Category: कवितेचा उत्सव 2

श्री तुकाराम दादा पाटील

 कवितेचा उत्सव 

☆ आज तिरंगा…🇮🇳 ☆ प्रा तुकाराम दादा पाटील ☆

☆

भारतियांच्या नभांगणावर उंच फडकतो आज तिरंगा

मी तेजाचे प्रतीक आहे हेच सांगतो आज तिरंगा

*

समता ममता प्रेम जिव्हाळा एक दिलाने इथे नांदतो

लोकमतांच्या स्वातंत्र्याचा मान राखतो आज तिरंगा

*

भविष्य उज्ज्वल घडवायाला नव्या योजना अंगिकारतो

क्षितीजावरती आकांक्षांचे गाव कोरतो आज तिरंगा

*

सरस्वतीची बांधून पुजा अभिमानाने ज्ञान मिळवतो

खडतर वाटा ओलांडत मग खूप राबतो आज तिरंगा

*

इतिहासाच्या परंपरांचे वैभव आहे त्याच्या संगे

संस्कारांचा अगणीत ठेवा स्वयें राखतो‌ आज तिरंगा

*

मनासारखे घडवायाचे तर मग राखा बळ ऐक्यचे

भारतियाना आग्रहपूर्वक हेच बोलतो आज तिरंगा

☆

© प्रा. तुकाराम दादा पाटील

मुळचा पत्ता  –  मु.पो. भोसे  ता.मिरज  जि.सांगली

सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३

दुरध्वनी – ९०७५६३४८२४, ९८२२०१८५२६

≈ संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈

श्री तुकाराम दादा पाटील

 कवितेचा उत्सव 

☆ नोंद… ☆ प्रा तुकाराम दादा पाटील ☆

☆

संकटकाळी वै-यालाही घालत होती साद माणसे

जन्मभराच्या उपकारांची ठेवत होती नोंद माणसे

*

मनासारख्या घडल्या गोष्टी बदलायाला जगणे सगळे 

त्याच मोजक्या आठवणींची विसरत नव्हती याद माणसे

*

घडवायाला नव्या पिढीला जुनेजाणते झिजले होते 

त्यांच्यामधल्या संस्काराना देत राहिली दाद माणसे

*

अतूट नाती माया ममता लळा जिव्हाळा दिलाय ज्यांनी 

असल्या त्यांच्या औदार्यातच शोधत होती मोद माणसे

*

बदलत गेला जसा जमाना तशी धारणा बदलत गेली

काळासोबत वावरताना नकळत झाली बाद माणसे

*

ठोकत पाचर काम चांगले विरोधकांचे बंद पाडाण्या

चुकलेल्याना खिजवायाला शोधत बसती सांद माणसे

*

साधकबाधक देत दाखले संशोधक तर ठरून जाती 

पुराव्यातले बाढ पुराणे चिकटवणारी गोंद माणसे

*

थांबवण्याला पडझड इथली हाती काही उरले नाही 

फाजील वेडे नुकसानीचे करू लागली नाद माणसे 

☆

© प्रा. तुकाराम दादा पाटील

मुळचा पत्ता  –  मु.पो. भोसे  ता.मिरज  जि.सांगली

सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३

दुरध्वनी – ९०७५६३४८२४, ९८२२०१८५२६

≈ संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈

☆ गावचा निरोप काही येईना… ☆ म. ना. दे. (श्री मयुरेश देशपांडे) ☆

☆

   गावचा निरोप काही येईना, गावची आठवण काही जाईना 

   हात मायेचे लई भेटले, पदर मायेचा काही भेटेना 

   *

   फायदा अडचणीचा घ्यायला, पुढे आले मदत द्यायला 

   हात ओढणारे लई भेटले, साथ देणारा काही भेटेना 

   *

   संगे बसती तासन तास, बोल बोलती गोड खास 

   टीका करणारे लई भेटले, चुका सांगणारा काही भेटेना 

   *

   यादी पदार्थांची साठ, त्यात इथले पदार्थ आठ

   तूप रोटी लई भेटली, शिळी भाकर काही भेटेना 

   *

   वाढदिवसाला मेजवानी, आले सहकारी ढिगानी 

   गळा येऊन लई भेटले, गळ्यात पडणारे काही भेटेना 

☆

कवी : म. ना. देशपांडे

(होरापंडीत मयुरेश देशपांडे)

+९१ ८९७५३ १२०५९ 

https://www.facebook.com/majhyaoli/ 

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री नीलांबरी शिर्के

श्री सुहास सोहोनी

 कवितेचा उत्सव 

☆ मी तो निर्गुण यती… ☆ श्री सुहास सोहोनी ☆

☆

कुणा मिळाला लाभ कृपेचा

कुणा दर्शनाचा

तीही आस न उरली आता

बसलो बिनवाचा…

*

कुणी भजावा कुणी पुजावा

तू तारक देवा

मनी कुणाची नाही असुया

नाही कुणाचा हेवा…

*

मागणेच ना आता काही

नाही आस कशाची

असेल दैवी प्रारब्धी जे

घडेल मिळेल तेची…

*

नाही धरली कधी कास मी

अभद्र अविचारी

अशिष्ट ना बोलून कधीही

विटाळली वैखरी

*

सात्विकतेच्या पंढरपुरचा

मी तो वारकरी

नम्रताच दाविली जन्मभरी

अबोल वीटेपरी

*

काय करावे माझे आता

सारे तुज हाती

सुख दु:खाची नुरे भावना

मी तो निर्गुण यती…..

                मी तो निर्गुण यती…

☘️

© सुहास सोहोनी

रत्नागिरी

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री रवींद्र सोनावणी

 कवितेचा उत्सव 

☆ माळिण गावाची दुर्घटना… ☆ श्री रवींद्र सोनावणी ☆ 

☆

माळिण नव्हती वैरिण माझी, होती खरी मैत्रीण 

मला भासले, करीत होती प्रगती सर्वांगीण 

सह्याद्रीच्या कुळातला मी, फार जुना डोंगर 

परंतु माझ्या शरीरी नव्हता कातळ तो कणखर 

*

घट्ट मातीचा पुष्ट देह हा, वृक्षवल्लीनी सजला 

कुशीत माझ्या माळिण वस्ती रक्षित होतो तिजला 

पुत्रांनी पण तिच्याच, अवघी वनराई कापिली 

तोडुन लचके या देहाचे, भूमी सपाट केली 

*

तिथे बांधला त्यांनी जलाशय, पाणलोट अडवुन 

कसाबसा मी उभा राहिलो भुसभुशीत होवुन 

तशात पडता अविरत पाऊस, तोलच माझा ढळला 

कोसळलो मी, माळिण गावच नामशेष झाला 

*

कितिक माणसे मम वजनाने गुदमरून गेली 

आठ-दहा जी वाचली पुरती जायबंदी झाली 

या घटनेमधी सांगा, माझा काय असे दोष ?

न्याय निवाडा तुम्ही करावा होऊन न्यायाधीश 

*

डोंगरमाथे आणि पायथे, सोडून द्या मोकळे 

नकोच तेथे लोकवस्ती आणि नकोत शेतमळे 

वाचवाल जर पर्यावरण तुम्हीही वाचाल 

स्वच्छ शुद्ध या हवेत सारे, श्वास मोकळे घ्याल 

☆

© श्री रवींद्र सोनावणी

निवास :  G03, भूमिक दर्शन, गणेश मंदिर रोड, उमिया काॅम्पलेक्स, टिटवाळा पूर्व – ४२१६०५

मो. क्र.८८५०४६२९९३

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री कावेरी रोहिदास सुतार

 कवितेचा उत्सव 

|| शब्द || सुश्री कावेरी रोहिदास सुतार ☆

☆

शब्द जर अर्थाना नेहमीच 

पूर्णपणे न्याय देऊ शकले असते,

तर नात्यांमध्ये गैरसमज 

कधी निर्माण झालेच नसते… 

*

शब्द जर स्वतःचा तोल 

स्वतःच सावरू शकले असते,

तर मनावर आघात 

कधी झालेच नसते… 

*

शब्द जर दुःख, वेदना, यातना 

व्यक्त करू शकले असते,

तर डोळ्यांमध्ये अश्रू 

कधी आलेच नसते… 

*

शब्द जर स्वतःच्या मर्यादा 

स्वतःच ठरवू शकले असते,

तर नात्यांमध्ये दुरावे 

कधी आलेच नसते…

☆

© सुश्री कावेरी रोहिदास सुतार

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री प्रभा सोनवणे

कवितेच्या प्रदेशात # 242

☆ पंधरा ऑगस्ट…🇮🇳 ☆ सुश्री प्रभा सोनवणे ☆

☆

या ही वर्षी सगळी मंडळे,

जोरात साजरा करतील,

आपला स्वतंत्रता दिवस!

देशप्रेमाच्या गाण्यात मधेच एखादी,

विसंगत रेकॉर्ड,

पोरी जरा जपून…..सारखी !

कर्ण कटू आवाज,

रस्त्यावर घर असल्यामुळे,

रहदारीच्या आवाजाबरोबरच,

देशभक्तिचे आवाज!

लहानपणचा पंधरा ऑगस्ट,

किती सुंदर होता,

झेंडा वंदनाचा,

प्रभात फेरीचा….

कलेक्टर ऑफिस मधे,

पेढा मिळाल्याच्या आनंदाचा!

 अगदी साधा सुधा,

देशासाठी बलिदान देणाऱ्या,

शहिदाच्या आठवणींचा,

ए मेरे वतन के लोगो…..

किंवा

वंदेमातरम्…..

सारख्या मधूर गाण्यांचा !

 माणसांसारखाच ,

हा राष्ट्रीय सणही बदलला आहे !

पण सगळेच बदल अपरिहार्य,

आता पटवून द्यावेच लागेल,

पुढच्या पिढीला,

मेरा भारत महान

कसाकाय ते !

☆  

© प्रभा सोनवणे

११ ऑगस्ट २०२३ 

संपर्क – “सोनवणे हाऊस”, ३४८ सोमवार पेठ, पंधरा ऑगस्ट चौक, विश्वेश्वर बँकेसमोर, पुणे 411011

मोबाईल-९२७०७२९५०३,  email- [email protected]

≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री मंजुषा सुनीत मुळे

 कवितेचा उत्सव 

☆ “स्वरधुंद पाऊस…—” ☆  सुश्री मंजुषा सुनीत मुळे  ☆

☆

पाऊस येई घेऊन संगे सप्तसूर मनमोही 

स्वतःच धरुनी ताल आणि हा आळवितो आरोही ।।

 *                  

कधी वाटे हा अहीरभैरव, गुणगुणतो कानाशी 

कधी आळवे संथपणे जणू, गुजरी तोडी खाशी ।।

*

थांबवुनी सूर्यास ऐकवी, मुलतानी, मधुवंती 

भीमपलासी मारीत ताना, फिरे स्वत:च्या भवती ।।

*

मधेच होई उदास का हा, पडे जणू एकला 

सोबत येई पूरिया आणि मारवाही साथीला ।।

*

भान नाही या दिनरातीचे, स्वरात किती हा दंग 

जग रंगे त्या मालकंसी वा, भूप-यमनी हो गुंग ।।

*

कधी कधी परि होई नाहीसा, विसरून सूरच सारे 

जो तो शोधीत त्याला, होती सैरभैरही वारे ।।

*

आर्त होऊनी विश्वच मग हे गाई मेघमल्हार 

विसरुनी रुसवा मनीचा आणि बरसे फिरून ही धार ।।

*

स्वत:च उधळी मैफल परि कधी, होत अती बेसूर 

सूर सृष्टीचे वाहून जाती, अश्रूंना ये पूर ।। 

☆

©  सुश्री मंजुषा सुनीत मुळे

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈