Category: कवितेचा उत्सव 2

सुश्री वर्षा बालगोपाल

  चित्रकाव्य  

झुल्यावरी   सुश्री वर्षा बालगोपाल ☆

☆

अशी झोकात झुलते झुल्यावरी 

तनाचा झोका येई मनावरी |

मन हे धावे म्होर पाठी 

वर खाली ते होतंय उरी||

*

 मोद झुळूक अंगावरी

भय मग दावी कशापरी|

मिटले नयन घट्ट तरी

खळबळ का हात धरी ||

*

दोलायमान होई क्षिती

चंद्र सूर्य ते घ्यावे करी |

आनंदाच्या या लहरीवरी

हेलकावे ते कितीतरी ||

*

झाकोळ येई नेत्रा म्होरी 

झंकारे वीणा कशी शिरी|

झोक हा जाई भूमीवरी

सावर तू मला येते घेरी ||

*

पाठीशी उभा तू माझ्या राही 

हळूच कर तो धरसी करी|

तुझ्या सवे या हिंदोळ्यावरी

मनात उठती भाव सरी ||

☆

© सुश्री वर्षा बालगोपाल

मो 9923400506

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

प्रा डॉ जी आर प्रवीण जोशी

 कवितेचा उत्सव 

☆  गौर गणेश भोजन… ☆ प्रा डॉ जी आर प्रवीण जोशी ☆

☆

भक्त देती तुज आमंत्रण

 ये गौराई करावे भोजन ।। धृ ।।

*

सडा रांगोळी दारी घातली

शुभ चिन्हानी पुलकित झाली 

सजले अंगण बांधून तोरण 

 ये गौराई घ्यावे भोजन ।। 1 ।।

*

महिरपी तो मंडप सजला

मन्त्र उच्चारव गगनी भिडला

पंचपक्कवाने नैवेद्य मांडीला

 फिटले पारणे धन्य ते लोचन

 ये गौराई घ्यावे भोजन ।। 2 ।।

*

 रौप्य जडीत तुझे आसन 

 भरजरी नेसवुन पितवसन

 पक्वान्ने ते ताट सजवून

  संतुष्ट मनाने करावे ग्रहण

 ये गौराई घ्यावे भोजन  ।। 3 ll

*

सकळ कळांची माय गाथा

तुझ्या चरणी विनम्र माथा

सर्व सृष्टीची तूच त्राता 

तुझ्या कृपेला करुनी वंदन

 तृप्त होऊनी घ्यावे भोजन ।। 4 ।। 

☆

© प्रो डॉ प्रवीण उर्फ जी आर जोशी

ज्येष्ठ कवी लेखक

मुपो नसलापुर ता रायबाग, अंकली, जिल्हा बेळगाव कर्नाटक, भ्रमण ध्वनी – 9164557779 

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

डॉ. सोनिया कस्तुरे

 कवितेचा उत्सव 

☆ हे नराधमा… ☆ डॉ.सोनिया कस्तुरे ☆

☆

हे नराधमा..

हिंमतीने वादळ झेलणारी ती

 जन्माला येईलच 

मुलीला जन्माला घालू नये

म्हणणारी पळपुटी ती नाही

ती पुन्हा तिला जन्माला घालेल

*

तू तिच्यावर बलात्कार केलास,

पण जिद्दीने परत

तिने स्वतःला उभे केले

*

तू अॕसिड फेकून

तिचा चेहरा विद्रुप केलास,

पण जिद्दीने परत

तोच चेहरा घेऊन…

तिने स्वतःला उभे केले

*

जेव्हा तुला कळली तिची जिद्द 

तू अत्याचार करुन तिला संपवलेस

अनेकदा जाळून टाकलेस 

*

आता मात्र कहर होत चालला 

सामूहिकतेने बलात्कार करून 

विकृतीलाही लाजवेल

अशी निर्घृण, अमानवी, पाशवी

कृती करून काय मिळवतोस.. ?

*

तू कसा विसरतोस रे मुर्खा

तिच्याशिवाय तू नाहीस 

तिच्याच पोटचा जन्म तुझा ?

*

पण लक्षात ठेव

याच राखेतून ती स्वतःला 

पुन्हा उभी करेल…

अनेक उभ्या राहतील

तुझ्या वृत्तीला संपवायला.

*

तिने तुला जन्माला घातलंय,

तिने तुला वाढवलंय पोटात

तू तिला वाढवले नाहीस

हे तू कदापि विसरु नकोस..

*

तुझ्या मागे कितीही असू देत हात 

विकृत, मतलबी, स्वार्थी 

सत्ता लाचारीत बरबटलेले

तुला संपवायलाही ती आता

मागे-पुढे पाहणार नाही…

*

तिने ठरविलेच तर 

तुझा जन्म नाकारु शकते 

पण ते कसे चालेल हे जाणून,

ती तसे करणार नाही.

*

आता बस्स

Enough is enough

वृत्ती तुझी कळली तर

आई म्हणून 

घरीच तुला ठेचेल वा

करेल तुला पोलिसांच्या हवाली..

*

तोडून टाकेल ती

तुझे अत्याचारी हात आणि लिंग..

ज्याच्या जोरावर म्हणवत होतास 

स्वतःला मर्द

तुझ्या पाशवी वृत्तीची शिक्षा 

का सोसावी इतरांनी… ?

*

झालीच कायद्याची अडचण तर

घालेल तुला गोळ्या

पूर्ण आरपार…

*

लक्षात ठेव.

“ती” च तुला संपवेल,

पण पद्धत तिची वेगळी असेल..

*

तू हे विसरू नको

ती घाबरट वा भित्री नाही

हिंमतीने वादळ झेलणारी

सावित्री-ज्योतिबाची लेक ती

पुन्हा जन्माला येईल 

ती पुन्हा तिला जन्माला घालेल.. !

☆

© डॉ.सोनिया कस्तुरे

विश्रामबाग, जि. सांगली

भ्रमणध्वनी:- 9326818354

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ.रेणुका धनंजय मार्डीकर

 कवितेचा उत्सव  

☆ मोरपंखी साज ल्याला माझा गणराज ☆ सौ.रेणुका धनंजय मार्डीकर ☆

☆

मोरपंखी साज ल्याला माझा गणराज

आरतीचा मंजुळ स्वर निनादतो आज॥धृ. ॥

*

तुंदिल तनु गोंडस ती मुर्ती साजिरी

नेत्र कमल प्रेममयी दिसती गोजिरी

सुखकर्ता दुःखहर्ता माझा गणराज

आरतीचा मंजुळ स्वर निनादतो आज

*

मखराची शोभा ती श्वेतवर्णी साजरी

माउलीचे प्रेम देई मुर्ती किती हासरी

पुष्पहार दुर्वांकुर मौक्तिक माला साज

आरतीचा मंजुळ स्वर निनादतो आज 

*

सुंदरते रूप मना मोहविते असे

मोरपंख नाजूकसे भोवती शोभतसे

थड थड थड ताशाचा वाजतसे गाज

आरतीचा मंजुळ स्वर निनादतो आज

*

मंगलमूर्ती आले विघ्न हराया

मनामध्ये अवघा आनंद भराया

पार्वतीच्या नंदना स्वागत गणराज

आरतीचा मंजुळ स्वर निनादतो आज

☆

सुश्री वर्षा बालगोपाल

  कवितेचा उत्सव 

☆ || गणेश प्रार्थना || ☆ सुश्री वर्षा बालगोपाल ☆

☆

हस्त वदन तू लंबोदर 

वंदन तुला सर्वागोदर 

हस्त तुझ्या कृपेचा राहूदे 

अखंड माझ्या या डोईवर ||

*

हे विघ्नहर्त्या, विश्व नायका 

विनंती माझी ऐका बरका 

हे विश्व शांती सौख्याने नांदो 

वर मिळावा वर दायका ||

*

कर जोडूनी तुला सांगते 

सक्षम नारी व्हावी वाटते 

कर आता तूच जादू काही 

अभयदान तुला मागते ||

*

पद तुझे रे मी ना सोडीन 

श्वासासवे तुलाच स्मरेन 

पद तुझ्या या ध्येयासक्तीचे 

अविरत ओठी आळवीन ||

*

जपा उरी गणेश सर्वदा 

स्मरणाने सरती आपदा 

जपा कुसूम दुर्वा वाहून 

मिळविते निखळ प्रमोदा ||

*

अभंग, गाणी, ओवी लिखाणा 

स्फूर्ती द्यावीस विद्या दायका 

अभंग राहील स्रोत स्तुतीचा 

वचन तुला भव तारका ||

☆

© सुश्री वर्षा बालगोपाल

मो 9923400506

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री सुहास सोहोनी

 कवितेचा उत्सव 

 

☆ “फक्त एक सद्गुरू हवा…“ ☆ श्री सुहास सोहोनी ☆

☆

राम हवा मज, कृष्ण हवा

अन् पंढरिचा विठुराय हवा

शिवहि हवा, गणराज हवा

अन् जेजुरीचा मल्हार हवा

*

ब्रह्म तसा विष्णूही हवा

अन् कश्मिरचा मार्तंड हवा

दक्षिणस्वामी कार्तिकेय अन्

करविरचा ज्योतिबा हवा

*

कालीमाता हवीच मजला

वंगदेशिची जी जननी

तुळजापुरची माय भवानी

जगदंबा यावी सदनी

*

सानसानुला मन गाभारा

ठेवु कुठे इतुक्या देवा

त्यापरि देइल क्षेम कुशल जो

फक्त एक सद्गुरू हवा…

☘️

© सुहास सोहोनी

रत्नागिरी

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर

श्री आशिष  बिवलकर

  चित्रकाव्य  

– विसर्जन…–  ☆ श्री आशिष  बिवलकर ☆

☆

गौरी महालक्ष्मी | झाले आगमन |

सुखावले मन | सणासुदी ||१||

विदर्भात लक्ष्मी | कोकणात गौरी |

येती घरोघरी | आगत्याने ||२||

माहेर वाशीण | सोन पावलांत |

आली आनंदांत | भेटावया ||३||

महालक्ष्मी गौरी | अखंड सावध |

असुरांचा वध | रक्षणासी ||४||

गौराई सजते | विविध रूपात |

वसे मखरात | आशिर्वादा ||५||

सुवासिनी हाती | मंगल पूजन |

नैवेद्य भोजन | भक्तीभावे ||६||

डोळे पाणावती | येता विसर्जन |

विराहत मन | निरोपासी ||७||

☆

© श्री आशिष  बिवलकर

बदलापूर

मो 9518942105

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ. वृंदा गंभीर

 कवितेचा उत्सव 

☆ सार्वजनिक गणपतीची प्रेरणा… ☆ सौ. वृंदा गंभीर ☆

☆

होता ब्रिटिशांचा काळ 

भारतीय होते पारतंत्र्यात 

आली होती गुलामीची वेळ 

ठिणगी पेटली स्वातंत्र्याची मनात 

*

काय करावे कसे होईल 

देश स्वतंत्र करण्यासाठी 

कोण कसे साथ देतील 

सेवक राहतील उभे पाठी 

*

झेंडा घेतला हाती तरुणांनी 

फिरू लागले गावोगावी 

माफी मागितली लोकांनी 

जसे आहे आम्हा तसे ठेवी 

*

टिळक आले सोलापूरला 

आजोबा गणपतीची आरती 

सुरु झाली प्रचंड गर्दी जमली 

लोक आरती करून प्रसाद घेती 

*

प्रेरणा मिळाली टिळकांना 

विचारचक्र सुरु झाले मनात 

गणेश उत्सव सुरु करून 

स्वातंत्र्य मिळवू एकमत 

*

सुरु केला गणेश उत्सव 

जमू लागले भाविक फार 

टिळकांनी जनतेचा घेतला ठाव 

बदलले जनतेचे विचार 

*

झाला स्वातंत्र्यासाठी संघर्ष 

प्रेरणा मिळाली सोलापुरातून 

उत्साहात होते बाप्पाचे आगमन 

घराघरात बसती बाप्पा येऊन 

 – दत्तकन्या

☆

© सौ. वृंदा गंभीर

न-हे, पुणे. – मो न. 8799843148

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈