Category: कवितेचा उत्सव 2

श्रीशैल चौगुले

 कवितेचा उत्सव 

☆ सांजप्रांत... ☆ श्रीशैल चौगुले ☆

☆

उन्हे पांघरुनी मन

सावल्यासंगे रमते

त्याच स्मृती झुलवा

झुलणे कसे जमते.

*

हसता वारा बिलगे

पाने सळसळ राग

ग्रीष्मात सलगी चाले

गुलमोहर पराग.

*

भाव अंतरीत धरा

अजुनी हिरवा चुडा

शुभ्र आभाळ निवांत

झळात पर्वत-कडा.

*

क्षितीजाच्या ओठी शब्द

उतरता दिन शांत

कविता फुलते नवी

सांजेचा विश्राम प्रांत.

☆

© श्रीशैल चौगुले

श्री तुकाराम दादा पाटील

 कवितेचा उत्सव 

☆ मोर झाला… ☆ प्रा तुकाराम दादा पाटील ☆

☆

चांगला तो साव होता आज आहे चोर झाला

वाचताना बातमीही फार मोठा शोर झाला

*

संगतीला संत आले वागण्याला शिस्त आली

साधकांचा स्पर्शहोता कावळ्याच्या मोर झाला

*

फार मोठी चूक झाली वागताना तोल गेला

उधळला संसार तेव्हा बायकोचा घोर झाला

*

स्वार्थ साधायास त्याने सोडला अभिमान सरा

लाजमोडा त्या घडीला राबणारा ढोर झाला

*

जाहली साकार स्वप्ने गर्व तेव्हा फार केला

संकटानी घेरलेल्या वादळाचा जोर झाला

*

काय होतो काय झालो हे कळेना आज त्याला

चाचपाया दैव तेंव्हा तो बिचारा पोर झाला

*

वेगळा आवेग होता कल्पना घेऊन आला

एकता बांधावयाला संस्कृतीचा दोर झाला

☆

© प्रा. तुकाराम दादा पाटील

मुळचा पत्ता  –  मु.पो. भोसे  ता.मिरज  जि.सांगली

सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३

दुरध्वनी – ९०७५६३४८२४, ९८२२०१८५२६

≈ संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈

☆ कोण रंग निसर्गाचा ☆ म. ना. दे. (श्री मयुरेश देशपांडे) ☆

☆

   कोण रंग निसर्गाचा

   काळी माती हिरवं पान

   त्याला कधी वाटला नाही

   इंद्रधनुष्याचा अभिमान

*

   पिवळं झालं पान तरी

   झाड त्याला धरू पाहतं

   तुटून खाली पडलं तरी

   वरून सावली देत राहतं

*

   दूर पसरल्या वाळवंटी

   कुठून एक निवडुंग येतं

   कोण त्याचे आई बाप

   कोण त्याला पाणी देतं

*

   आम्ही तेवढे भांडलो

   रंगावरुनी बोललो

   अठ्ठावीस युगे उभी

   माऊली कशी विसरलो

☆

कवी : म. ना. देशपांडे

(होरापंडीत मयुरेश देशपांडे)

+९१ ८९७५३ १२०५९ 

https://www.facebook.com/majhyaoli/ 

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

डाॅ. निशिकांत श्रोत्री 

 कवितेचा उत्सव  

☆ आशीर्वच लाभावा… ☆ डाॅ. निशिकांत श्रोत्री ☆

(आजच्या पितृदिनानिमित्त)

☆

आकाशीच्या चांदण्यातुनी एक किरण तरी यावा

वैभवासी  तात तुमचा आशीर्वच लाभावा ||ध्रु||

*

स्वप्नपूर्तीला तुमच्या सारे अर्पण केले जीवन

माझे मी ना मनी वासना कृतज्ञतेची जाण

पहाटस्वप्नी येउनिया मम अर्थ यशाला द्यावा

आकाशीच्या चांदण्यातुनी एक किरण तरी यावा

वैभवासी  तात तुमचा आशीर्वच लाभावा ||१||

*

यशोसुखाचे सुवर्ण राजिव गोंडस आले उमलूनी

सिंचन तुमच्या कष्टांचे हे आज येत फुलुनि

सुगंध तुमच्या तृप्तीचा हा एकवार तरी भोगावा

आकाशीच्या चांदण्यातुनी एक किरण तरी यावा

वैभवासी  तात तुमचा आशीर्वच लाभावा ||२||

*

गरुडभरारीसाठी अमुच्या पंखे रुजवलि आशा

व्योमाची भासली न व्याप्ती दिसला नाही अडोसा

स्फूर्तीने तुमच्या मम मनात जोश सदैव भरावा

आकाशीच्या चांदण्यातुनी एक किरण तरी यावा

वैभवासी  तात तुमचा आशीर्वच लाभावा ||३||

☆

© डॉ. निशिकान्त श्रोत्री

सुश्री प्रणिता प्रशांत खंडकर

 कवितेचा उत्सव 

☆ किमयागार… ☆ सुश्री प्रणिता खंडकर ☆

☆

 तो आला, सुखावून गेला,

  धरतीला , मनामनाला,

 अन् गंध मातीचा ओला,

 श्वासात भरूनी राहिला.

*

  तगमग अन् काहिली,

  क्षणात कशी ती शमली,

  अन् कात जणू टाकूनी,

  नवरूपे सृष्टी नटली.

*

  आभूषणे,जलबिंदूंची,

  पानापानांत ,प्रकटली,

  सर पहिली पावसाची,

  ही तिचीच किमया न्यारी!

*

 कप वाफाळत्या चहाचा,

 आल्याचा स्वाद अहाहा,

  कांदाभजी ही  संगतीला,

 आगळीच की हो मज्जा!

☆

© सुश्री प्रणिता खंडकर

संपर्क – सध्या वास्तव्य… डोंबिवली, जि. ठाणे.

ईमेल [email protected] केवळ वाॅटसप संपर्क.. 98334 79845.

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री नीलांबरी शिर्के

सुश्री मंजुषा सुनीत मुळे

 कवितेचा उत्सव 

☆ “भेट…—” ☆  सुश्री मंजुषा सुनीत मुळे  ☆

☆

घन भरले आभाळ

किती आतुर गंभीर

सानुल्याची वाट पाहे

जणू पोटुशी ती नार ….

 

भार घनांचा वाढता

जणू आता साहवेना

धरित्री एक सखी

देई धीर हळव्या मना …..

 

वृक्ष-लता फुले पाने

सजे सखीचे आंगण

भारावल्या आभाळाला

जणू डोहाळे-जेवण …..

 

आतुर वसुंधरा

आता आभाळ भेटीला

त्या आभाळा घेऊन

आला पाऊस हो आला …

         आला आला पाऊस आला …

☆

©  सुश्री मंजुषा सुनीत मुळे

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ. वृंदा गंभीर

 कवितेचा उत्सव 

☆ कविता – चाळिशीच्या वळणावर ☆ सौ. वृंदा गंभीर ☆

☆

चाळिशीच्या वळणावर

एकांत हवा

मन तरुण राहण्यासाठी

एक मित्र हवा

 

मोकळं जीवन जगावं

बिनधास्त राहावं

यासाठी एक खोडकर

मित्र हवा

 

संसाराच्या रहाडगाडग्यात

दमून गेलं तरी

मन फुलून जायला

एक मित्र हवा

 

डोळ्यातील आसवं पुसायला

मी आहे ना हक्काने सांगायला

एक मित्र हवा

 

सुख दुःखात साथ द्यायला

हाकेला धावून येणारा

एक प्रेमळ मित्र हवा

 

मनातील ओळखणारा

चेहऱ्यावरील भाव टिपणारा

एक भावुक मित्र हवा

 

मन हळवं असणारा

माझी वेदना बघून

घायाळ होणारा एक मित्र हवा

 

माझ्या चेहऱ्यावर दुःखात ही

हसू आणणारा

एक हसतमुख मित्र हवा

 – दत्तकन्या

☆

© सौ. वृंदा गंभीर

न-हे, पुणे. – मो न. 8799843148

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈