Category: कवितेचा उत्सव 2

प्रा.अरूण विठ्ठल कांबळे बनपुरीकर

चर चर कापणाऱ्या

ऊसाच्या पाल्याची सल

सर्वांगभर घेऊन

तो;

कडाक्याच्या थंडीत

ऊसतोड करत,

गारठलेल्या कुटूंबाचा

असा पालापाचोळा घेऊन

ऊसाच्या फडात

जगवतोय लेकरंबाळं.

पिळवटलेल्या शरीरानं

मोळ्या बांधत

कारखानदारी जगवता जगवता

आयुष्याचं चिपाड बनून जातोय.

त्याची वंशावळ

एक दोन कोयत्याच्या

मजूरीसाठी

आयूष्यभर

ऊसाचे फड तुडवतेय.

आणि

मुकादमाची उचल

फेडता फेडता

त्याच्या आयुष्याचीच

अशी

मोळी बनून जातेय….!

© प्रा.अरुण कांबळे बनपुरीकर..

दि.२२।१२।२०२१

बनपुरी ता.आटपाडी जि.सांगली

मो ९४२११२५३५७

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

श्रीमती मीनाक्षी सरदेसाई 

 कवितेचा उत्सव 

☆ झाडं म्हणजे!! ☆ श्रीमती मीनाक्षी सरदेसाई ☆

————झाडं म्हणजे!!————

———-झाडं हसतात फुलांतून——–

                झाडं झुरतात मुळांतून

                सळसळतात, कुजबुजतात

                कधी कधी पानं गाळतात   ।

                झाडं सुद्धा माणसांसारखी

                कोणी  उंच, कोणी बुटकी

                कोणी लठ्ठ कोणी रोडकी

                साधी, भोळी किंवा पक्की

                एखादं खादाड असतं

                मुलांसारखा  करतं हट्ट

                डोळे मिटून रुसून बसतं

                किंवा दवातून रडतं  ।।

                मात्र झाडं नसतात पापी

                म्हणुनच होत नाहीत दुःखी

               निसर्गावर मातत नाही

               तो पण त्यांच्यावर कोपत नाही।।

               झाडांपासून शिकावं

               फुलांसारखं हसावं

               त्यांचा खरा धर्म एक

               झाडांसारखं व्हावं नेक।।।

©  श्रीमती मीनाक्षी सरदेसाई

सांगली

मो. – 8806955070, 9561582372.

≈संपादक–श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

श्रीमती उज्ज्वला केळकर

 वाचताना वेचलेले 

☆ अप्रूप पाखरे – 27– रवींद्रनाथ टैगोर ☆ प्रस्तुति – श्रीमती उज्ज्वला केळकर ☆ 

[१२५]

या आशा एकांतात

का असं मंदावतं

माझं मन…

का असं झुरतं

कळत नाही मला….

आपल्या छोट्या छोट्या मागण्या

का नाही व्यक्त करत

की जाणवत नाही

की

आठवतच नाहीत त्याला?

[१२६]

तुझी इच्छा होईलत्या क्षणी

मालवून टाक हा दीप

तुझा अंधकारही

जाणून घेईन मी

आणि त्याच्यावरसुद्धा      

जीवच टाकीन…

[१२७]

आपण

काजव्यासारखे दिसतो

याचं

कधीच भय वाटत नाही

तार्‍यांना

[१२८]

पिसार्‍याच्या पसार्‍याचं

ते लांबलचक ओझं पाहून

कीव येते चिमणीला

मोराची

मूळ रचना – स्व. रविंद्रनाथ टैगोर 

मराठी अनुवाद – रेणू देशपांडे (माधुरी द्रवीड)

प्रस्तुति – श्रीमती उज्ज्वला केळकर

176/2 ‘गायत्री’, प्लॉट नं 12, वसंत साखर कामगार भवन जवळ, सांगली 416416 मो.-  9403310170

≈संपादक–श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

सौ .कल्पना कुंभार

 कवितेचा उत्सव 

☆ एकेक दिवस जातोय ☆ सौ .कल्पना कुंभार ☆

एकेक दिवस जातोय

आयुष्यातून जणू वजा होतोय..

किती पकडावा म्हटलं तरी

वाळूसारखा घसरू पाहतोय..

एकेक दिवस जातोय

जगण्याची दिशा बदलून..

सुखाची व्याख्याच बदलीय

थकलाय माणूस धाव धाव धावून..

एकेक दिवस जातोय

नुसताच कामात..

नातीही ऑनलाइन झालेत

इंटरनेटच्या जगात..

आजीआजोबा, मित्रमंडळी

राहिला मागे कधीच गोतावळा..

मुखवट्याच्या जगात या

कुठे लागतोय एकमेकांना लळा..

हल्ली ऑनलाईनच होतय प्रेम

अन ऑनलाईन  ब्रेकअप..

कशी कळणार हुरहूर प्रेमाची

व्हाट्सउप वर होतेय गपशप..

एकेक दिवस जातोय

आयुष्यातुन जणू वजा होतोय..

धावत्या जगाबरोबर धावता धावता

जगण्याचा परिघच बदलतोय..

? मनकल्प ?

© सौ .कल्पना कुंभार

इचलकरंजी

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

 कवितेचा उत्सव 

☆ घरात हसरे तारे असता… ☆ दत्ता वि.केसकर ☆

घरात हसरे तारे असता मी पाहू कशाला नभाकडे

छकुल्यांची ग प्रशांत वदने

गोड गुलाबी गाली हसणे

अमृत त्यांच्या ओठी असता कशास मधुघट हवा गडे

गोजिरवाणी जशी वासरे

प्रेमळ माझी गुणी लेकरे

स्वर्ग अवतरे घरात माझ्या आनंदाचे पडती सडे

गोकुळ येथे गोविंदाचे

झरे वाहती शांतीसुखाचे

वैभव पाहून मम सदनीचे ढगाआड गं चंद्र दडे 

– दत्ता वि.केसकर

 ≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

सौ. स्वाती रामचंद्र कोरे

 कवितेचा उत्सव 

☆ हम होंगे कामयाब ☆ सौ. स्वाती रामचंद्र कोरे ☆

(दोन शब्द दिव्यांगासाठी)

विसरला.. असेल  ‘तो’

एक.. अंगच देण्यास

पण…दिल्या त्याने कला

बहरून…जगण्यास…१

नाही …लाभले जे काही

त्याची.. न करता खंत

आहे… त्यातून फुलती

दिव्यांग हे..गुणवंत…२

आनंदाने…जगण्यास

येती..किती अडचणी

हम होंगे ..कामयाब

आत्मविश्वास..हा मनी…३

दिव्य.. दृष्टी दिली जिने

साऱ्या.. अंध बांधवांना

शोध…लावला लिपीचा

नमन.. लुई ब्रेल ना…४

अपघात.. होऊनही

सुधाताई.. न खचल्या

नृत्य कला…प्रेमापोटी

पुनश्च ..उभ्या राहिल्या..५

थोर…स्टीफन हॉकिंन्स

यांना… जडला आजार

होत… नसे हालचाल

परि… न मानती हार..६

मनी..ठेवूया आदर्श

सुप्रसिद्ध…या व्यक्तींचा

जरी..असती दिव्यांग

फुले..मळा जीवनाचा..७

व्यथा,,जाणुनिया त्यांच्या

मदतीचा..हात देऊ

भाग..असे आपलाच

सामावून.. तव घेऊ..८

अपंग.. दिन असला

तरी नाहीत ..ते  दीन

संघर्षाने.. साकारती

जीवनाचा..क्षण क्षण .९

©  सौ. स्वाती रामचंद्र कोरे

भिवघाट.तालुका, खानापूर,जिल्हा सांगली

मो.9096818972

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

सुश्री उषा जनार्दन ढगे

  चित्रकाव्य  

☆  नाताळ  ☆ सुश्री उषा जनार्दन ढगे ☆ 

येशू जन्मला..येशू जन्मला

नसे पारावार आनंद उर्मीला

ख्रिस्ती धर्माचा सण हा मोठा

मोद पसरवीत नाताळ आला..

चमचमती शुभ्र चांदण्या नभात

मेणबत्यांचा मिणमिणता प्रकाश

अंगणी झाडांवरती झगमगाट

रोषणाईतूनी लखलखतो हर्ष जल्लोष..

कसे विसरावे बरे अतूट नाते

सण नाताळ आणि सांताक्लाॅजचे

आदल्या रात्रीच भेटवस्तू वाटे

फार आवडते पात्र शिशुबालकांचे..

नाताळ सणाच्या स्वागतासाठी

मुले येशू जन्माची गाणी गाती

घरोघरी सजते झाड सूचिपर्णाचे

खास चाॅकलेट्स अन केक बनविती..!

© सुश्री उषा जनार्दन ढगे

≈संपादक–श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

6    चित्रकाव्य : उषा ढगे.

-नाताळ-

येशू जन्मला..येशू जन्मला

नसे पारावार आनंद उर्मीला

ख्रिस्ती धर्माचा सण हा मोठा

मोद पसरवीत नाताळ आला..

चमचमती शुभ्र चांदण्या नभात

मेणबत्यांचा मिणमिणता प्रकाश

अंगणी झाडांवरती झगमगाट

रोषणाईतूनी लखलखतो हर्ष जल्लोष..

कसे विसरावे बरे अतूट नाते

सण नाताळ आणि सांताक्लाॅजचे

आदल्या रात्रीच भेटवस्तू वाटे

फार आवडते पात्र शिशुबालकांचे..

नाताळ सणाच्या स्वागतासाठी

मुले येशू जन्माची गाणी गाती

घरोघरी सजते झाड सूचिपर्णाचे

खास चाॅकलेट्स अन केक बनविती..!

-उषा ढगे-