Category: कवितेचा उत्सव 2

सौ. उज्वला सुहास सहस्रबुद्धे

 कवितेचा उत्सव 

☆ सागर हाच बंधू… ☆ सौ. उज्वला सुहास सहस्रबुद्धे☆

 

सागर हाच बंधू माझा,

 आहे अपार अथांग !

बहिण भावाच्या मायेचे

 तेच आहे अंतरंग !

 

श्रावणाचा उत्कट बिंदू,

  असे नारळी पौर्णिमा !

सागराला भरती येई ,

  जाणू त्याचा मनी महिमा!

 

नात्याची या साद आहे , 

आधार हाच बहिणीचा !

सागरा सम अनंत आहे,

  रेशीम धागा या नात्याचा !

 

रेशीम धागा गुंफून घेई,

 स्नेहल नाते बंधू भावाचे!

मृदु, चिवट   रेशीम धागे,

  बंध बांधती दोन मनाचे!

 

 नात्याचे हे गुळखोबरे,

   एकजीव शिताशितात..

 गोडी त्याची असे अवीट,

  तृप्ती देई मनामनात…

© सौ. उज्वला सहस्रबुद्धे

पुणे (महाराष्ट्र)

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

सुश्री अरूणा मुल्हेरकर

 कवितेचा उत्सव 

☆ रक्ष्राबंधन☆ सुश्री अरूणा मुल्हेरकर☆

(सीमेवरील भावांसाठी)

वीरपुत्र तू भूमातेचा

लढत राहसी सीमेपाशी

रक्षण करण्या माॅं भगिनींचे

तळहाती घेऊनी शिराशी

 

नाही तुला प्राणांची पर्वा

पहाड बनुनी उभा ठाकसी

चारी मुंड्या चित करुनिया

शत्रूला तू पाणी पाजीसी

 

छातीवरती घाव झेलिले

थंडी वारा सर्व साहिले

किती रिपू तू गारद केले

आनंदाने प्राण अर्पिले

 

सण आला राखी पुनवेचा

पाठविते धागा प्रेमाचा

मनगटी तुझिया बांधुनिया

पाठीराखा तू भगिनींचा

 

वीर सैनिका भाऊराया

राखीचे हे अतूट बंधन

सीमेवरती पेटून उठला

पावन माती पावन जीवन

 

©  सुश्री अरूणा मुल्हेरकर

डेट्राॅईट (मिशिगन) यू.एस्.ए.

≈संपादक–श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

सुश्री मंजुषा सुनीत मुळे

 कवितेचा उत्सव 

☆ रक्षाबंधन…☆ सुश्री मंजुषा सुनीत मुळे ☆

रक्षाबंधनाचा दिस

                       दिस बहीण भावाचा

वाट पहाते भावाची

                       दिस होईल सुखाचा ——-

 

भाऊ गं माझा लांब

                       सय दाटे या मनात

आकाशी जरी चंद्र

                       तरी भरती सागरात ——-

 

वाजे दारात पाऊल

                       हर्ष मावेना मनात

वाटे भाऊराया आला

                       मन धावे उंबऱ्यात ——

 

दिस सरला सरला

                        पाहू ग किती वाट

भाऊराया सये माझा

                         गुंतून गेला ग कामात —-

 

सांजवात ही लावली

                         उजळला ग देव्हारा

जरी दूर भाऊ माझा

                          इथे प्रेमाचा उबारा —–

 

सुखी ठेव देवराया

                          माझ्या भावाला सतत

इडा पीडा टळो त्याची

                           सदा राहो आनंदात

**************

—————- आणि याच भावना या अशा शब्दातही ———

राखी —-

              हे मुळी बंधन नव्हेच–

                      तर हे एक चिरंतन प्रतीक —-

प्रतीक —–

 बहीण भावावर करत असलेल्या —-

              निरपेक्ष, निखळ, आणि अतिशय मनापासूनच्या

                              असीम प्रेमाचं —–

प्रतीक —–

“ देवा, माझ्या भावाला दीर्घायुष्य, निरंतर उत्तम आरोग्य, —

       — अतीव सुख-शांती-समाधान, भरभरून आनंद–

       — आणि सर्वतोपरी स्वास्थ्य दे —-” —

       — या बहिणीच्या रोजच्याच प्रार्थनेचं —–

 

© सुश्री मंजुषा सुनीत मुळे

९८२२८४६७६२.

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

सौ. विद्या पराडकर

 कवितेचा उत्सव 

☆ प्रियकर श्रावण…. ☆ सौ. विद्या पराडकर ☆

काळया काळया ढगातून श्रावण हसतोय ग॑.

प्रियकर श्रावण वसुंधरेला म्हणतोय ग.

 

मी येता तू पुलकित प्रिये कामिनी

लावण्या रुपी अशी देखणी

हिरवा हिरवा चुडा लेवुनी

संजीवनाचे मळे फुलती ग

 

ओढे सरिता खळखळ वाहती

सागराला तर येते भरती

जणू लेकरे आपुली कवळिती

नव जीवनाचे चित्र रेखाटी ग

 

धो धो वाहत गिरीशिखरावरूनी धबाबे येती

पशु पक्षी आनंदात लहरती बागडती

चर अचरावर तुझी वात्सल्य प्रीती

ममतेचे संगीत तू गाते ग

 

मृद्गंध हा आसमंत पसरला

सुगंध युक्त सुमना॑नी बागा सजल्या

जणू प्राजक्ता ने तुझ्यावर अभिषेक केला

पिसारा फुलवून मयूर नाचू लागला ग

 

ऊन पावसाचा लपाछपी चा खेळ चालला

सप्तरंगाचा नभोम॑डपी गोफ विणीला

सजणे मी येताच गरबा रंगला

वाद्ये घेऊन वायू सजला ग

 

अशी रूपमती झालीस सुंदर

मीलन होता अपुले मनोहर

नाचे गाई मुरली मनोहर

विश्र्व कल्याणाचा  ध्यास धरु ग

 

©

सौ. विद्या पराडकर

पुणे.

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

सौ.वंदना अशोक हुळबत्ते

 कवितेचा उत्सव 

☆ नाच रे उंदरा….☆ सौ.वंदना अशोक हुळबत्ते ☆

(विडंबन-रचना – ‘नाच मोरा आंब्याच्या वनात’ या चालीवर)

             नाच रे उंदरा

             शेंगांच्या पोत्यात

             नाच रे उंदरा नाच  || ध्रु||

         

             तुझी मेजवानी

             झाली रे

             शेंगांची पोती

             संपली रे

             मालकाची काठी

             पडेल तुझ्या पाठी

             कळवळून जरा तू…नाच

             नाच रे उंदरा

             शेंगांच्या पोत्यात…||१||

 

             फोलपट सारी

             खाल्लीस रे

             तोंडाला इजा

             झाली रे

             दुखेल तुझ्या पोटात

             नाचत राहशील पोत्यात

             दवा जराशी घेवून जा

             नाच रे उंदारा

             शेंगांच्या पोत्यात…||२||

 

             किती ही घाण

             केलीस रे

             तुझी लेकरे

             जेवली रे

             नको आता थांबू

             वेळ नको दवडू

             बिळात तुझ्या पळून जा

             नाच रे उंदारा

             शेंगांच्या पोत्यात….||३||

 

© सौ.वंदना अशोक हुळबत्ते

सांगली

≈संपादक–श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

श्रीमती उज्ज्वला केळकर

 कवितेचा उत्सव 

☆ श्रृंगार ☆ श्रीमती उज्ज्वला केळकर ☆ 

धरती न्हाती-धुती झाली

साज – शृंगार ग केला

घारा-धारांच्या हातांनी

मेघ कवळितो  तिला

 

मेघ कवळितो  तिला

स्वप्न उरात रुजले

तिच्या कुशीतूनी मग

रुजवण उगवले

 

रुजवण उगवले

गंधवार्ता दर्वंळली

धरित्रीच्या आंगोपांगी

साय सुखाची दाटली.

 

साय सुखाची दाटली.

मोती-दाणे कणसात

हिरव्या राव्यांचा ग थवा

आला उडत उडत

 

धरतीच्या ग ओठातून

हसू  तृप्तीचे सांडले

तृप्त माणसे, तृप्त  पक्षी

तृप्त चराचर झाले.

 

© श्रीमती उज्ज्वला केळकर

176/2 ‘गायत्री’, प्लॉट नं 12, वसंत साखर कामगार भवन जवळ, सांगली 416416 मो.-  9403310170

≈संपादक–श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈