श्री अशोक श्रीपाद भांबुरे
अशोक भांबुरे जी यांची कविता अभिव्यक्ती # 232
☆ दोन्ही किल्ले ☆ श्री अशोक श्रीपाद भांबुरे ☆
☆
नारी मुक्ती नारी मुक्ती गर्जत होते
मुक्त मनाने वावरले की बडवत होते
*
का काट्यांनी फुलाभोवती केले कुंपण
कळीस तर ते डोक्यावरती चढवत होते
*
स्त्री जातीच्या वाटा विस्तृत केल्या ज्यांनी
त्या वाटेवर महिलांना मी वळवत होते
*
जगापुढे या सावित्रीच्या लेकी याव्या
म्हणून नारी शक्तीला मी घडवत होते
*
शुभ्र पांढरी लोकर वाटे ती डोळ्यांना
शीत कड्यांचे समोर मोठे पर्वत होते
*
वाऱ्यासोबत धावत सुटलो आम्ही साऱ्या
ते हाताने सुगंध आता अडवत होते
*
बेड्या हाती पडल्यावरही कुठे थांबले
घर व नोकरी दोन्ही किल्ले लढवत होते
☆
© श्री अशोक श्रीपाद भांबुरे
धनकवडी, पुणे ४११ ०४३.
मो. ८१८००४२५०६, ९८२२८८२०२८
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
– मी तो भ्रमर… – 
