Category: कवितेचा उत्सव 2

श्री सुहास सोहोनी

 कवितेचा उत्सव 

☆ आषाढी एकादशीचे दंडवत… ☆ श्री सुहास सोहोनी ☆

☆

अक्कड बक्कड, सख्खे भाऊ

दोघांनी ठरवलं, फिरायला जाऊ

अक्कड म्हणाला, तू वाट दाखव

बक्कड म्हणाला, तू वाट दाखव

*

जायचं कुठे, ठरलंच नव्हतं

रस्ता चुकायचं, कारणच नव्हतं

चाल चाल, चालत राहिले

पाय थकले, मोडुन गेले

*

भरकटल्यावर, संवाद संपला

कारण नसता, विवाद झाला

अक्कड म्हणे, डावीकडची वाट

बक्कड म्हणे, उजवीकडचा घाट

*

चालतच राहिले, अक्कड बक्कड

वाटेत त्यांना भेटला कक्कड

डोळ्यात हुशारी, डोक्यात अक्कल

वागण्या-बोलण्यात एकदम फक्कड

*

थकलेल्या जीवांना आधी

कक्कड देई कांदा भाकर

सुकलेल्या कंठांना सुखवी

थंडगार पाणी लोटाभर

*

कक्कड झाला गुरू तयांचा

अक्कड बक्कड झाले चेले

कक्कड सांगे मेख आतली

अक्कड बक्कड बघत राहिले

*

प्रथम ओळखा स्वतः स्वतःला

जाणुन घ्या तुमच्या शक्तीला

अंतर्मन तू असशी अक्कड

बहिर्मनाचा धनि तू बक्कड

*

स्वभाव भारी चंचल तुमचे

एका जागी नाही बसणे

लगाम तोडून सैरावैरा

भरकटणे अन् धावत सुटणे

*

कुठे जायचे, ठाऊक नाही

वाट कोणती, माहित नाही

हात मिळवुनी जाल पुढे तर

दैवदत्त मग मिळेल काही

*

चालत गेले चालत गेले

रात्री सरल्या दिवस संपले

मैलोगणती अंतर सरले

दैवाने परि काहि न दिधले

*

निराश झाले भाऊ दोघे

तोच कानि ये ध्वनि लयकारी

मृदुंगासवे टाळ वाजला

विठुनामाची हो ललकारी

*

बघता बघता गुंतुनि गेले

नकळत दिंडित सामिल झाले

अबीर बुक्का कुणी लावला

उतावळी जाहली पाउले

*

मंदिरि येता मस्तक लवले

नेत्रामधुनी अश्रू झरले

एक विचारे, एक मनाने

दो बंधुंचे सख्य जाहले

*

दर्शन घेता मुखचंद्राचे

पारावार न आश्चर्यासी

अविश्वासे स्थितीहि अवघड

उभा विटेवरि साक्षात कक्कड !!

उभा विटेवरि साक्षात विठ्ठल !!!

☘️

© सुहास सोहोनी

रत्नागिरी

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री प्रणिता प्रशांत खंडकर

 कवितेचा उत्सव 

☆ स्वागत… ☆ सुश्री प्रणिता खंडकर ☆

☆

स्वागत

वर्षाबाईचं लगीन ठरलं,

 वरूणराजाच्यासंग!

 सुपारी फुटली,आवतण देतो,

 मेघ,बिजलीच्या संग!

 गुलाल उधळीत,समीर जाहला

 पहा कसा बेधुंद!

 साथ देतसे धरती तयाला, दरवळतो मृदगंध!

 सुरू जाहली पहा तयारी,

 नटण्या-सजण्याची,

 आली टवटवी,अंगे धुवूनी,

   वेली-वृक्षांसी!

 अलंकार हिरे-मोत्यांचे,

 वैभव मिरविती,

 नाचत,डोलत आनंदाने,

 गुजगोष्टी करती.

 शालू पोपटी,नेसून सजली

  अवघी ही सृष्टी,

रूप खुलविते ,चोळीवरची,

 रंगबिरंगी नक्षी!

 किलबिल किलबिल करती पक्षी,वाजे शहनाई,

 तडतड तडतड घुमला ताशा ,

 घाई मुहुर्ताची!

 कडकड,चमचम,बिजली या, लवलवते  मंडपी !

 लगीन लागलं आकाशी अन्

  जलधारा अंगणी,

 स्वागत करूया,आनंदाने            

    झेलूया पावसाच्या सरी!

☆

© सुश्री प्रणिता खंडकर

संपर्क – सध्या वास्तव्य… डोंबिवली, जि. ठाणे.

ईमेल [email protected] केवळ वाॅटसप संपर्क.. 98334 79845.

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

☆ वाखरीला आलो… ☆ म. ना. दे. (श्री मयुरेश देशपांडे) ☆

(आषाढी एकादशीच्या आदल्या दिवशी सर्व पालख्या पंढरपूरच्या अलीकडील गावी वाखरीला पोहचतात. तिथे पालखीतील शेवटचे उभे रिंगण होते आणि दुसऱ्या दिवशी पहाटे पालख्या पंढरपूरला येतात. त्या आदल्या दिवसाचे वर्णन करण्याचा प्रयत्न या अभंगामध्ये केला आहे.)

|| वाखरीला आलो ||

☆

विठ्ठल विठ्ठल| एकची गजर|

लागली नजर| वेशीवरी|

*

वाखरीला आलो| भरून पावलो|

भक्तीरसा न्हालो| रिंगणात||

*

अवघ्या पालख्या| भेटी जणू सख्या|

प्रेमाची ही व्याख्या| काय सांगू||

*

शिजे परी दम| निवे परी नाही|

वाट आता पाही| पहाटेची||

*

पंढरी येऊन| माथा टेकवून|

दर्शन घेऊन| सुखी होई||

☆

कवी : म. ना. देशपांडे

(होरापंडीत मयुरेश देशपांडे)

+९१ ८९७५३ १२०५९ 

https://www.facebook.com/majhyaoli/ 

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री वर्षा बालगोपाल

  कवितेचा उत्सव 

☆ वर्षाधारा… ☆ सुश्री वर्षा बालगोपाल ☆

(राजा छत्रसाल यांनी महाराजांकडे कर्जाची मागणी केली होती आणि महाराजांनी त्यांना दान दिले आणि त्यांची अवस्था सुधारली अशी कथा आहे )

मी पावसावरील कविता लिहिताना त्यात प्रयोग म्हणून छत्रपती शिवाजी महाराजांच्या कथा त्यात कशा दिसतात हे सांगण्याचा प्रयत्न केला आहे. अशा 12 प्रसंगांवर मी कविता लिहिल्या आहेत. त्यातील एका प्रसंगावरील ही कविता….

☆

वरूणराजा तो झाला, राजा शिवछत्रपती

ढगांच्या घोड्यावर आरूढ़,गड़गडाच्या नौबती

सौदामिनीचे दाणपट्टे, सूर्यकिरणाच्या तलवारी

अशा मोठ्या दलासवे,राजा शोभे तालेवारी

*

आता आमचा बळीराजा,झाला छत्रसाल राजा

ऋण फिटता फिटेना,भेटू म्हणे महाराजा

शेत जमीन नांगरून गार्हाणे हे घातले

यथाशक्ती मदत व्हावी, मागणे हे मागितले

*

छत्रसालाने पसरले बाहू,शिवराय सरसावले

उराऊरी ते भेटताच, दैन्य सारे हे संपले

मृद्गंधाचे अत्तर लावले,थेंबांची ती पुष्पवृष्टी

धरे पासुनी आसमंतापर्यंत, सारी सुखावली सृष्टी

☆

© सुश्री वर्षा बालगोपाल

मो 9923400506

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री सुनील देशपांडे

 कवितेचा उत्सव 

☆ “पाऊस पहिला…” ☆ श्री सुनील देशपांडे ☆

पाऊस पहिला,

भिजवून गेला,

थंडी अजून बाकी।

मनात शिरला,

स्मृतीत उरला,

आठव अजून बाकी।

वर्षा सरली,

वर्षे सरली,

इच्छा अजून बाकी।

पुन्हा भिजावे,

धुंद फिरावे,

जोश न आता बाकी।

धरती भिजली,

मनेही भिजली,

काय राहिले  बाकी?

वृत्ती थिजली,

गात्रे थिजली,

जीवन अजून बाकी।

☆

© श्री सुनील देशपांडे

email : [email protected]

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈