Category: कवितेचा उत्सव 2

कवितेचा उत्सव

☆  सुखी संसाराचं रहस्य ☆ श्री सोमनाथ साखरे ☆

सहज सुचलं म्हणून…   सुखी संसाराचं रहस्य

बायको बोलत असताना

आपण शांत रहावं,

वादळ शांत झाल्यावर

निःशब्द गाणं गावं

नैराश्यात वादळ मग

स्वायंपाक घरात जातं

भांड्यांच्या गळ्यातून

कर्कश गाणं येतं

आपण आपलं तेव्हा

कर्णबधिर व्हायचं

वर्तमानपत्रा आडून

गुपचूप फक्त बघायचं

अनुभवाने सर्वकाही

अंगवळणी पडेल

संसार होईल सुखाचा

सारं शुभ घडेल.

© श्री सोमनाथ साखरे

नाशिक

मोबा.९८९०७९०९३३

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री हरिश्चंद्र कोठावदे

 कवितेचा उत्सव 

☆ जगावेगळे… ☆ श्री हरिश्चंद्र कोठावदे ☆ 

(वृत्त:पादाकुलक)

जगावेगळी धरा आमुची

गगन आमुचे जगावेगळे

जगावेगळे तीर्थ आमुचे

यात्री आम्ही जगावेगळे !

विश्व मानुनी घरट्याला रे

सुखे नांदती सर्व पाखरे

अखंड अमुच्या शापित पंखी

नभापारचे खूळ सळसळे !

आलो सोडुन सुवर्णनगरी

त्या बेड्या ते पाश रुपेरी

झेलुन जखमा नक्षत्रांच्या

ह्रदयाशी आकाश घेतले !

पानगळीचा ऋतू निरंतर

अरण्य जेथे ओकेबोके

होत साजरे तिथेच अमुचे

ऋतुरंगांचे नित्य सोहळे !

प्रकाश व्हाया जरा दुजांचा

विझवुन आलो निजज्योतींना

मुळि न थांबलो दुवे घ्यावया

आनंदाश्रू तमात पुसले !

अशीच बुडता नभी पापणी

जावा जीवनओघ थांबुनी

जगावेगळे अमुचे जीवन

मरणही व्हावे जगावेगळे !

© श्री हरिश्चंद्र कोठावदे

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्रीमती अनुराधा फाटक

 कवितेचा उत्सव 

☆ ऋण…  ☆ श्रीमती अनुराधा फाटक ☆ 

ऋण

     आता तू उभी आहेस

तुझ्या पायावर… मात्र

ज्या मातीवर तुझे पाय आहेत

त्या मातीची ओळख ठेव..

विसरु नकोस ऋण मातीचं

जिनं घडवलं लेणं आयुष्याचं !

माती नसती तर…

कदाचित तुझे पाय अधांतरी..

पाय तुझे आहेत

तू कुठंही जा…पण

माती तुझी नाही हे न विसरता..

तिचं ऋण पायदळी  तुडवता!

अगं ऋण तुडवायचं नसतं

ते अभिमानाने मिरवायचं असतं !

© श्रीमती अनुराधा फाटक

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री उदय गोपीनाथ पोवळे

 कवितेचा उत्सव 

☆ आजकाल ☆ श्री उदय गोपीनाथ पोवळे ☆

इमारतीची उंची वाढली, माणुसकीची झाली कमी

काळाने माणूस उंचावला, व्यक्तिमत्वाची नाही हमी

पदव्या झाल्या स्वस्त, शहाणपणाची आहे वाण

खऱ्याचे झरे गहाळ, खोट्याचे डोंगर महान

स्वची भाषा वाढली, मूल्य धारातीर्थी पडली

सुखसोयी मुबलक, वेळेची कमतरता आली 

हुशारी त्याची वाढली, समस्या ही वाढली

दुरूनच बोलणे त्याचे, नकोशी नाती झाली

रस्ते झाले रुंद, त्याची दृष्टी झाली अरुंद

अन्यायाचे दर्शन होता, डोळे झाले बंद

औषध झाली मुबलक, त्याचे आरोग्य मात्र कमी

जगण्यात वाढ वर्षाची, पण वर्षांमध्ये जगणे कमी

प्रेम क्वचितच करतोय, पण तिरस्कार सहज होतॊय

शुद्ध हवेसाठी झटतोय, पण मन प्रदुषीतच असतय

आवक खूप वाढतेय, पण नियत कमी होतेय

मदतीची मूठ त्याची, बंदच कायम दिसतेय

गप्पा जागतिक शांतीच्या, घरात वातावरण युद्धाचे

वाटण्या झाल्या जमिनीच्या, तुकडे झाले नात्याचे

राहणीमान सुधारले त्याचे, जगण मात्र खालावले

घर खूप विस्तारले त्याचे, कुटुंब वृक्ष रोडावले

घरं खूप सजवली त्याने, पण घरटी नसे साजेशी

वस्तू वाढल्या माणसे कमी, बोलावे तरी कोणाशी

दिखाव्याच्या खोलीत त्याच्या, खूप काही मांडलेले 

मनाची खोली रिक्त त्याची, खूप काही सांडलेले

आजकाल हे असच होतय, पहिल्यापेक्षा वेगळे घडतंय

आजकाल हे असच होतय, त्याच्यासाठी ते वेगळे नसतंय

© श्री उदय गोपीनाथ पोवळे

ठाणे

मोबा. ९८९२९५७००५ 

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ.ज्योत्स्ना तानवडे

 कवितेचा उत्सव 

☆ वर्षारंभ ☆ सौ.ज्योत्स्ना तानवडे ☆ 

वसंत ऋतुच्या आगमने

शक संवत्सर सुरू होते

मरगळ झटकून सारी

निसर्गात चैतन्य फुलते ||

वर्षारंभी नवलाई होते

निसर्ग किमया बहरते

पानगळीच्या जागेवरती

नवी पालवी नाचू लागते ||

पळस पांगारा बहव्याला

गुलमोहरा येई फुलोरा

निसर्गाची रंगपंचमी ही

अदभूत रंगीत नजारा ||

मोगऱ्याचा गंध धुंदावतो

सुटे आंब्याचा घमघमाट

सजे चैत्रागौरीची आरास

आंब्याची डाळ पन्ह्याचा थाट ||

ठायी ठायी रंगांची आरास

फळा फुलांना बहर भारी

सृजनोत्सवाने सुरू होई

नववर्षाची नवी भरारी ||

दु:खावरती माती सारत

आनंदाचे ते बीजारोपण

नवीन स्वप्ने नवीन आशा

घेऊन येतील नवे शुभ क्षण ||

© सौ.ज्योत्स्ना तानवडे

वारजे, पुणे.५८

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री उषा जनार्दन ढगे

  कवितेचा उत्सव   

☆ सण आला सौख्याचा… ☆ सुश्री उषा जनार्दन ढगे ☆ 

होतसे मराठी नववर्षारंभ

    चैत्राच्या शुध्द प्रतिपदेस

शुभ दिन चैत्रपाडव्याचा

    पहिला सण असे हा खास…

वस्र रेशमी कलश रुप्याचा

   सजवूनी गुढी उभारली दारी

प्रतीक असे हे सुमांगल्याचे

    चैतन्य सुख संपदा नांदे घरी…

रेखूनी रांगोळी प्रवेशद्वारी

    स्वागतास तोरण सुशोभित

करावे सेवन कडुनिंब पानांचे

    लाभे आरोग्य शरीर रोगमुक्त…

सुमंगल सांस्कृतिक समुचित

    वैशिष्ट्यपूर्ण चैत्राचा हा मास

दिस गुढीपाडव्याचा मुहूर्त

    योग्य असे सर्व शुभकार्यांस…

वसंत ऋतूची लागता चाहूल

    आम्रवनी कूजन कोकिळेचे

धरती पानाफुलांनी सजते

    आगमन होते वैपुल्यतेचे…

गुढीपाडव्याच्या या शुभ दिनी

    संपला राम सीतेचा वनवास

रघुवीरकृपेने जाऊनी  विपदा

    आपत्तीचा शीघ्र होवो र्‍हास…!

© सुश्री उषा जनार्दन ढगे

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈