मराठी साहित्य – कवितेचा उत्सव ☆ ते झाड ☆ श्री महेशकुमार गुंडाप्पा कोष्टी

By Hemant BawankarNo Comments

श्री महेशकुमार गुंडाप्पा कोष्टी

☆ कवितेचा उत्सव ☆ ते झाड…! ☆ श्री महेशकुमार गुंडाप्पा कोष्टी ☆ 

सरत्या वेळेला कवटाळत

ऊन पाऊस झेलत

मान डोलवत आजही

जागाच आहे बुंधा…

 

फांद्यांना अजून

नाही लागलं डोहाळं

नेहमीची जागा सोडून

वेगळं बस्तान बसवण्याचं…

 

त्या अजूनही गुरफटलेल्या

तशाच एकमेकीत

पानांतल्या हरितकणांच्या

ललाट रेषा आखत…

 

मूळांचं आधार देणं

आजही आहे सजग

मातीतल्या सगुणत्वाला

तारकापुंज दाखवत…

 

पाखरांची घरटी

आजही होतात स्थिरस्थावर

वडिलोपार्जित परंपरेच्या

चंदन भूमीवर…

 

आजतागायत फुलांनी

बहरणं नाही सोडलं

आतड्यांचं रितेपण

फळांनी नाही सोसलं…

 

भूकेला घास

जगण्याला श्वास

ही जपमाळ

जपतेच आहे झाड…

 

म्हणूनच आता झाडांचं

करावं लागेल गॅझेट

‘माणूस’ नावाच्या

नामावलीत,

माणूसपणाचा टक्का

सहस्रांच्या रेषा लांघत

ब्रम्हांडाचा दर्प होऊन

सूर्याला उजळण्यासाठी…

 

©  श्री महेशकुमार गुंडाप्पा कोष्टी

मिरज, जि. सांगली

मोबाईल : 9922048846

≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित ≈

Please share your Post !

Shares

मराठी साहित्य – साप्ताहिक स्तम्भ ☆ कवितेच्या प्रदेशात # 75 – बालमैत्रीण ☆ सुश्री प्रभा सोनवणे

By Hemant Bawankar1 Comment

सुश्री प्रभा सोनवणे

(आप  प्रत्येक बुधवार को सुश्री प्रभा सोनवणे जी  के उत्कृष्ट साहित्य को  साप्ताहिक स्तम्भ  – “कवितेच्या प्रदेशात” पढ़ सकते  हैं।)

☆ साप्ताहिक स्तम्भ – कवितेच्या प्रदेशात # 75 ☆

☆ बालमैत्रीण ☆

मला याद येते जुन्या त्या दिनांची

तिच्या  भोवती नित्य झेपावण्याची

सखी दूर गेली कशी काय आता

तिथे एक होता जिवाला विसावा

 

घराचे घराशी असे काय नाते

तिचे मैत्र वाटे जिवीच्या जिवाचे

तिथे त्या घराशी उभी एक जाई

तशी  माय वाटे मला पूर्ण आई

 

किती  स्वच्छ होती घरे अंगणेही

कुणी ना कुणाला उगा मात देती

मनाला मुभा नित्य संचारण्याची

स्वतःला स्वतःशी तिथे भेटण्याची

 

सखे मैत्रिणी मी तुला काय देवू

जुन्या  आठवांना नको हात लावू

मनीमानसी मी तुला पांघरावे

युगान्ती  वसावे तसेही जगावे

 

© प्रभा सोनवणे

“सोनवणे हाऊस”, ३४८ सोमवार पेठ, पंधरा ऑगस्ट चौक, विश्वेश्वर बँकेसमोर, पुणे 411011

मोबाईल-९२७०७२९५०३,  email- [email protected]

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित  ≈

Please share your Post !

Shares

मराठी साहित्य – कवितेचा उत्सव ☆ मागणे…. ☆ सुश्री मंजुषा सुनीत मुळे

By Hemant Bawankar2 Comments

सुश्री मंजुषा सुनीत मुळे

☆ कवितेचा उत्सव ☆ मागणे…. ☆ सुश्री मंजुषा सुनीत मुळे ☆ 

मागू का मी आज काही

सांग देवा तुजकडे

मागू की नाहीच मागू

आज पडले साकडे ……

 

हे हवे परी ते नको

हे नित्यची चालू असे

ऐकतोस की नाही तू

हेही मला ठावे नसे…..

 

आज एकची मागते

तू लक्ष दे माझ्याकडे

वृत्तीची निवृत्ती होवो

‘मीपणा‘ ने तुजकडे…

 

एव्हढे देशील तर

मी मागणे विसरेन

तव स्मरणी गुंगता

मी मलाच विसरेन ….

 

©  सुश्री मंजुषा सुनीत मुळे

९८२२८४६७६२

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित  ≈

Please share your Post !

Shares

मराठी साहित्य – कवितेचा उत्सव ☆ आजी… / गोष्ट ☆ श्री आनंदहरी

By Hemant BawankarNo Comments

☆ कवितेचा उत्सव ☆ आजी… /   गोष्ट  ☆ श्री आनंदहरी ☆

सोप्यातल्या कडीपाटावर बसून

सांगत राहायची आजी

गोष्टी

आम्हां भावा-बहिणींना कुरवाळत

रात्रीची जेवणं झाल्यावर..

कधी रामायण-महाभारतातील,

कधी जिजाऊ-शिवबाची

कोंडाण्याची,  पावनखिंडीची

कधी झाशीच्या राणीची

कधी सांगत राहायची

तिच्या बालपणीचे काही बाही

आठवणींच्या झुल्यावर झुलत

कुठंतरी दूर नजर लावून

जणू पाहत असल्यासारखी

स्वतःचाच बालपण, माहेर

काळोखल्या आकाशात

काळाचा पडदा दूर सारून

आपल्या डोईवरचा पदर सरळ करीत

नकळत थकल्या डोळ्यांना हळुवार पुसत

किंवा

कधी

गात राहायची अंगाई

आपल्या थरथरत्या मायाळू आवाजात

तिच्या आई-आज्जीने तिच्यासाठी गाईलेली

काळाच्या पल्याड जात..

 

आता

मी ही सांगत राहतो त्याच गोष्टी

आणि गोष्टी आजीच्या, माझ्या बालपणीच्या

गात राहतो तीच अंगाई

नातवंडांना जवळ घेऊन

माझ्या आजीच्या मायाळू हातानी कुरवाळत

 

पहात राहतो मनाच्या आकाशात

कालौघात हरवून गेलेले

ते घर, तो सोपा, तो कडीपाट,

आजी आणि ते दिवस

 

उद्या ती ही सांगतील गोष्टी कदाचित

आपल्या मुलाबाळांना, नातवंडांना

आजीची परंपरा जपत

 

तेंव्हा

माझीही झाली असेल एखादी गोष्ट

आजीसारखीच.

 

© श्री आनंदहरी

इस्लामपूर, जि. सांगली

भ्रमणध्वनी:-  8275178099

≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित ≈

Please share your Post !

Shares

मराठी साहित्य – साप्ताहिक स्तम्भ ☆ श्री अशोक भांबुरे जी यांची कविता अभिव्यक्ती # 74 ☆ अंधाराचे चित्र ☆ श्री अशोक श्रीपाद भांबुरे

By Hemant BawankarNo Comments

श्री अशोक श्रीपाद भांबुरे

☆ साप्ताहिक स्तम्भ – अशोक भांबुरे जी यांची कविता अभिव्यक्ती # 74 ☆  अंधाराचे चित्र ☆

अंधाराचे चित्र काढणे अवघड नाही

रंग एकला दुजा कुणाची लुडबुड नाही

 

मिसळुन गेले काळ्या रंगा तुझ्यात पाणी

ओठी त्याच्या फक्त तुझी रे दंगल गाणी

झुळझुळ टपटप अशी करत ते बडबड नाही

अंधाराचे चित्र काढणे अवघड नाही

 

केस रेशमी छान ब्रशाचे आहे काळे

काळ्या रंगा तुझेच त्यावर आहे जाळे

शांत पहुडला कोरा कागद फडफड नाही

अंधाराचे चित्र काढणे अवघड नाही

 

सूर्यावरती मात करोनी जमले ढग हे

शेतावरती तुटून पडले काळे ठग हे

कुणास येथे ऐकू आली गडगड नाही

अंधाराचे चित्र काढणे अवघड नाही

 

प्रवास आहे अखेरचा हा अंधारातुन

मार्ग शोधने अवघड नसते बिलकुल त्यातुन

ओझे नाही खांद्यावरती कावड नाही

अंधाराचे चित्र काढणे अवघड नाही

 

© अशोक श्रीपाद भांबुरे

धनकवडी, पुणे ४११ ०४३.

[email protected]

मो. ८१८००४२५०६, ९८२२८८२०२८

≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित ≈

Please share your Post !

Shares

मराठी साहित्य – कवितेचा उत्सव ☆ साप्ताहिक स्तम्भ – हे शब्द अंतरीचे # 26 ☆ गर्व नसावा… ☆ कवी राज शास्त्री

By Hemant BawankarNo Comments

कवी राज शास्त्री

☆ साप्ताहिक स्तम्भ – हे शब्द अंतरीचे # 26 ☆ 

☆ गर्व नसावा… ☆

गर्व नसावा, मानहानी होईल

गर्व नसावा, विनाकारण कलह होईल

 

गर्व नसावा, आपलेच घराचे वासे मोजतील

गर्व नसावा, स्व:कीय ते परके होतील

 

गर्व नसावा, अधोगती होईल

गर्व नसावा, जवळचे सर्व जाईल

 

गर्व नसावा, जगणे मुश्कील होईल

गर्व नसावा, पाणी पाजण्या कोणीच नसेल

 

गर्व नसावा, गर्वाचे घर खाली पडेल

गर्व नसावा, मृत्यू एक दिवस हमखास येईल

 

© कवी म. मुकुंदराज शास्त्री उपाख्य कवी राज शास्त्री

श्री पंचकृष्ण आश्रम चिंचभुवन, वर्धा रोड नागपूर – 440005

मोबाईल ~9405403117, ~8390345500

≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित ≈

Please share your Post !

Shares

मराठी साहित्य – कवितेचा उत्सव ☆ गझल – हौसच आहे ☆ सौ. गौरी सुभाष गाडेकर

By Hemant BawankarNo Comments

सौ. गौरी सुभाष गाडेकर

☆ कवितेचा उत्सव ☆ गझल – हौसच आहे ☆ सौ. गौरी सुभाष गाडेकर ☆

अज्ञाताची अशी असोशी हौसच आहे

सुखासीनता ठोकरण्याची हौसच आहे

 

नाकापुढती चालत जगणे सोपे तरीही

अवघड आव्हाने घेण्याची हौसच आहे

 

मृदुमुलायम पायघड्यांची वाट  सोडुनी

धोंड्यांमधुनी धडपडण्याची हौसच आहे

 

ऐषारामी नोकरीवरी लाथ मारुनी

रित्या खिशाचा कवी होण्याची हौसच आहे

 

नोकरीतली दगदग सरली निवांत जगणे

लष्करच्या रोट्या करण्याची हौसच आहे

 

शंभूधनुष्या बाण लावणे छंद असे हा

सूर्याचा गोळा गिळण्याची हौसच आहे

 

© सौ. गौरी सुभाष गाडेकर

संपर्क –  1/602, कैरव, जी. ई. लिंक्स, राम मंदिर रोड, गोरेगाव (पश्चिम), मुंबई 400104.

फोन नं. 9820206306

≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित  ≈

Please share your Post !

Shares

मराठी साहित्य – कवितेचा उत्सव ☆ मन-क्षेत्र ☆ सौ. उज्वला सुहास सहस्रबुद्धे

By Hemant BawankarNo Comments

सौ. उज्वला सुहास सहस्रबुद्धे

☆ कवितेचा उत्सव ☆ मन-क्षेत्र ☆ सौ. उज्वला सुहास सहस्रबुद्धे ☆

मनाच्या भूमीची,

भाजावण केली!

जलाच्या विरहात,

कोळपून गेली!

 

मनाची ही भूमी,

विचारांची पेरणी!

भावनेचे पाणी,

बीज अंकुरे झणी!

 

मन निर्मळ क्षेत्र,

बी असे निमित्तमात्र!

उगवेल मन चित्र,

वेल अंबरी जाईल!

 

मना नाही आधार,

राही अस्थिर, बेजार!

मनोवेलीला माझ्या,

फळे येती नाजूक फार!

 

मनाशी एकरूप,

देह आणि आत्मा!

त्यांच्या ठायी राही,

अक्षय परमात्मा!

 

© सौ. उज्वला सुहास सहस्रबुद्धे

≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित  ≈

Please share your Post !

Shares

मराठी साहित्य – कवितेचा उत्सव ☆ प्रवास ☆ सुश्री दीप्ती कुलकर्णी

By Hemant BawankarNo Comments

सुश्री दीप्ती कुलकर्णी

☆ कवितेचा उत्सव ☆ स्मृती यात्रा ☆ सुश्री दीप्ती कुलकर्णी☆ 

प्रवास  असाही न संपणारा

अज्ञान दूर सारणारा,

तिमिराला भेदणारा,

ज्ञानदीपाने तेजाळणारा.

 

विद्या,व्यासंग जपणारा,

चौसष्ट कला जोपासणारा,

कलापू्र्तीसाठी झटणारा.

 

मरगळ दूर लोटणारा,

मन प्रसन्न करणारा.,

लक्ष ज्योती प्रकाणारा.

 

मानवतेसाठी झगडणारा,

सहप्रवाशास जपणारा,

अक्षय आनंद लुटणारा.

 

 © सुश्री दीप्ती कुलकर्णी

कोल्हापूर

≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित  ≈

Please share your Post !

Shares

मराठी साहित्य – कविता ☆ सखी माझी तुळस ☆ श्रीमति उर्मिला उद्धवराव इंगळे

By Hemant BawankarNo Comments

श्रीमति उर्मिला उद्धवराव इंगळे

 

☆ साप्ताहिक स्तम्भ – केल्याने होत आहे रे ☆

??️  सखी माझी तुळस  ?️?

सखी माझी तुळशीमाई

तुला लाविते अंगणी!

रोज सकाळी नेमाने

घालिते गं तुला पाणी!!१!!

 

तिन्ही सांजेच्या वेळेला

दिवा तुला मी लाविते!

हळदीकुंकू वाहुनिया

औक्ष सर्वांना मागते !!२!!

 

दगडविटा आणुनिया

बांधिले मी वृंदावन!

अंगणात करिते रोज

रंगावली संमार्जन !!३!!

 

वृंदावनाच्या भोवती

बांधविला ओटा सुबक!

बसुनिया त्याच्यावरी

करिते मी हितगुज !!४!!

 

तुझ्या डोईवरल्या निळ्या

मोहकशा त्या मंजिऱ्या !

लेकीसुना नातीपणती

माझ्या साजिऱ्या गोजिऱ्या  !!५!!

 

माझ्या सोनियाच्या घरा

तुझ्यामुळे आली शोभा!

बाळकृष्ण तुझा सखा

हाती मुरली पुढे उभा !!६!!

 

भरजरी मुकुटावरी

शोभे त्याच्या मोरपीस!

नाही आला मुरलीरव

होई जीव कासावीस !!७!!

 

दिनांक:-२७-११-२०.

©️®️ श्रीमति उर्मिला उद्धवराव इंगळे

सातारा

≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित ≈

Please share your Post !

Shares