Marathi Kavita
सौ. गौरी सुभाष गाडेकर
☆ कवितेचा उत्सव ☆ होलिकोत्सव विशेष – रंगपंचमी ☆ सौ. गौरी सुभाष गाडेकर ☆
रंगात रंग मिसळले
जाहल्या गोपीही श्रीरंग
मीपण तूपण सरले
झाले अवघे विश्व अभंग
ही होळी जाळो विद्वेषाला
नांदो ऐक्य जनी
हीच कामना मनी
माझिया हीच कामना मनी
© सौ. गौरी सुभाष गाडेकर
संपर्क – 1/602, कैरव, जी. ई. लिंक्स, राम मंदिर रोड, गोरेगाव (पश्चिम), मुंबई 400104.
फोन नं. 9820206306
≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित ≈
कवी राज शास्त्री
☆ साप्ताहिक स्तम्भ – हे शब्द अंतरीचे # 39 ☆
☆ प्रेम रंगात रंगले मी… ☆
मीरा वदे, श्रीकृष्णासी
नको करू, मज वनवासी
एकरूप होऊ, जवळ घे मजसी…०१
प्रेम रंगात रंगले मी
माझी न, राहिले मी
तन-मन तुज वाहिले मी…०२
कृष्णा केशवा, देह तुलाच दिला
आता हा, तुझाच रे बघ झाला
आस तुझीच, या जीवाला…०३
तुझ्यासाठी हलाहल पिले
राजमहाल, वैभव सोडले
आता सांग ना, काय मग उरले…०४
माझी नश्वर कुडी अर्पण
करिते निर्भेळ समर्पण
पाहते, तुझ्यात दर्पण…०५
तू कृष्ण मनोहर
मला हवा, तुझा आधार
तुझ्याविना, जगणे लाचार…०६
© कवी म.मुकुंदराज शास्त्री उपाख्य कवी राज शास्त्री.
श्री पंचकृष्ण आश्रम चिंचभुवन, वर्धा रोड नागपूर – 440005
मोबाईल ~9405403117, ~8390345500
≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित ≈
श्रीमती मीनाक्षी सरदेसाई
☆ कवितेचा उत्सव ☆ होलिकोत्सव विशेष – विडंबन कविता – दिवस सेलचे सुरु जाहले – बायांचे मन प्रसन्न झाले ☆ श्रीमती मीनाक्षी सरदेसाई☆
मूळ कविता – दिवस सुगीचे सुरु जाहले – शेतकरी मन प्रसन्न झाले–
खळखळ ,छमछम,डुमडुम,पटडुम लेझीम चाले जोरात।
कवी- ग.ह. पाटील.
——- दिवस सेलचे सुरु जाहले
——- जिकडे तिकडे बोर्ड झळकले
——- बायांचे मन प्रसन्न झाले
—— पटकन, झटकन, भर्कन, सर्कन
—— विक्री होतसे जोरात ।।
—— नऊ वाजता शटर उघडुनी,
—— गाद्या, गिरद्या साफ करोनी
—— सुंदर साड्या बाहेर टांगुनी
—— सेल्सगर्ल्स बसल्या थाटात।।
—— नाश्ता, सैपाक धुंदीत उरकुन
—— ‘त्या’च्या कडुनी रक्कम उकळुनी
—— मैत्रीणीना कॉल करूनी
—— भरभर, तरतर, लवकर, गरगर
—— फिरति सख्या बाजारात ।।
—— इथे हकोबा, तिथे बांधणी,
—— गर्भरेशमी किंवा चिकणी,
—— वस्त्रांची राणि ही पैठणी
—— सुळुसुळु, झुळुझुळु, हळुहळु, भुळुभुळु
—— ढीग संपतो तासात ।।
—— विटकि,फाटकी, कुठेकुठे-
—— घरि आल्यानंतर कळते
—— कपाट जरि भरभरुन वाहते
—— भुलवी, झुलवी, खुळावणारा
—— सेल अखेरी महागात ।।
श्रीमती मीनाक्षी सरदेसाई
सांगली
मो. – 8806955070
≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित ≈
श्री शामसुंदर महादेवराव धोपटे
☆ कवितेचा उत्सव ☆ होलिकोत्सव विशेष – अशी ही होळी… ☆ श्री शामसुंदर महादेवराव धोपटे ☆
आतंकवादा ची लाकडे
जातीयवादा च्या गोवऱ्या
धर्मांधतेचा घालून नारळ
तिरस्काराची टाकून गोळी
पेटवाहो जागोजागी होळी
अर्पण करू तिला द्वेषाची माळ
सदभावनेची घालून त्यात राळ
मोठा होउ द्या एकात्मतेचा जाळ
रुजवू संयमाने माणुसकीची नाळ
पारिवारिक स्नेहा ची पुरणपोळी
वर आत्मियतेेच्या तुपाची धार
कर्तव्य परायणतेचा कडकं वडा
वर आपुलकीची थंडाई गारेगार
परंपरा संस्कृतीचा तो वरणभात
संगीत ,नृत्य,विनोदाची ती चटणी
आग्रहाचा पापड ,स्नेहाचे लोणचे
मग रंगेल होळीची ती मेजवानी
संतांच्या शिकवणीचा तो गुलाल
लावून रंगू ,धरू ताष्यावर ताल
भिजूनचिंब पिऊ हो प्रेमाची भांग
आनंदात होळीच्या होऊ सारे दंग
© श्री शामसुंदर महादेवराव धोपटे
चंद्रपूर, मो. 9822363911
≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित ≈
श्रीमती उज्ज्वला केळकर
☆ कवितेचा उत्सव ☆ होलिकोत्सव विशेष – एकदा एक सज्जन माझ्या घरी आले ☆ श्रीमती उज्ज्वला केळकर☆
एकदा एक सज्जन माझ्या घरी आले
कविसंमेलनाला चला, टी.ए. डी ए. देईन म्हणाले.
मी म्हणाले, ‘छान छान कवितेचे भाग्य उजळले
कवी मंडळींनाही आता बरे दिवस आले.’
माळ्यावर चढले, ट्रंक उघडली.
बाड काढले, धूळ झटकली.
टाळीच्या कविता शोधत, निवडत संमेलन स्थळी आले. …
एकदा एक सज्जन…
दारात होते किती रसिक आणि दर्दी
मागाहून कळले, ती सारी कवींचीच गर्दी
कवींनी घेरले, मंडपात नेले
रिकाम्या खुर्चीत नेऊन बसवले. ….
एकदा एक सज्जन…
इतक्यात ते सज्जन आले आतून
म्हणाले, ‘खुर्चीला यांना टाका खिळवून
शंभर कविता ऐकवा मोजून
शंभर रुपये , टी.ए. डी ए.चे यांना उगीच नाही दिले.’ ….
एकदा एक सज्जन…
सज्जन मग कवींकडे वळून
म्हणाले, ‘आता माझे दहा -दहा रुपये, टाका बर देऊन’
शंभर कवींकडून दहा -दहा रुपये घेऊन
हजार रुपये खिशात टाकून, सज्जन गेले निघून
शंभर कवी आणि मीच तेवढी बापडी श्रोती तिथे उरले ….
एकदा एक सज्जन…
© श्रीमती उज्ज्वला केळकर
176/2 ‘गायत्री’, प्लॉट नं 12, वसंत साखर कामगार भवन जवळ, सांगली 416416 मो.- 9403310170
≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित ≈
श्रीमती रंजना मधुकरराव लसणे
☆ रंजना जी यांचे साहित्य # 64 – होलिकोत्सव विशेष – नकोस देऊ आज साजना ☆
नकोस देऊ आज साजणा भास नव्याने सारे।
आठवणींच्या मोर पिसांचे रंग उधळती तारे।
मऊ मुलायम कुरणावरती प्रीत पाखरू येई।
साद घालता ओढ लाविते नित्य जिवाला कारे।
शब्दतार तव नाद छेडती धुंद जणू हे गाणे।
मुग्ध जाहला देह स्वरांनी भाव अनामिक न्यारे।
गुंजन करितो भ्रमर कळीशी गूज तयांचे चाले।
अधर थरथरे अवचित जुळता नयन राजसा घारे।
तव स्पर्शाची किमया न्यारी गाली येई लाली।
स्पर्श फुलांचा गंध दरवळे दाही दिशांत वारे।
© रंजना मधुकर लसणे
आखाडा बाळापूर, जिल्हा हिंगोली
9960128105
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित≈
श्रीमती उज्ज्वला केळकर
☆ कवितेचा उत्सव ☆ कोरोना: काही बाही ☆ श्रीमती उज्ज्वला केळकर☆
(मूळ हिन्दी लेखन- घनश्याम अग्रवाल : मराठी अनुवाद – उज्ज्वला केळकर)
[1]
करोनामुळे कविसंमेलने रद्द झाली.
(कवींसाठी वाईट बातमी)
आता हे कवी कविता लिहू लागले.
(कवितांसाठी चांगली बातमी.)
[2]
कविसंमेलने रद्द झाली
जगता जगता कवी मेला.
रद्द नाही, पुढे ढकलली.
मरता मरता कवी जिवंत झाला.
[3]
संयम आणि सावधानीची
लक्ष्मणरेषा
तुम्ही उल्लंघू नका.
कोरोना रावण
स्वत:च लंघून येईल
आणि भस्म होऊन जाईल.
[4]
लग्नाच्या रात्री नवी नवरी
नवर्‍याला सोडून घरातून पळाली.
कारण?
साबणाने हात न धुता
नवर्‍याने नवरीचा घुंघट
उचलण्याचं साहस केलं होतं.
[5]
एक मीटरचं अंतर
नहमीच ठेवा दोघात.
एक दुसर्‍याचा स्पर्श नको.
म्हणजे आपण कोरोनापासून
आणि देश लोकसंख्या-विस्फोटापासून
दोघेही वाचाल.
मूळ रचना – श्री घनश्याम अग्रवाल
अनुवाद – श्रीमती उज्ज्वला केळकर
176/2 ‘गायत्री’, प्लॉट नं 12, वसंत साखर कामगार भवन जवळ, सांगली 416416 मो.- 9403310170
≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित ≈
☆ कवितेचा उत्सव ☆ कवित्व ☆ सुश्री पूजा दिवाण ☆
कवित्व
मध्यरात्री गाढ झोपेत
स्वप्नांच्या मार्गाने
कवितेचं लखलखत झुंबर
शत- दलांनी पेटतऺ
आणि
झोपेची पार वाट लागते…..
बरं उठायचं नाही असं ठरवलं तर ते बिलोरी काचांचे
शब्दांचे लोभस महाल
सकाळ पर्यंत पार विरून जातात.
अगदी दरीतल्या धुक्या सारखे
किंवा
चहातल्या बिस्कीटा सारखे……….
शेवटी प्रतिभेचे गुणगान गात उठणे भागच असतं
शब्दांना आंजारून गोंजारून
चाल चाल माते करत,
काटे आपल्या पायात मोडून घेत,
कागदावर उतरवावंच लागतऺ………
कवितेच्या कुठला फॉर्म मध्ये शब्दांना बसवायचे ?
तेही आपल्या हातात नसतं!
त्यांचे तेच घेतात हवा तो आकार.
आपण फक्त बघत राहायचं
व अर्थाची सोबत करायची……..
एवढे कष्ट घेतल्यानंतर
हाती आलेलं ते साजरे बाळ
मग आपल्याकडून हक्काने नावाची
अंगडी टोपडी लेऊन
कवितेच्या वहीच्या
पुढच्या पानावर बसतं
व
कवित्व सार्थकी लागतऺ……….
© सुश्री पूजा दिवाण
≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित ≈
श्रीमती अनुराधा फाटक
☆ कवितेचा उत्सव ☆ कवितेचे झाड… ☆ श्रीमती अनुराधा फाटक ☆
माझ्या कवितेच्या झाडाला
विचारांच्या शाखा
शब्दांचे गुच्छ बहरती सहज
माझ्या कवितेच्या झाडाला
विविध रंगी फुले
रसिकतेची फुलपाखरे
बागडती सभोवती
माझ्या कवितेच्या झाडाची मुळे
पसरती रानोमाळ
शोषण्या अनुभवपाणी
माझ्या कवितेच्या झाडाचे खोड
प्रतिभेची ओल
साठली तेथे
माझ्या कवितेचे झाड
मनाच्या अंगणी
होते निगराणी नकळत
असे माझे काव्यझाड
बहरावे सदोदित
हीच माझी प्रार्थना
शारदा मातेला!
© श्रीमती अनुराधा फाटक
≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित ≈
कविराज विजय यशवंत सातपुते
☆ साप्ताहिक स्तम्भ # 80 – विजय साहित्य 
चाहूल ☆ कविराज विजय यशवंत सातपुते ☆
मी सताड उघडे ठेवले आहे
माझ्या घराचे दार.
माझ्यातले अवगुण
दिले आहेत हाकलून.
मी उघडल्यात
घराच्या सर्वच खिडक्या
पहातोय डोकावून
आणि देतोय
घालवून
वळचणीला
थांबलेले
माझ्यातलेच
काही हट्टी
चुकार दोष.
मी करतोय स्वागत
येणाऱ्या पाहुण्यांचे.
संस्कारीत , आणि
संवेदनशील
आचार विचारांचे.
घेतोय चाहूल
माझ्याच…
कलागुणांची ..
प्रसंगी हरवत
चाललेल्या
माणसातल्या
माणुसकीची….!
© विजय यशवंत सातपुते
मोबाईल 9371319798
≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित ≈
