Category: कवितेचा उत्सव 2

श्रीशैल चौगुले

 कवितेचा उत्सव 

☆ आषाढ सुख… ☆ श्रीशैल चौगुले ☆

ऊधळावा अबीर  गगनातला बुका

गजर  ज्ञान-तुका   पावसातली वारी.

आषाढाचे अभंग  टाळ-चिपळी वारा

वृक्ष-वल्लरी दारा  सृष्टीशृंगारे न्यारी.

भक्त-थोर सकळ  पामराचे अंगण

वाखरिचे रिंगण  स्वर्गापरी पंढरी.

हसू आनंदी मुखी  चंद्रभागा ऊजळे

पाप कर्माचे ढळे  पवित्र निरभावे.

ऐसा सुखाचा योग  पाही विठ्ठले डोळा

सारे पाहुनी भोळा  चैतन्याचा पुतळा.

© श्रीशैल चौगुले

९६७३०१२०९०

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री हरिश्चंद्र कोठावदे

 कवितेचा उत्सव 

☆ पाऊस… ☆ श्री हरिश्चंद्र कोठावदे ☆ 

(वृत्त : पादाकुलक)

विजेत वाजत ढगात गाजत

नाचत नाचत पाउस आला

भिरभिर भिरभिर वारा ओला

गंध मातिचा उधळत आला !

 

टपटप टपटप थेंब टपोरे

झरझर झरझर कौलारांवर

ढोल नि ताशा बडवत येती

धडधड  धारा अन् पत्र्यांवर !

 

चिंब तरुंवर चिंब पाखरे

फडफड फडफड पंख पसरती

निथळत निथळत दुजा पाखरां

पुन्हा एकदा चिंब भिजवती !

 

पहिलावहिला पाउस उत्कट

सहस्र हस्ते धरेस कवळी

अशा बरसती धो धो धारा

जन्मांतरिचे वणवे विझती !

 

सूंसूं सूंसूं सुसाट वारा

रानोरानी पानोपानी

रुद्रविणांच्या छेडित तारा

करीत गुंजन दरीदरितुनी !

 

खळखळ खळखळ झरे वाहती

वाहत वाहत वाटा जाती

जलथल जलथल जिकडे तिकडे

चराचरा ये अपार भरती !

 

गल्लोगल्ली पोरेसोरे

भिजती न्हाती ब्रह्मानंदी

नाचत थुइथुइ मोर वनीचे

जणु स्वच्छंदी छंदीफंदी !

 

भिजल्या भेगा भग्न भुईच्या

बळिराजाही सुखी होवु  दे

नष्टचर्य हे संपो , बाप्पा

दिवस सुगीचे पुन्हा येवु दे !

© श्री हरिश्चंद्र कोठावदे

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री राजकुमार दत्तात्रय कवठेकर

 कवितेचा उत्सव 

☆ काही कविता… ☆ श्री राजकुमार कवठेकर ☆

गरगरणारा पतंग

विसावला झाडाच्या फांदीत..

दुखावलेल बाळ जणू आईच्या कुशीत…

           ***

 

उगमापाशी पाणी

हसत पळतय खळखळून…

त्याला काय माहित पुढे काय ठेवलंय वाढून..

          ***

 

उजाड माळरानावर

पाहिलं एका गवतफुलाला….

तेवढाच विसावा रखरखत्या डोळ्याला..

         ***

 

डेरेदार वृक्ष

दिवसा किती वाटतो सुंदर…

तोच तीन्हीसांजेनंतर वाटतो भयंकर…

         ***

 

घर उघडत नाही खिडकी

सहन करुनही वाऱ्या.. पावसाचे वार…

जणू माझ्या बंद मनाचे दार…

          ***

 

दमलेलं पाखरू

क्षणभर फांदीवर विसावलं….

उडून जाताना त्यानं वळुन नाही पाहिलं ….

          ***

 

तळ्यातलं आकाश अन् डोक्यावरचं

यातला फरक पक्ष्याला कळतो….

तो हवेतच झेपावतो….

          ***

 

वेलीला मांडव काय

अन् झाड काय…

काटेरी कुंपणावरही कसा तरारून चढलाय…

         ***

 

बाळाला झोपवून

ओसरीवर आले…

तर ‘मनी’चे पिल्लू पायाशी घोटाळले…

          ***

 

कुहुकते कोकीळा

म्हणून खिडकी उघडली…

गच्च मोहरलेली बाग दिसली…..

      ***

© श्री राजकुमार दत्तात्रय कवठेकर

संपर्क : ओंकार अपार्टमेंट, डी बिल्डिंग, शनिवार पेठ, आशा  टाकिज जवळ, मिरज

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

 कवितेचा उत्सव 

☆  द्रौपदी, कालची व आजची… ☆ श्री रवींद्र पां. कानिटकर ☆

पूर्वी एक द्रौपदी अपमानित होती

आज एक द्रौपदी सन्मानित आहे

 

पूर्वी एक द्रौपदी अगतिक होती

आज एक द्रौपदी जागतिक आहे

 

पूर्वी एक द्रौपदी अबला होती

आज एक द्रौपदी सबला आहे

   

पूर्वी एक द्रौपदी द्युतात हरली

आज एक द्रौपदी मानाने जिंकली

© श्री रवींद्र पां. कानिटकर

२२/७/२०२२

सांगली

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री शामसुंदर महादेवराव धोपटे

 कवितेचा उत्सव 

☆ जिव्हाळा… ☆ श्री शामसुंदर महादेवराव धोपटे ☆

विवाहा नंतर

प्रथमच आली ती माहेरी

आली तशी वळली तिच्या खोलीकडे

मी पाहिली तिची अवस्था

न्याहळते ती आपले जुने विश्व

तिचे कपाट, टेबल, पुस्तके आणि पलंग

आहे तिथेच पहिल्याप्रमाणे

पण काहीतरी हरविल्याची भावना

जाणवतेय तिच्यात

वस्तू रूपाने सर्व आहे तसेच

पण तो अधिकाराचा ओलावा

सुकला का परंपरांच्या तापाने

की दुरावल्याची सूचना करताहेत

त्या तिला

की असून नसल्याचा संदेश देताहेत तिला

ती पुढे सरकली,

फिरवते हात प्रत्येक वस्तुवरून

नी मानतेय आभार दिलेल्या प्रेमाचे,

समर्पनाचे, निरागस कृतज्ञतेने

मी तटस्थ येणे पाहात होतो

एकाच रोपट्याच दुसऱ्यांदा रुजन नी सोसन.

©  श्री शामसुंदर महादेवराव धोपटे

चंद्रपूर,  मो. 9822363911

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री प्रमोद वामन वर्तक

 कवितेचा उत्सव  

🙏 विनवणी ! 🙏 श्री प्रमोद वामन वर्तक  

खळ नाही आभाळाला

अविरत धरली धार

ओल्या दुष्काळाचे सावट

करू लागे मनी घर

 

घे उसंत आता जराशी

नदी नाल्या आले पूर

वावरात शिरे पाणी

तोडूनिया त्याची मेर

 

धीर सुटे बळीराजाचा

पाणी डोळ्याचे खळेना

उघड्या डोळ्यांनी पाहे

पेरणीच्या शेताची दैना

 

कर उपकार आम्हावर

पुन्हा एकदा विनवितो

भाकर तुकडा लेकरांचा

सांग कशास पळवतो ?

© श्री प्रमोद वामन वर्तक

दोस्ती इम्पिरिया, ग्रेशिया A 702, मानपाडा, ठाणे (प.)

मो – 9892561086

ई-मेल – [email protected]

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ.मंजुषा आफळे

 कवितेचा उत्सव 

☆ ओल्या चिंब तुझ्या हाका… ☆ सौ. मंजुषा आफळे ☆

ओल्या चिंब तुझ्या हाका

धावत वारीला आलो

विठू तुझ्या दर्शनाने

जन्म भरून पावलो

 

ओल्या चिंब तुझ्या हाका

दुःख विसरून गेलो

तहान भूक तूच रे

आज समजून गेलो

 

ओल्या चिंब तुझ्या हाका

ऊन पाऊस भेटीला

भजनात दंग झालो

आनंद होई जीवाला

 

ओल्या चिंब तुझ्या हाका

सर्वांभूती तू ईश्वर

विसर ना पडो कधी

हा देह आहे नश्वर

 

ओल्या चिंब तुझ्या हाका

प्रेमळ तो आशीर्वाद

भावाचा रे तू भुकेला

आम्हा कृपेचा प्रसाद

 

ओल्या चिंब तुझ्या हाका

पुनीत होई पंढरी

नाम तुझे घेता देवा

धन्य होई वारकरी.

© सौ.मंजुषा सुधीर आफळे

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈