Category: कवितेचा उत्सव 2

 कवितेचा उत्सव 

प्रे म भा व  श्री प्रमोद जोशी 

शब्दांचेच तीळ,

शब्दांचाच गूळ,

स्नेहाचे हे मूळ,

शब्दातीत!

 

सत्य तरी गोड,

बोलणे कठीण,

सैल होई वीण,

नात्यातली!

 

संक्रांत निमित्त,

स्नेह हाच हेतू,

उभारावे सेतू,

मनोमनी!

 

सौहार्द्राएवढे,

विधायक काय?

पाण्यावरी साय,

येऊ शके!

 

कोरडा न व्हावा,

प्रेमाचा ओलावा,

अभंग रहावा,

भाव बंध!

 

दोघानिही थोडे,

सरकावे मागे,

तेव्हा पुन्हा धागे,

गुंततात!

 

तिळातला स्नेह,

गुळातली गोडी,

सुटतात कोडी,

अबोलीची!

 

प्रमोदे प्रमाद,

जरी झाला असे,

अंतरात वसे,

प्रेमभाव!

 

अभंगाची कळा,

स्वतःहून आली,

व्हावी सदाफुली,

अबोलीची!

 

चुकल्याची क्षमा,

मनस्वी मागतो,

मनस्वी सांगतो,

गोड बोला!

 

© श्री प्रमोद जोशी

देवगड. 9423513604

≈संपादक–श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

 कवितेचा उत्सव 

☆ काळजात थिजले काही ☆ श्री हरिश्चंद्र कोठावदे ☆ 

(वृत्त : लवंगलता)

मात्रा : ८+८+८+४

काळजात थिजले काही,ती झुळझुळ आता नाही

अस्तंगत झालो आहे , ती ज्योत जागती नाही !…

 

एकांती हलती फांद्या ,  पाखरांविना ही घरटी

निष्पर्ण जाहलो केव्हा,हे मलाच कळले नाही !

 

आणावे कोठून रक्त , ही मशाल जगवायाला…

ती रक्तचंदनी धारा,प्राणातुन वाहत नाही !

 

ही वाट कुण्या तीर्थाची,मी कशास चालत आहे?

हे उगीचतेचे ओझे , पांथस्था झेपत नाही !…….

 

जखमांचे क्रंदन शमले,दुःखांचे सरले चिंतन

ती तप्त मनस्वी मुद्रा,जगण्यावर उरली नाही !

 

© श्री हरिश्चंद्र कोठावदे

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

सौ. विद्या पराडकर

 कवितेचा उत्सव 

☆ संक्रांत ☆ सौ. विद्या पराडकर ☆

आली आली संक्रांत राणी

नटली चंद्रकला नेसुनी

 ले्वूनी शुभ्र हलव्याचा साज

लाजवी मोत्या लाही आज

 

तिळाची स्निग्धता, गुळाची गोडी

समरसतेने सजते बघा जोडी

संसार सागरातील‌ जणू‌ होडी

कुशलतेने वल्हवतो‌  हा नावाडी

 

प्रेमाचे तीळ‌ घेऊनी

कर्तव्याचा  गुळ घालूनी

संयमाचे जायफळ उगाळूनी

एकतेची  विलायची टाकुनी

 

सुगंध युक्त लाडू वळू या

विशाल दृष्टिचे दान देवू या

संस्कृतीचे जतन करू या

संक्रांतीला नवा अर्थ देवू या

 

लहान मोठा भेद सारूनी

समरसतेचा  मंत्र घेवूनी

स्वदेश स्वधर्माचे   पालन‌ करूनी

मानवतेचे  स्वप्न  साकारु या

मानवतेचे स्वप्न साकारु या.

 

© सौ. विद्या पराडकर

पुणे.

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

श्री तुकाराम दादा पाटील

 कवितेचा उत्सव 

☆ ओढ… ☆ श्री तुकाराम दादा पाटील ☆ 

वृत्त– अनुराग, लगावली

(ललगालगालगागा ललगालगालगागा)

जगणे सुखासुखी या जमले जगात नाही

भलतेच स्वप्न मी ही जपले मनात नाही

 

दिलदार वागण्याचे ठरले रिवाज होते

तुमचे स्वतंत्र होणे रुचले घरात नाही

 

निरखून पाहताना हसलाच चंद्र माझा

प्रतिबिंब आज त्याचे दिसले तळ्यात नाही

 

मज वाटलेच होते घडले तसेच सारे

मनसोक्त मी तरीही भिजलो दवात नाही

 

उगवेल सूर्य आता विझतील चंद्र तारे

धरतीस जाग आली उरलीच रात नाही

 

लिहिले अभंग काही सखये तुझ्याच साठी

म्हणतेस तू तरीही रचना सुरात नाही

 

करतो तुला विनंती समजून घे मला तू

सवता सुभा तुझाही उरला निवांत नाही

 

बरसात झेलण्याला असतो चकोर वेडा

पण तीच ओढ त्याने जपली मृगात नाही

 

© श्री तुकाराम दादा पाटील

मुळचा पत्ता  –  मु.पो. भोसे  ता.मिरज  जि.सांगली

सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३

दुरध्वनी – ९०७५६३४८२४, ९८२२०१८५२६

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

श्री प्रमोद वामन वर्तक

 कवितेचा उत्सव  

? मा धु क री ! ?  श्री प्रमोद वामन वर्तक  

(हल्लीच्या पिढीला, “माधुकरी” या शब्दाचा अर्थ ठाऊक असणे तसे कठीणच ! पण माझ्या पिढीतल्या सगळ्यांना हा शब्द परिचित असावा ! आपण जर प्रत्येक कडव्यातील पहिले अक्षर उभे वाचलेत, तर कवितेचे शीर्षक तयार होईल !)

 

मागावी पाच घरी जाऊन

   वीतभर पोटासाठी भिक्षा

   गत जन्मीचे असावे पाप

   देवाने दिली असे शिक्षा

 

धुवांधार असो पाऊस

   अथवा वैशाखाचे ऊन

   रोज फिरून दारोदारी

   मी करावे उदर भरण

 

कवाडे कोणी बंद करती

   लागट बोलून तोंडावर

   सर्वच घरी मज असा

   नाही अनुभव खरोखर

 

रीत ती रोज सांभाळून

   मागत फिरे माधुकरी

   सदा राहून हसतमुख

   शल्य दाबतसे मी उरी

 

© श्री प्रमोद वामन वर्तक

 

संपर्क – (सिंगापूर) +6594708959, मो – 9892561086, ई-मेल – [email protected]

≈संपादक–श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

सुश्री दीप्ती कुलकर्णी

 कवितेचा उत्सव  

☆ नववर्ष… ☆ सुश्री दीप्ती कुलकर्णी☆

 

कँलेंडर बदलतं नि वर्ष नवं येतं

सांगा बरं नक्की काय घडतं?

बदलतात का सूर्य-चंद्र?

नाही हो! स्रुष्टी नाही च बदलत.

बदलतं फक्त आपलं मन.

नव्या आशा,नवोन्मेष, संकल्पांचं दालन.

भविष्याचा वेध घेण्या, एक नवं कारण.

जीवनाला उभारी देतं, स्वागतोत्सुक मन

चित्तव्रुत्ती बदलण्याचं, ठरतं एक साधन.

© सुश्री दीप्ति कुलकर्णी

कोल्हापूर

≈संपादक–श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈