Category: कवितेचा उत्सव 2

सुश्री नीलांबरी शिर्के

  चित्रकाव्य  

सोनसळी खेळ    सुश्री नीलांबरी शिर्के ☆

☆

अंगावरची अहंपणाची

प्रतिष्ठेची आवरण काढावीत – –

निवांत सुखावह बसावं 

हातात घ्यावं आपलंच मस्तक – – 

आपणच वाचावं स्वतःला

जणू वाचतोय एखादं पुस्तक – – 

काना, मात्रा, वेलांट्या 

अर्धविराम, प्रश्नचिन्ह यातून

उलगडत जाऊ आपण आपल्याला – – 

चला व्हा निवांत,

आपणच आपणास समजून घ्यायला – – 

☆

© सुश्री नीलांबरी शिर्के

मो 8149144177

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री सुहास रघुनाथ पंडित

 कवितेचा उत्सव 

☆ तळ मात्र ठरलेलाच ! ☆ श्री सुहास रघुनाथ पंडित ☆

☆

अस्वस्थतेची नदी दुथडी भरून वाहत असताना

चालावे का तिच्या काठाकाठाने

जराही स्पर्श न होऊ देता?

की घुसावे तिच्या पात्रात

आणि जावे बुडून तिच्यात गटांगळ्या खात?

*

नदीचा प्रवाह अखंड वाहत असताना

नकळतपणे अडकतोच आपण

एखाद्या भोव-यात !

वरुन खाली, खालून वर

घुसळून निघताना

पुढच्या क्षणाची नसते हमी

कधी वाहत जातो, कधी वाहवत जातो

हातापायांची धडपड,

केविलवाणी—

केवळ समाधानासाठी

*

काठ सापडेल, न सापडेल,

तळ मात्र ठरलेलाच

तळ मात्र ठरलेलाच !

☆

© श्री सुहास रघुनाथ पंडित 

सांगली (महाराष्ट्र)

मो – 9421225491

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

कविराज विजय यशवंत सातपुते

कवितेचा उत्सव

☆ हनुमान जयंती विशेष – रामभक्त हनुमान…! ☆ कविराज विजय यशवंत सातपुते ☆

☆

कपी केसरी अंजनी,

करी शिव आराधना.

जन्मा यावे महादेव,

करी दांपत्य याचना…!१

*

वानरांचे रुपांमध्ये,

शिव पार्वती गमन.

माता पार्वतीचा गर्भ,

वात केसरी वहन..!२

*

अंजनीचे  पोटी आले,

शक्तीशाली शिवरुप.

वायुदेव केसरीचे,

भक्तीमय निजरूप..!३

*

भक्ती शक्तीचा वारसा,

रुप वानराचे घेई.

अंजनेरी पर्वताते,

शिवतेज जन्मा येई…!४

*

शारीरिक मानसिक,

धैर्य सामर्थ्य अफाट.

रामभक्त‌ मारुतीचे ,

शौर्य,साहस,अचाट…!५

*

त्याग,शौर्य सेवा,भक्ती ,

आले जेव्हा मूर्त रुप.

वायूपुत्र मारुती हा,

बजरंग निजरुप..!६

*

दैवी शक्ती वरदाने,

झेप घेई अकल्पित.

सूर्य बिंब गिळंकृत.

बाललीला संकल्पित…!७

*

सूर्य देव संकटात,

इंद्रदेव सजा देई.

वज्राघाते हनुवरी,

बालकांते दूर नेई…! ८

*

हनुर्भंग होता क्षणी,

नाम झाले हनुमंत.

असा बलशाली पुत्र,

चिरंजीवी गुणवंत…!९

*

गुण खोडकर वृत्ती,

देई त्यास अभिशाप.

पडे शक्तीचा विसर,

भोगीतसे भवताप…! १०

*

राजा सुग्रीवाचे धामी,

सेवा कार्य ते अर्पित.

राम भेट होता क्षणी,

केला देह समर्पित…!११

*

रामायणी हनुमान,

रामभक्त रामदूत

झाला भक्त बजरंग

महाबली कपीसूत…!१२

*

शक्ती सामर्थ्याची शक्ती,

नामातून चेतविली.

विस्मरणे गेली शक्ती,

जांबुवंते जागविली…!१३

*

जिथे जिथे राम नाम,

तिथे हनुमंत जागा.

चिरंजीव होऊनिया,

जोडी कैवल्याचा धागा…!१४

*

हाती आली दिव्य गदा,

शक्ती‌बल सामर्थ्याने.

पराभूत होणे नाही,

वीर अजिंक्य शौर्याने…!१५

*

निष्ठा आणि पराक्रम,

युद्ध कौशल्य विपुल.

दास रामाचा निस्वार्थी,

बुद्धी चातुर्य अतुल…!१६

 

*

कैक योजने उड्डाण,

सप्त सागर लांघन.

गदाधारी हनुमान,

साध्य शक्ती संघटन..!१७

*

इच्छाधारी लाभे रुप,

पिता देई वरदान.

सूक्ष्म विराट रुपात,

विहरतो हनुमान…!१८

*

त्याच वरदाने त्याने,

शोधियली सीतामाई.

साक्ष मुद्रिका घेऊनी,

दिली सुरक्षेची ग्वाही..!१९

*

राम नामाची महती,

कृतीतून दाखविली.

एका राम सेवकाने,

झणी लंका पेटविली…!२०

*

सीतामाई शोधताना,

केले लंका निरीक्षण.

हेर रामाचा होऊन,

केले गुप्त सर्वेक्षण…!२१

*

सीतामाई संवादात

सिंदुराचा लागे शोध

दीर्घायुष्य आरोग्याचा

रामभक्त घेई बोध…! २२

*

झाला भगवा केशरी,

सर्वांगासी विलेपन.

पाहुनीया हनुमंता,

संतोषले राममन…! २३

*

बजरंग दिले नाम,

जाणियली दिव्य शक्ती.

बजरंग बली रुप,

दर्शविते राम भक्ती…! २४

*

रामसेतू बंधनात,

बजरंग दावी दिशा.

राम जयघोषी सरे,

तमोमय दुःख निशा..! २५

*

राम रावण युद्धात,

हनुमान अग्रेसर.

दृढ विश्वास निष्ठेचा.

हाची एक रत्नाकर…!२६

*

कौमोदकी दिली गदा,

कुबेराचे वरदान.

हाती असेल जोवरी,

अजिंक्यसा बहुमान..!२७

*

वायु देवतेच्या कृपे,

प्राप्त झाल्या सिद्धी शक्ती.

रामायण प्रसंगात,

दृढ झाली राम भक्ती…! २८

*

सप्त सिंधू उल्लंघन,

घर्मबिंदू गर्भ रुप.

तोची हनुमंत सूत,

मगरीचे निजरूप..!  २९

*

करी घात कलंकीत,

काल नेमी एक पूत.

मामा असे रावणाचा,

दैत्य मारिचाचा सूत…!३०

*

रुप साधुचे घेउन‌,

हनुमंता अडविले.

द्रोणागिरी आणताना,

कार्य थोर थांबविले…!३१

*

ओळखून खरे रूप,

दिली सजा योग्य ठायी.

तोच दैत्य कालनेमी,

दिसे मारुतीच्या पायी..!३२

*

शनी पिडा निवारण,

करा मारुतीचे ध्यान.

भूत प्रेत सरे बाधा,

रक्षीतसे पंचप्राण..!.३३

*

जिथे जिथे राम नाम,

तिथे तिथे उभा दास.

यांच्या अंतरात आहे,

राम सीता सहवास…!३४

*

देव शक्तीशाली असा,

चिरंजीव भक्त रूप .

सेवा भक्ती साधनेत,

जळे रामनाम धूप..!.३५

*

आहे वज्र याचे करी,

मुष्ठीमधे आहे शक्ती.

बलशाली‌ हनुमान ,

शिकवितो दास्य भक्ती…!३६

*

तेज तत्व जिंकणारा,

वायु पुत्र हनुमान .

शक्ती,स्फूर्ती नी उर्जेचे,

आहे मारुती प्रमाण…!३७

*

शंकराचे पाशुपत,

वरदान अजेयाचे  .

शूल त्रिशुलादी शस्त्रे,

शक्ती सामर्थ्य दासाचे…! ३८

*

नखाग्राने रामनाम,

केळीच्याच पानावरी.

लिहितसे बजरंग ,

रामनाम वर्णाक्षरी…!३९

*

स्वामी निष्ठ‌ सेवकाला,

तेल शेंदूर अर्पण.

माळ रुईच्या पानांची,

भक्ती भावे समर्पण.४०

*

असा बजरंग बली,

बलोपासनेचे धाम.

होई हजर सत्वर,

उच्चारता राम नाम…!४१

*

कविराजे ‌वर्णियेला

यथाशक्ती हनुमान

शब्द शारदा पुरवी

अनुभूती वरदान..!४२

☆

© कविराज विजय यशवंत सातपुते

सहकारनगर नंबर दोन, दशभुजा गणपती रोड, पुणे.  411 009.

सौ विजया कैलास हिरेमठ

 कवितेचा उत्सव 

☆ “विश्वास…” ☆ सौ विजया कैलास हिरेमठ ☆

☆

दिवसामागून दिवस जातात

ऋतू मागून ऋतू सरतात

प्रत्येकासाठी ते सारखेच असतात

तरीही वेगवेगळे का भासतात….

*

कधी हवेहवेसे कधी नकोसे

दिवस नसतात सगळे सारखे

नाही पाहत आपण जसेच्या तसे

म्हणूनच होतो सुंदरतेस पारखे….

*

एकच ऊर्जा सगळीकडे

सर्वांसाठी सारेच खुले

आपल्यालाच असते कोडे

काय आणि किती निवडावे…

*

खरे तर काहीच नसते अवघड

आपलीच असे आपल्यासाठी निवड

दृष्टीकोन असतो ज्याचा त्याचा

जग दुनियेकडे पाहण्याचा…..

*

अगाध, अथांग, अपरंपार

परमेश्वर देत आहे अपार

मानूया त्याचे मनापासून आभार

विश्वास हाच जगण्याचा आधार….

☆

शब्दकळी विजया  

©  सौ विजया कैलास हिरेमठ

पत्ता – संवादिनी ,सांगली

मोबा. – 95117 62351

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्रीमती उज्ज्वला केळकर

 कवितेचा उत्सव 

☆ मीच ओलांडले मला ☆ श्रीमती उज्ज्वला केळकर ☆

☆

मीच ओलांडले मला

जेव्हा तुझी सय आली.

तुझ्या पाऊस स्पर्शाने

काया झाली मखमली

*

मीच ओलांडले मला

मन जेव्हा मळभले

एका प्रकाश-किरणी

मळभ विरुनिया गेले.

*

मीच ओलांडले मला

चांदण- चकव्याची भूल

पडे विसर घराचा

पाय कुठे ग नेतील?

*

मीच ओलांडले मला

आले तुझिया चरणी

देई देई रे आसरा

आता मला चक्रपाणी

☆

© सौ. उज्ज्वला केळकर

संपर्क – निलगिरी, सी-५ , बिल्डिंग नं २९, ०-३  सेक्टर – ५, सी. बी. डी. –  नवी मुंबई , पिन – ४००६१४ महाराष्ट्र

मो. 836 925 2454, email-id – kelkar1234@gmail.com 

≈ संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈

श्री अनिल वामोरकर

 कवितेचा उत्सव 

☆ जीवनगाणे… ☆ श्री अनिल वामोरकर ☆

☆

वाटेला आलेले

जगलो जीवन

आव्हाने पेलीत

चालत राहीलो..

*

निवांत क्षणी

भूत आठवला

हळूच हसलो गाली

पण होतो कधी रडलो..

*

बसलो सुसज्ज अशा

मखमली सोफ्यावर

आठवले मज मग

लोखंडी खुर्चीत बसलेलो..

*

पुर्ण बाहीचा सदरा

सुखावह स्पर्ष तो

भयावह ते दिवस

का उगा आठवित बसलो…

*

गुणगुणतो गाणे

माझेच वाटे मजला

दुखभरे दिन बितेरे भैया

अब सुख आयो रे

रंग जीवन मे नया अब आयो रे…

☆

© श्री अनिल वामोरकर

अमरावती

≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित  ≈

सौ. ज्योती कुळकर्णी 

 कवितेचा उत्सव 

☆ खरे सुख… ☆ सौ. ज्योती कुळकर्णी ☆  

(आनंदकंद)

☆

पैशात मोजलेले असते खरेच सुख का

दारिद्र्य शिकविते ते नसते खरेच सुख का

*

बापास कष्ट पडती पण लेक आयतोबा

खाऊन मेद वाढे फसते खरेच सुख का

*

शेतात राबतो अन कष्टास तोड नाही

पाहून पीक हिरवे कसते खरेच सुख का

*

मिळतेय वारसांना आज्यास कष्ट पडले

भांडून भाग मिळतो डसते खरेच सुख का

*

भाग्यात खूप होते ताटात सांडले पण

झोळीच फाटकी जर हसते खरेच सुख का

 ☆

© सौ. ज्योती कुळकर्णी

अकोला

मोबा. नं. ९८२२१०९६२४

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री वर्षा बालगोपाल

  चित्रकाव्य  

सोनसळी खेळ    सुश्री वर्षा बालगोपाल ☆

☆

सुवर्ण बिंबाचा दिसताच

मोह पडे सकल विश्वाला

सुवर्ण उधळी माथ्यावर

पाखरे करूनी गलबला॥

*
परीस आहे का हा अरुण

शंका येतसे भाबडी भोळी

परीस परीसाच्या जादूई 

स्पर्शे परिसर सोनसळी॥

*

मल्हार आळवत सकल

आसमंत पहा भारावले

मल्हार प्रसिदण्या का कोणी

बेल भंडार हे उधळले॥

*

पितांबर नेसे नारायण

अर्घ्य अवनीचे स्विकारण्या

पिता अंबर माता धरती

हस्तांदोलनी ये पक्षी गाण्या॥

*

खेळ कोणता खेळते सृष्टी

अंदाज नाही येत सांगता

खेळ मना कल्पना विलासी

सुरुवातीस या ना सांगता॥

☆

© सुश्री वर्षा बालगोपाल

मो 9923400506

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈