श्री रवींद्र सोनावणी
कवितेचा उत्सव
☆ कै. आचार्य अत्रे यांना काव्यांजली … ☆ श्री रवींद्र सोनावणी ☆
☆
स्फंदू लागले कभिन्न काळे सह्याद्रीचे कडे
मूक जाहले कडाडणारे डफ, ढोलक, चौघडे
सीमा लढ्याचे सुरू जहाले पर्व नव्याने आता
अशा अवेळी केलीस का तू युद्धाची सांगता
*
शिवशक्तीच्या बुरुजावरची तोफच होता मूकी
हर्षौन्मादे नाचू लागतील वैरी ते घातकी
तुझ्या भयाने थरथरली ती जुल्मी सिंहासने
राष्ट्रघातकी हैवानांची डळमळली आसने
*
तुझ्या प्रयाने आज निखळला मराठभूचा कणा
आज भवानी म्यान जाहली शिवरायांची पुन्हा
अहर्निश पेटती ठेवली मराठमोळी मने
तुझ्यावाचून आता तयांची थांबतील स्पंदने
*
नाट्यदेवता विष्षण झाली जाता धन्वंतरी
हसण्याचेही विसरून जाईल विकलांगी वैखरी
टाळ्यांचे ते गजरही होतील अबोल आता खरे
चांडाळांची कोण लोंबवील वेशीवर लक्तरे
*
“सुर्यास्ता” ची शोभा स्मरते ‘सिंहगर्जना ‘ जुनी
प्रीतीसंगमी स्वैर विहरली तुझी दिव्य लेखणी
या झरणीचे झाले भाले प्रसंग बाका येता
आपत्काली तुवा राखिली मराठीय अस्मिता
*
चिरयौवन भोगिती अजून ती तव “झेंडूची फुले “
आज क-हेचे पाणी आटले शल्य अंतरी सले
जगण्यात असे तो मौज मरावे वचना तू पाळिले
विनम्र माथा नयनी पाणी काळीज आमुचे उले
☆
© श्री रवींद्र सोनावणी
निवास : G03, भूमिक दर्शन, गणेश मंदिर रोड, उमिया काॅम्पलेक्स, टिटवाळा पूर्व – ४२१६०५
मो. क्र.८८५०४६२९९३
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
कवितेचा उत्सव 
