Category: कवितेचा उत्सव 2

सौ. गौरी सुभाष गाडेकर

 

☆ कवितेचा उत्सव ☆ नकळत ☆ सौ. गौरी सुभाष गाडेकर ☆

सकाळी पळत

संध्याकाळी  पळत

डोळ्यापुढे दिसतेय

कामाची चळत

 

दिवस आला कसा

दिवस गेला कसा

वेळ कुठे गेला

काही नाही कळत

 

काटे चालले भरभर

वाटी भरते झरझर

वाळूची धार राही

संतत गळत

 

कुठे गेल्या हसणाऱ्या

सया कधी रुसणाऱ्या

कालच तर होतो आम्ही

खिदळत खेळत

 

अचानक असा

समोर आरसा

आरशातल्या ‘मी’शी

मी नाही जुळत

 

केस कधी पिकले,

शरीर कधी थकले

काळ माझ्यापुढे

मी काळापुढे पळत

 

© सौ. गौरी सुभाष गाडेकर

संपर्क –  1/602, कैरव, जी. ई. लिंक्स, राम मंदिर रोड, गोरेगाव (पश्चिम), मुंबई 400104.

फोन नं. 9820206306

≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित  ≈

 ☆ कवितेचा उत्सव ☆ टर्निंग पॉईंट जीवनाचा ☆ सौ.अश्विनी कुलकर्णी ☆ 

धक्का देणारा, विषन्न करणारा ।

सहज होत्याचे नव्हते करणारा ।

सुंद नि सर्व अस्थिर करणारा ।

चालते बोलते प्रेत  बनवणारा ।

कळायचे,वळायचे बंद करणारा ।

भयाण काळ ,जणू फणा नागाचा ।

टर्निंग पॉईंट जीवनाचा ।।1।।

 

सर्वांच्या आयुष्यात उद्भवणारा ।

त्रासिक नि चिंताग्रस्त बनवणारा ।

निर्णयक्षमता शून्य करणारा ।

सुरळीत जीवनात वादळ उठवणारा ।

भविष्याचे प्रश्नचिन्ह दाखवणारा ।

दरी म्हणावी की डोंगर अडथळ्यांचा?

टर्निंग पॉईंट जीवनाचा  ।।2।।

 

पण,हाच टर्निंग पॉईंट जीवनाचा ।

घेता क्षणाचा निर्णय सकारात्मकतेचा ।

कधी ठरतो मिरॅकल जीवनाचा ।

रस्ता अडथळ्यांचा आव्हानांचा ।

‘पण’ लागतो चिकाटीचा, स्पर्धा हेलकाव्यांशी ।

युद्ध करावे आपणच, सहज न सरणाऱ्या या दिसांशी ।

विविध धड्यातून सुंदर मिळेल मार्ग,

करता मैत्री टर्निंग पॉइंटशी ।

 

© सौ अश्विनी कुलकर्णी

सांगली  (महाराष्ट्र)

मो – 9421225491

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित  ≈

सुश्री दीप्ती कुलकर्णी

 ☆ कवितेचा उत्सव ☆ सोनेरी सकाळ ☆ सुश्री दीप्ती कुलकर्णी ☆ 

सोनेरी सकाळ

ही धरित्री अशी

साज हिरवा ल्यायली

धुंद गंधित होऊनी

प्रतिक्षेतच हरवली

कोण हे आले पहा

रविकर हा येतसे

सुस्नात या धरित्रीला

कनकसाज चढवितसे

हा सुगंध, ही हवा

मोहिनी मज घालिते

गंधवेड्या माझ्या मना

प्रतिदिनी निमंत्रिते

रोजचेच रुपडे हे

नित्यनवे भासते

काळोख्या रात्रीतुनी

उषःप्रभा ही जन्मते.

 

© सुश्री दीप्ती कुलकर्णी

कोल्हापूर

≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित  ≈

☆  कवितेचा उत्सव ☆ स्त्री ☆ श्री अनंत नारायण गाडगीळ  ☆ 

(- अनंता.)

तू जन्मलीस

बाळ होतीस

 

मुलगी झालीस

तरुणी बनलीस

 

पत्नी झालीस

एक नवा जीव

जन्माला घातलास

 

आई बनलीस

अनुभव घेतलास

 

माया लावलीस

माणूस घडविलास

 

तू तर सर्वांनाच

जीव लावलास

 

कष्ट अपार केलेस

जीवन सार्थ केलेस

 

वंदनीय तू झालीस

जीवनाधार झालीस

 

आ म्हणजे आत्मा

ई म्हणजे ईश्वर

आई म्हणून तू

आत्मा ईश्वराचा

भूतलावर आणलास

पांग कसे फेडावे

स्त्रीचे ते कळेना

काय म्हणून करावे

काहीच ते वळेना!

 

© श्री अनंत नारायण गाडगीळ

सांगली.

मो. 92712 96109.

≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित  ≈

कवी श्री वैभव जोशी

☆ कवितेचा उत्सव ☆ माझा काळ गेला आणि तुझी वेळ गेली – कवी श्री वैभव जोशी ☆ सौ. ज्योत्स्ना तानवडे

कशासाठी आता पुन्हा भेटायाचे सांग

देणे घेणे उतू गेले फिटले ना पांग

आता कशी श्वासांवर  लावायाची बोली

माझा काळ गेला आणि तुझी वेळ गेली

 

कधीकाळी होते इथे एक गर्द रान

एका बहराची ज्याने मिरवली आण

सरूपाला अरुपाची जाहली सवय

तेंव्हाचे हे भय ज्याचे झाले आता वय

एका खिळ्यासाठी कुणी जोपासावी ढोली

माझा काळ गेला आणि तुझी वेळ गेली

 

आता माझ्या प्रार्थनेत तेवढा ना पीळ

आणि तुझ्या निळाईत नाही घननीळ

मंदिराच्या मंडपात मशिदीचा पीर

जीव ऐलतीर आणि डोळे पैलतीर

कोरड्या पात्रात उभी आठवण ओली

माझा काळ गेला आणि तुझी वेळ गेली

 

– कवी श्री वैभव जोशी

चित्र – साभार फेसबुक वाल

श्री तुकाराम दादा पाटील

 ☆ कवितेचा उत्सव ☆ गुंता…. ☆ श्री तुकाराम दादा पाटील ☆ 

मला कळाले ख-या सुखाला किती आसरा उन्हात आहे

तरी तसेही चंद्र चांदणे तुझ्या नि माझ्या मनात आहे.

 

कुणी नभाच्या आसपास या फिरेल तेव्हा कळेल त्याला

माया ममता लळा जिव्हाळा किती साठला नभात आहे

 

टपोरलेल्या कुंदकळ्यांचा गंध सुगंधी कळून आला

अवतीभवती फिरतो भुंगा गातो गाणे सुरात आहे

 

वचन कुणाला कुणी द्यायचे ज्याचा त्याचा असे मामला

शब्द दिलेला निभावण्याची रीत खरी या जगात आहे

 

सुटायचातो सुटेल अंती तुझ्या मनाचा अवघड गुंता

लढणे कुढणे धडपडणे तर अविरत चालू उरात आहे

 

फसवाफसवी करत जगाची फुकटपासरी जगू लागले

समाज वेडा बांडगुळांची एक पोसतो जमात आहे

 

मना मारुनी जगता जगता या देहाचे झिजते चंदन

कष्टाची पण गोड चवीची एक भाकरी घरात आहे.

 

©  श्री तुकाराम दादा पाटील

मुळचा पत्ता  –  मु.पो. भोसे  ता.मिरज  जि.सांगली

सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३

दुरध्वनी – ९०७५६३४८२४, ९८२२०१८५२६

≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित ≈