Marathi Kavita
श्रीशैल चौगुले
कवितेचा उत्सव
☆ ऐवज… ☆ श्रीशैल चौगुले ☆
☆
थंडिचा हिवाळा
काळीज धडके
हेमंत जिव्हाळा.
*
हरिते पाखरे
कधीची सकाळ
आळस भिनून
दुपार धुकाळ.
*
मनात मिठीची
अनोखीच ओढ
ओहोळही वाहे
आठवणी गोड.
*
क्षितीज सांजेत
कडाकी बिलग
हुडहुड अंग
शेकोटी सजग.
*
मनाला उमज
भावना समज
भोवती आगीच्या
ऋतूचा ऐवज.
☆
© श्रीशैल चौगुले
मो. ९६७३०१२०९०.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री राजकुमार दत्तात्रय कवठेकर
कवितेचा उत्सव
☆ पुन्हा एकदा… ☆ श्री राजकुमार कवठेकर ☆
☆
तुझी आठवण मनी उतरली पुन्हा एकदा
ग्रीष्म कधी श्रावण-सर झरली पुन्हा एकदा
*
बोलायाचे बरेच काही गेले राहुन
शब्दांची पाखरे बिथरली पुन्हा एकदा
*
शुक्राची होऊन चांदणी उगवलीस तू
पहाट रात्रीला फटफटली पुन्हा एकदा
*
ठेवताच तू तळहातावर फूल जुईचे
ओंजळ ही स्वप्नांनी भरली पुन्हा एकदा
*
तुझे वागणे नाटक आहे पक्के कळले
पण फसलो जेंव्हा तू हसली पुन्हा एकदा
*
पुन्हा तुझ्या येण्याने फुललो विसरुन सारे
घडी मनाची मी अंथरली पुन्हा एकदा
*
परतलीस नि:शंक मनाने लाटेसम तू
खूण प्रितीची अपुल्या पटली पुन्हा एकदा
*
तुझे मेघ आषाढी, वा-यासवे पांगले
हिरवटती आशा कोळपली पुन्हा एकदा
*
शांत सागरी जीवन-नौका होती माझी
भेटलीस तू अन् वादळली पुन्हा एकदा
*
नांव तुझे नकळतसे येता ओठांवरती
जखम वाळलेली ठसठसली पुन्हा एकदा
*
आठवणीतुन भेटलीस तू अवचित जेंव्हा
मजला ‘माझी’ भेटहि घडली पुन्हा एकदा
*
तुझी आठवण, अर्ध्यामुर्ध्या भातुकलीची
हसताना आसवे निसटली पुन्हा एकदा
☆
© श्री राजकुमार दत्तात्रय कवठेकर
कवी / गझलकार
संपर्क : ओंकार अपार्टमेंट, डी बिल्डिंग, शनिवार पेठ, आशा टाकिज जवळ, मिरज मो ९४२११०५८१३
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री आशिष बिवलकर
चित्रकाव्य
– ज्ञानराजा – ☆ श्री आशिष बिवलकर ☆
☆
इंद्रायणी काठी ! विसावला ज्ञाना !
आत्मसमाधाना ! समाधिस्थ !!१!!
*
कृपाळू माऊली ! बुद्धीचा सागर !
मायेचे माहेर ! ज्ञानराजा !!२!!
*
कैसा चमत्कार ! रेड्या मुखी वेद!
गर्विष्ठांचा भेद ! वदवूनी !!३!!
*
बसुनी भावंडे ! चालवली भिंत !
चांगदेवा खंत ! पाहुनिया !!४!!
*
पाठीवरी मांडे ! मुक्ताई भाजती !
क्षुधा भागवती ! जठाराग्नी !!५!!
*
भावार्थ दीपिका ! या गीतेचा अर्थ !
ज्ञानी नाम सार्थ ! ज्ञानेश्वरी !!६!!
*
अमृताचा घडा ! एक एक ओवी !
स्व अनुभवावी ! वाचूनिया !!७!!
☆
(चित्र – साभार श्री आशिष बिवलकर)
© श्री आशिष बिवलकर
बदलापूर
मो 9518942105
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री तुकाराम दादा पाटील
कवितेचा उत्सव
☆ यज्ञ… ☆ प्रा तुकाराम दादा पाटील ☆
☆
अवचित आठवली
गाथा हृदयी भिडली
द्वाड झाल्या आठवणी
रात ढळाया लागली
*
अंगावरचा धडपा
त्याचा पदर फाटका
झाकू पहातो संसार
माझा फाटका नेटका
*
कुणा मदतीचा हात
नाही मागायचा आता
शब्द सुखाचे गाठोडे
हीच सारी मालमत्ता
*
गेली मरून मनशा
तिचे दु:ख नाही मला
चार दिसाचे जगणे
त्याचा किती बोलबाला
*
नको आवर्तन पुन्हा
जन्म मरणाच्या दारी
आहे पदरी बांधली
आर्धी सुखाची भाकरी
*
नको निवारा आणखी
नको वैभव कसले
लेखणीला आले बळ
त्याने जगाला जिंकले
*
नाही पुजला दगड
तेच आहे समाधान
दिलदार मैत्र माझे
माझ्या जगण्याचे धन
*
राना वनात भेटते
मला माझेच संचीत
जळे चंदनाची चूड
भोवतीच्या वादळात
*
खोड चंदनी जळता
दरवळ मुलुखात
यज्ञ झाला जगण्यचा
हेच घडले आक्रीत
☆
© प्रा. तुकाराम दादा पाटील
मुळचा पत्ता – मु.पो. भोसे ता.मिरज जि.सांगली
सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३
दुरध्वनी – ९०७५६३४८२४, ९८२२०१८५२६
≈ संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈
श्री शरद कुलकर्णी
कवितेचा उत्सव
☆ मोक्षमुक्ती धाम… ☆ श्री शरद कुलकर्णी ☆
☆
पंख परीचे घेउन,
नीज डोळ्यावर आली.
चेटकिणीच्या भयाची,
कथा इथेच संपली.
*
जावळात अजूनही,
तुझी फिरतात बोटे.
हरवल्या शैशवात,
आई अंगाईत भेटे.
*
थोडा निर्मम होउन,
मांड भातुकली डाव.
मोहमायेच्या संसारी,
शोध मोक्षमुक्ती धाम.
☆
© श्री शरद कुलकर्णी
मिरज
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
प्रा. भरत खैरकर
कवितेचा उत्सव
☆ “मनसंवाद…” ☆ प्रा. भरत खैरकर ☆
☆
गुढपण माझे मनाचा संवाद
माझाच वाद माझ्यासंगे !
*
गरुडाचे पंखी आकाश अपुरे
तैसे मन उडे चराचरी !
*
सुखदुःख सारे मृगजळी खेळ
साधावा मेळ विवेकाने!
*
परिसाचे संगे लोह झाले सोने
तैसे शब्दाभ्यासे सारस्वत!
*
चित्ती यातायात जगाचा पसारा
मना एक थारा पांडुरंग!
☆
© प्रा. भरत खैरकर
संपर्क – बी १/७, काकडे पार्क, तानाजी नगर, चिंचवड, पुणे ३३. मो. ९८८१६१५३२९
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री प्रमोद वामन वर्तक
कवितेचा उत्सव
😞 😅 ताल आणि ठेका ! 
श्री प्रमो वामन वर्तक
☆
होई बेताल बघा सारे
ठेका चुकता तालाचा,
नाही वेळीच सावरला
रंग उडेल आयुष्याचा !
*
करू नका श्रीगणेशा
द्रुत लयीच्या ठेक्याने,
अन्यथा घात ठरलेला
धावता जलद गतीने !
*
सोप्पे नसते कधीच
घट्ट पकडणे तालास,
आयुष्य पडते खर्ची
सुंदर सम गाठण्यास !
*
जो ताल आला नशिबी
त्या लयीत ठेका धरावा,
हा मंत्र सुखी आयुष्याचा
तुम्ही मनावर कोरावा !
तुम्ही मनावर कोरावा !
☆
© श्री प्रमोद वामन वर्तक
संपर्क – दोस्ती इम्पिरिया, ग्रेशिया A 702, मानपाडा, ठाणे (प.) – 400610
मो – 9892561086 ई-मेल – [email protected]
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सुश्री नीलांबरी शिर्के
चित्रकाव्य
☆
कालचा सूर्य मावळता
तो आज नव्याने येतो
रोजचा दिवस आपणा
म्हणून वेगळा म्हणतो…..
*
रवि मावळतीला जाता
प्रहर रातीचा हळू येतो
साम्राज्य काळोखाचे तो
हलकेच पसरवून देतो…..
*
रातीला येणारा अंधार
दुसरी पहाट येईतो रहातो
रवि नव्या दिवसाचा येता
अंधार कालचा जातो…..
*
सुख रविसम येते जाते
आणि ….
अंधारासम मुक्कामाला
दु:ख वस्ती करून जाते…….
☆
© सुश्री नीलांबरी शिर्के
सौ. अमृता देशपांडे
कवितेचा उत्सव
🙏🏻 घडी छान बसते… 🙏🏻 सौ. अमृता देशपांडे ☆
☆
दोन टोकं जुळवली की
घडी छान बसते….
*
दोन टोकं जुळवणं खरंच
अवघड का असते… ?
मधलं काही जरा बाजूला
केलं तर
घडी छान बसते.
*
मागची पिढी पुढच्या पिढीशी
जुळणं अवघड का असते.. ?
मधली जरा बाजूला झाली तर
घडी छान बसते.
*
मागचे दिवस आताचे दिवस
तफावत का दिसते… ?
मधले नको ते काही विसरले तर
घडी छान बसते.
*
कागदावर लिहून दोन्ही टोके
जुळवावीत
आत लिहिलेले लपून रहाते..
मनातली घडी छान बसते.
*
तुझंही नको माझंही नको
मधलं सारं पुसून
परत टोकं जुळवली तर…
घडी छानच बसते.
*
घडीघडीचे आयुष्य
घड्याघड्यांनी भरते…
एक एक टोक जुळवता
घडी छान बसते.
*
घडी छान घालता घालता
हळूच उलगडली… तर
मधली रिकामी जागा
नेहमीच भरलेली दिसते.
☆
© सौ. अमृता देशपांडे
पर्वरी – गोवा
9822176170
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सौ.वनिता संभाजी जांगळे
कवितेचा उत्सव
☆ सलाम… ☆ सौ. वनिता संभाजी जांगळे ☆
☆
कधी दुष्काळ सुका, तर कधी येतो ओला
दुःखाच्याच रेघुट्या, आमच्या नशिबाला.
ठिगळं जोडली सतरा, तरी पदर फाटलेला
शेवटी पिकाचा पंचनामा, कागदावरच उरला.
*
सलाम आमुचा जिंकला आणि हारलाही त्याला
**
कुणा ठाव कोण आला अन कोण पडला ?
नाळ आमुच्या कष्टाची, रानच्या बांधाला
धरणीला माय आणि बाप मानतो नभाला
आलेल्या संकटाचं, साकडं घालतो विठूला
*
सलाम आमुचा जिंकला आणि हारलाही त्याला
**
कष्टाच्या घामात रगडतो, जवा आमुचा पागुटा
तवाच रंगतो पुढाऱ्याचा, चकचकीत फेटा
बळी किती जाती, गोड उसाच्या कडू कहाणीला
तवा झळकतं नाव पुढाऱ्याचं, साखर कारखाणदारीला
*
सलाम आमुचा जिंकला आणि हारलाही त्याला
**
सोयाबीन, कपासीचा भाव, सदाच ढासळलेला
बांधावरच्या बाभळीला, फास कर्जाचा टांगलेला
अश्वासनाच्या फुक्या हावंत, श्वास गुदमरलेला
मत माझं देऊनशानी, फक्त जागलो लोकशाहीला
*
सलाम आमुचा जिंकला आणि हारलही त्याला
☆
© सौ.वनिता संभाजी जांगळे
जांभुळवाडी-पेठ, ता. – वाळवा, जिल्हा – सांगली
संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
