुंपलं

*

हत्तीवाणी रूप त्याचं

कामाचा उरक भारी

वसवंडीचा उंचवटा

शिंगं देखणीच न्यारी

*

झुलं मानाची घालून

बैलपोळे सजवले

वेशीतून मिरवत

केले देखणे सोहळे

*

आता पिकलं हे पान

चंगाळ्याच नाही गाणं 

जिवाभावाचं हे सोनं

माझ्या रानाची ही शानं

*

दात पडलेत त्याचे

देतो कुटलेला चारा

हिरव्याशा गवताचा

माऊ बसण्या निवारा

*

मुक्या जीवाच्या भावना

डोळ्यातून अश्रू गाळी

माझ्या लाडक्या नंदीचा

प्रेम भाव मी न्यहाळी

*

सेवा करून मी त्याची

फेडतोय आज ऋण

त्याच्या थकल्या जीवाला

विश्रांतीचे काही क्षण

☆

© सौ.रेणुका धनंजय मार्डीकर

औसा.

मोबा. नं.  ८८५५९१७९१८

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री रवींद्र सोनावणी

 कवितेचा उत्सव 

☆ कवितेतून उगवून आला हात… ☆ डॉ. प्रेरणा उबाळे ☆ 

☆

चित्र काढा रंग भरा 

नाचा-बागडा श्वास घ्या

कवितेतून उगवून आला हात

*

अंकुर फुटवा फुलं फुलवा 

सुगंध घ्या रस प्या 

कवितेतून उगवून आला हात 

*

डोळ्यात साठवा मनात भिजवा 

शाईत बुडवा कल्पनेत रमवा

कवितेतून उगवून आला हात

*

कलरव नुसता मंजुळ गाता 

पुढे पुढे जाता थांबा न आता

कवितेतून उगवून आला हात

*

नटा सजा पृथ्वी व्हा 

उठा लढा आकाश व्हा

कवितेतून उगवून आला हात

*

मुक्त व्हा रममाण व्हा 

सारथी व्हा स्वतःचे स्वतः 

कवितेतून उगवून आला हात

*

कविता ब्रम्हांड असे स्वानंद 

कविता सारंग नवा आरंभ 

कवितेतून उगवून आला हात…

☆

श्री रवींद्र सोनावणी

 कवितेचा उत्सव 

☆ सांग दयाघन… ☆ श्री रवींद्र सोनावणी ☆ 

☆

चहूबाजूंनी कानी पडती भयकंपीत चीत्कार

सांग दयाघन धरतीवर अवतार कधी घेणार 

*

धडे घेतले विनम्रतेचे समतेचे बंधुत्वाचे

परस्त्री मातेसमान शिकलो तिजला वंदन करण्याचे

दानव होऊन मानव करतो पाशवी अत्याचार

सांग दयाघन धरतीवर अवतार कधी घेणार 

*

रक्षाबंधन भाऊबीज हे उत्सव कोणासाठी? 

बहिणी ओवाळिती उजळती मंगलमय ज्योती 

वस्त्र खेचणाऱ्या हातांना कलम कोण करणार 

सांग दयाघन धरतीवर अवतार कधी घेणार 

*

विवाहिता कोवळी बालिका अथवा वृद्धा साठी ची

झडप तयांवर घालती लंघुन सीमालक्ष्मण रेषेची 

आज आठवे शिवरायांच्या म्यानातील तलवार 

सांग दयाघन धरतीवर अवतार कधी घेणार 

*

पिता करी बळजोरी मुलीवर पुत्रही सामील 

नरमादीचे नाते न जाणती श्वानच ते केवळ 

दुष्ट वासनाकांड आरोपी सुळी कधी चढणार

सांग दयाघन धरतीवर अवतार कधी घेणार 

*

हृदयामधी आक्रोश आणखी डोळयांमधि आसवे 

मायबहीणींनी सांगा कुठवर दुःख निमुट सोसणार 

या बलिदानामधून निश्चित रणरागिणी उठणार 

निश्चित रणरागिणी उठणार 

सांग दयाघन धरतीवर अवतार कधी घेणार

☆

© श्री रवींद्र सोनावणी

निवास :  G03, भूमिक दर्शन, गणेश मंदिर रोड, उमिया काॅम्पलेक्स, टिटवाळा पूर्व – ४२१६०५

मो. क्र.८८५०४६२९९३

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈