Marathi Kavita
सुश्री नीलांबरी शिर्के+
चित्रकाव्य
☆
कणीस दाण्याने भरले
दाणा दाणा टिपून घ्यावा
तृप्ती झाल्यावर आपसूक
उडून गगनी जाईल रावा
*
राव्यालाही माहित असते
चोच दिली तर आहे दाणा
संचय उद्याचा करीत नाही
मानवाहूनी पक्षी शहाणा
☆
© सुश्री नीलांबरी शिर्के
सौ. सुनिता गद्रे
☆ कवितेचा उत्सव ☆
☆ गणेश चतुर्थी… कवी – अज्ञात ☆ सौ. सुनिता गद्रे ☆
बसले होते निवांत
गणेश चतुर्थीचा विचार होता मनात.
काय करू कसं करू येत नव्हतं ध्यानात.
इतक्यात कोणीतरी डोकावलं देवघरातून,
म्हटलं “कोण आहे?”
तर म्हणे
“मी गणपती.काही सांगायचं आहे ऐकशील?”
“सर्व करणार तुझ्याचसाठी
मग सांग ना रे देवा !”
म्हणाला..
“येतो आहे तुझ्याकडे आनंदासाठी.
नका करू आता काही देखावा. नको त्या सोन्याच्या दूर्वा,
नको ते सोनेरी फूल,
नको तो झगमगाट,
त्रास होतो मला!
माझा साधेपणा, सात्विकता पार जाते निघून .
घे तुझ्या बागेतील माती
दे मला आकार.मी गोल मटोल
नाही पडणार तुला त्रास.
मग दे मला स्वच्छ पाट बसायला .
अनवाणी चाल गवतातून,
आण दूर्वा आणि फुलं दोन चार .माझ्यासाठी नको ओरबाडू झाडांचं सौंदर्य वारंवार .
माझ्या बरोबर
तुझ्याही आरोग्याची होईल वाटचाल.
दररोज साध्या
गरम जेवणाचा दे मला प्रसाद .
म्हणजे माझं आणि तुझं आरोग्य राहील साथ.
रोज पहाटे उठव मला तुझ्या ओंकारध्वनीने
संध्याकाळी दे मला मंत्रपुष्पांजली आणि
कर शंखनाद.
मग पावित्र्य आणि सोज्ज्वळता येईल
तुझ्या घरात व मनात.
मला विसर्जन पण हवं तुझ्याच घरात.
विरघळेन मी
छोट्या घागरीत पण.
मग मला पसरव तुझ्या बगिच्यात.
तिथेच मी थांबीन
म्हणजे लक्ष राहील तुझ्या घरात.
तू अडचणीत सापडलीस तर
येता येईल क्षणात.”
कवी : अज्ञात
सौ सुनीता गद्रे,
माधवनगर सांगली, मो 960 47 25 805.
≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित ≈
श्री रवींद्र सोनावणी
कवितेचा उत्सव
☆ पहाटे पहाटे… ☆ श्री रवींद्र सोनावणी ☆
☆
पहाटे पहाटे मला जाग आली,
तुझी याद ओल्या, सुगंधात न्हाली ।।ध्रु।।
*
वरी लाल आरक्त प्राची नवेली,
कुणी मुग्ध ललना, जणू लाज ल्याली,
समिरातूनी रंग शिंपीत गेली ।।१।।
*
जरी मध्यरात्री, तुझी साद आली,
परी मंचकी, मुक्त एकांत भाळी,
असें भास ह्रदयांस, या नित्य जाळी ।।२।।
*
झुलावे फुलारून, वाटे कळ्यांना,
परी मर्म याचे, तुला आकळेना,
म्हणूनच रात्र ही, निःशब्द झाली ।।३।।
☆
© श्री रवींद्र सोनावणी
निवास : G03, भूमिक दर्शन, गणेश मंदिर रोड, उमिया काॅम्पलेक्स, टिटवाळा पूर्व – ४२१६०५
मो. क्र.८८५०४६२९९३
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री राजकुमार दत्तात्रय कवठेकर
कवितेचा उत्सव
☆ निखाऱ्यासारखे… ☆ श्री राजकुमार कवठेकर ☆
☆
हे जिणे होते निखाऱ्यासारखे
भेटणारे लोक वाऱ्यासारखे
*
नेमके ना बोलणे झाले कधी
बोलणे माझे पसाऱ्यासारखे
*
लाभले ना प्रेम कोणाचे कधी
सर्वही दूरस्थ ताऱ्यांसारखे
*
भोगली आजन्म दु:खे.. वेदना
भेटलेले सौख्य पाऱ्यासारखे
*
मी मनस्वी हासलो होतो जरी
हासणे झाले बिचाऱ्यासारखे
*
ना घडे हातून या काही.. कधी
वागणे माझे विचाऱ्यासारखे
*
बासरीचा सूर होतो आर्त मी
वाजणारे ते नगाऱ्यासारखे
*
मुक्त केंव्हा वावरू ‘त्याने’ दिले?
दुःख जन्माचे पहाऱ्यासारखे
*
चिंब होते व्हायचे त्या श्रावणी
वर्षले जे; ते फवाऱ्यासारखे
*
मौन संवादापरी होते तुझे
पाहणे होते इशाऱ्यासारखे
*
लोक सारे टाळुनी जाती मला
भात-लिंबाच्या उताऱ्यासारखे
*
जन्म हा माझा तहानेला तुझा
राहणे झाले किनाऱ्यासारखे
*
मेघ आषाढी तशी होतीस तू
चित्त हे माझे पिसाऱ्यासारखे
*
‘सावजा’चे काढले आयुष्य मी
भेटले सारे शिकाऱ्यांसारखे
*
“या.. ” तुझे आपुलकीचे शब्द हे
नेहमी होते निवाऱ्यासारखे
*
स्वार्थसाधूंचीच सारी नाटके
साव ही… होती भिकाऱ्यासारखे
*
वागता ना बोलता आले मला
मी जगावे कोंडमाऱ्यासारखे
*
वाट काट्याची.. उन्हे.. पाऊसही
वाहिले आयुष्य भाऱ्यासारखे
*
फाटक्याने रे जगावे लागले
दैव माझे वाटमाऱ्यासारखे
*
चोख मी होतोच सोन्यासारखा
तोलले त्यांनी घसाऱ्यासारखे
*
संपुनी संपेचिना आयुष्य हे
वाटते आहे ढिगाऱ्यासारखे
☆
© श्री राजकुमार दत्तात्रय कवठेकर
कवी / गझलकार
संपर्क : ओंकार अपार्टमेंट, डी बिल्डिंग, शनिवार पेठ, आशा टाकिज जवळ, मिरज मो ९४२११०५८१३
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सौ. सुनीता पाटणकर
कवितेचा उत्सव
☆ आम्ही जगतोय ???? ☆ सुश्री सुनीता पाटणकर ☆
आम्ही जगतोय ?????
आम्ही जिवंत आहोत ?????
आमचे डोळे उघडे आहेत ????
आमचे कान बंद आहेत ?????
आमचं तोंड चालू आहे !
चार भिंतीत………
अत्याचार, अनाचार, भ्रष्टाचार,
याहून श्रेष्ठ बलात्कार !!!!
घटना घडतात,
चार दिवस बोंबाबोंब,
परत सगळं विसरायचं,
जीवन जगत रहायचं,
कसली न्यायव्यवस्था ?????
मुलीला डॉक्टर केली,
तिच्यावर बलात्कार झाला,
तिचा खून झाला,
दहा दिवस उलटले,
सगळे बलात्कारी,
निर्लज्ज, हलकट,
आरामात रिलॅक्स,
कसलीही भीती नाही,
लाज नाही,
बेशरम…….
यांना आई बहिणी नाहीत ?????
समाजानेचं यांचा,
न्याय करायला हवा,
यांचे बलात्कारी हत्यार,
उखडून टाका,
पुन्हा कृष्ण कृत्य करताना,
लाख वेळा भीती वाटली पाहिजे…….
तरच त्या यातना भोगलेल्या,
आत्म्यांना शांती लाभेल,
हे बंद झालं पाहिजे,
ममता तू बाईचं आहेस ना ????
किती निर्भया झाल्यावर,
चित्र पालटणार आहे?????
कायद्याचा आसूड,
कायद्याचा बडगा,
हे प्रत्यक्षात,
कधी येणार????
बाईचा खरा सन्मान,
तेव्हाच होणार……….
© सौ. सुनीता पाटणकर
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री आशिष मुळे
कवितेचा उत्सव
☆ “श्रावण” ☆ श्री आशिष मुळे ☆
☆
श्रावण कधी जात येत नसतो
ऊन पावसाचा लपंडाव
थांबायचं नाव घेत नसतो
आयुष्याचा हाच निसर्ग असतो
श्रावण नेहमी इथेच असतो…
*
कधी सावली प्रेमाची
कधी ऊन विरहाचे असतो
कधी हवा अशीच रिकामी
कधी कवडसा उजळत असतो
श्रावण नेहमी इथेच असतो…
*
नद्या नाले ओसंडून वाहता
कोपरा एखादा कोरडाच राहतो
जगायची शक्यता नसता
कोंब एखादा आकाशी जातो
श्रावण नेहमी इथेच असतो…
*
दरीत श्रावण खस्ता खातो
उंचीवर थोड्या रम्य भासतो
शिखरावर ध्यानस्थ योगी होतो
जात येत तर मी असतो….
श्रावण नेहमी इथेच असतो…
☆
© श्री आशिष मुळे
≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
म. ना. दे. (श्री मयुरेश देशपांडे)
कवितेचा उत्सव
☆ || आई सांगे मर्म || ☆ म. ना. दे. (श्री मयुरेश देशपांडे) ☆
(आपणां सर्वांना पिठोरी अमावस्या म्हणजेच मातृदिनाच्या शुभेच्छा. आजच्या दिवशी सर्व मातांच्या चरणी माझे हे काव्य पुष्प.)
☆
भारलेला जन्म| आई सांगे मर्म|
तिचा एक धर्म| अनंताचा|| धृ ||
*
शाळा आयुष्याची| जन्मतःच सुरू|
आई असे गुरू| जगताची|| ०१ ||
*
किती मोठा झाला| झाला अधिकारी|
आईच विचारी| जेवला का?|| ०२ ||
*
चिंता भारंभार| सतत तक्रारी|
आईची हुशारी| कामी येई|| ०३ ||
*
तिची संध्याकाळ| आपली दुपार|
आईचा विसर| कसा पडे?|| ०४ ||
*
गाठता कळस| विसरती पाया|
आईचीच माया| शाश्वतसे|| ०५ ||
☆
कवी : म. ना. देशपांडे
(होरापंडीत मयुरेश देशपांडे)
+९१ ८९७५३ १२०५९
https://www.facebook.com/majhyaoli/
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री तुकाराम दादा पाटील
कवितेचा उत्सव
☆ श्रावण गाणी… ☆ प्रा तुकाराम दादा पाटील ☆
☆
आनंदाने घुमू लागली श्रावण गाणी
दाखवतो बळ वाराअवखळ
करतो सळसळ दारी पिंपळ
जलधारानी बरसत केले तळेअंगणी
आनंदाने घुमू लागली श्रावण गाणी
*
बरसत आल्या जलधारानी भिजली राने
मातीमधल्या नवांकुराना फुटली पाने
किमया झाली कळून आली
फुलल्या वेली फुले हासली
जिकडे तिकडे नितळ जाहले अमृतपाणी
आनंदाने घुमू लागली श्रावण गाणी
*
ऋतू राजाने चैतन्याने रंग बदलले
प्रभात काळी रविकिरणांचे तेज प्रकटले
दिशा बहरल्या नटल्या सजल्या
दिपून गेल्या लाज लाजल्या
जगण्याची मग सुरू झाली नवी कहाणी
आनंदाने घुमू लागली श्रावण गाणी
*
प्रेम लाभता जगभवताली हसू लागले
भविष्यातले आशादायी दिवस बदलले
हातीआला अमृत प्याला
मग जगण्याचा ध्यास लागला
देवाघरची कळून आली भविष्य वाणी
आनंदाने घुमू लागली श्रावण गाणी
*
किती काळजी करावयची या जगण्याची
असते चालू इथे लढाई सुखदुःखाची
संधी मिळते तेव्हा कळते
सरते उरते परत बहरते
सतर्कतेने वर्तन करता कलाकलाणी
आनंदाने घुमू लागली श्रावण गाणी
☆
© प्रा. तुकाराम दादा पाटील
मुळचा पत्ता – मु.पो. भोसे ता.मिरज जि.सांगली
सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३
दुरध्वनी – ९०७५६३४८२४, ९८२२०१८५२६
≈ संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈
सौ.ज्योत्स्ना तानवडे
कवितेचा उत्सव
☆ चरणमिठी… ☆ सौ.ज्योत्स्ना तानवडे ☆
☆
दिसे मंदिर कळस
आली पंढरी पंढरी
जीव शिव भेटताना
जाई पूर्णत्वास वारी ||
*
चंद्रभागा उचंबळे
नामघोष गजराने
वाहे दुथडी भरून
टाळ मृदंग नादाने ||
*
वाळवंटी पसरला
भक्ती रसाचा सागर
सुखे भरुनिया घ्यावी
आत्मज्ञानाची घागर ||
*
वसे आनंद निधान
येथे पंढरी देऊळी
चराचर व्यापूनिया
मना मनाच्या राऊळी ||
*
वाट सरली सरली
नामदेवांची पायरी
तिथे टेकविता माथा
मन निवाले अंतरी ||
*
व्हावे सार्थक वारीचे
सारे द्वैत सरो देवा
माझे सावळे विठाई
द्यावा चरणी विसावा ||
☆
© सौ.ज्योत्स्ना तानवडे
वारजे, पुणे.५८
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सुश्री अपर्णा परांजपे
चित्रकाव्य
तू शांत कसा रे ? ☆ सुश्री अपर्णा परांजपे
☆
शांत कसा भगवंता तू
शांत कसा रे?
फक्त अर्जुनच का रे
आता शांत कसा रे?
तू शांत कसा भगवंता? ||धृ||
*
किती बदलला मानव सारा
स्वधर्म विसरून स्वार्थी सारा
कुणी कुणाला मानत नाही
कुणी कुणाशी बोलत नाही
शांत कसा भगवंता?
रे शांत कसा भगवंता?||१||
*
आतच वसती तुझी असताना
कसा पाहतो चुक करतांना
प्रेमाचे मूळ स्वरुप हे
विसरून वैर जागवताना
शांत कसा भगवंता?
तू शांत कसा भगवंता?||२||
*
महाभारती युध्द दोन गट
कलियुगी मात्र युध्द अंतरंगी
कुरूक्षेत्री तू अर्जुन सारथी
हृदयातील आत्माराम या जगी
शांत कसा भगवंता
तू शांत कसा भगवंता?||३||
*
अर्जूनास विषाद असूनही
प्रेमापोटी बनलास सारथी
आता तो विषाद नाही
वस्ती असूनही हृदयामध्ये
शांत कसा भगवंता
तू शांत कसा भगवंता?||४||
*
जग सगळे मायेत अडकता
मायेची अपरिमित सत्ता
एक लेकरू मारी हाका
भगवंता हृदयी तव सत्ता
शांत कसा भगवंता
रे शांत कसा भगवंता?||५||
*
जागृत भक्ती करता येईल
हीच शांतता प्रकट होईल
निर्विकल्पता येऊन पदरी
पडेल प्रशांतता..
शांत कसा भगवंता
रे शांत कसा भगवंता.. ||६||
*
चुकलो चुकलो शांत तुज म्हणता
तू होता, आहे व असणारही
शांत प्रशांत हा स्वभाव दैवी
कसा तू सोडणार?
शांत “असा” भगवंता
तू शांत “असा” भगवंता…. ||७||
*
🌹 भगवंत हृदयस्थ आहे 🌹
© सुश्री अपर्णा परांजपे
कात्रज, पुणे
मो. 9503045495
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
