Category: कवितेचा उत्सव 2

सुश्री नीलांबरी शिर्के

सौ राधिका भांडारकर

(मनस्पर्शी साहित्य परिवार आयोजित काव्यस्पर्धा – विषय : “अजून स्वाभिमान जाज्वल्य” – आपल्या समूहातील ज्येष्ठ लेखिका / कवयित्री सुश्री राधिका भांडारकर यांची या स्पर्धेत उत्कृष्ट ठरलेली ही कविता. आपल्या ई-अभिव्यक्ती समूहातर्फे राधिकाताईंचे हार्दिक अभिनंदन आणि असंख्य शुभेच्छा.💐)

 कवितेचा उत्सव 

☆ “स्वत्व…” ☆ सौ राधिका भांडारकर ☆

(दिंडी वृत्त)

☆

नकोच वाटते मला दया माया 

आहेत वाटा कितीतरी अजून 

चालेन त्यावर जरी एकटी मी

जाज्वल्य आहे स्वाभिमान अजून..

*

सारे मुखवटे भासतात मजला 

का घ्यावे दान मी त्यांच्याकडून 

कशाला व्हावे मिंधे कोणाचे 

जाज्वल्य आहे स्वाभिमान अजून 

*

नको लाचारी वा हाजी हाजी

प्रतिमाच माझी ठेवेन टिकवून 

धमन्यात आहे सळसळता प्रवाह

जाज्वल्य आहे स्वाभिमान अजून

*

खोट्यापुढे का तुकवायची मान

मुलाम्याला का जायचे मोहून 

स्वत्वच राखेन प्रश्नाला भिडून 

जाज्वल्य आहे स्वाभिमान अजून

*

आक्रमण माझ्या जर अस्तित्वावरी

केले कुणी तर त्यांना डावलून 

सिद्ध करेन मी माझ्या स्त्रीत्वाला 

जाज्वल्य आहे स्वाभिमान अजून 

☆

© सौ. राधिका भांडारकर

ई ८०५ रोहन तरंग, वाकड पुणे ४११०५७

मो. ९४२१५२३६६९

[email protected]

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ. नेहा लिंबकर

 कवितेचा उत्सव 

☆ माझे असे काय ? ☆ सौ. नेहा लिंबकर ☆

☆

काय वाहू तुझे चरणी 

देवा, माझे असे काय?

*

तन, मन, धन सारे 

तुझे देणे हाय 

काय वाहू तुझे चरणी 

माझे असे काय ?

*

आस, ध्यास, श्वास सारे 

तुझ्या कृपे न्याय्य 

काय वाहू तुझे चरणी 

माझे असे काय?

*

दया माया बुद्धी गुणे 

पावो तुझे पाय

काय वाहू तुझे चरणी 

माझे असे काय?

*

याची देही पाहू डोळा 

तूच माझी माय 

काय वाहू तुझे चरणी 

माझे असे काय? 

*

रूप चित्ती राहो सदा 

नाम सर्वकाळ 

काय वाहू तुझे चरणी 

माझे असे काय?

*

श्रद्धा, भक्ति पूजेवरी 

पाव एक वार 

काय वाहू तुझे चरणी 

माझे असे काय?

देवा, माझे असे काय 

☆

© सौ.  नेहा लिंबकर

पुणे 

मो – 9422305178

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री आशिष मुळे

 कवितेचा उत्सव 

≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री अपर्णा परांजपे

 कवितेचा उत्सव 

☆  आतुरता आगमनाची… ☆ सुश्री अपर्णा परांजपे ☆

(काय विरोधाभास हा.. )

☆

जीवन खरा विरोधाभास 

कधी नको काही मजला 

कधी व्याकूळ आस 

जीवन खरा विरोधाभास||धृ||

*

“श्रेयस” शिकता शिकता,

 “प्रेयस” निसटले काही

“प्रेयस” शिकले जेव्हा

 “श्रेयस” निसटते काही

“उभय” साधले जेव्हा 

नाही कोणती आस..

जीवन खरा विरोधाभास||१||

*

प्रेम करू गेलो तर द्वेष मनी उमटला 

द्वेष करू गेलो तर प्रेम हृदयी ठाकले 

“उभय” साधले ( निर्लेपता) जेव्हा नाही कोणती आस 

जीवन खरा विरोधाभास||२||

*

ज्ञानार्जन करता करता 

अध्यात्म कसा विसरलो

अध्यात्म साधता साधता 

ज्ञान कसे सुटले? 

“उभय” साधले जेव्हा नाही कोणती आस 

जीवन खरा विरोधाभास||३||

*

“मी मी” म्हणता म्हणता 

“परमात्मा” कसा निसटला

परमात्मा आतच असूनी 

(जीव )दूर कसा भरकटला

“उभय” साधले जेव्हा 

नाही कोणती आस 

जीवन खरा विरोधाभास||३||

*

विरोध हाच “भास” आहे 

हेच समजले जेव्हा 

वर्तूळ जाहले पूर्ण 

“मी पण” सुटले जेव्हा 

“उभय” साधले जेव्हा 

नाही कोणती आस 

जीवन खरा विरोधाभास||४||

*

विरोधातच जीवन फुलते 

“अद्वैत” कळण्याकरता

अद्वैत शिल्लक उरले 

विरोध संपण्याकरिता 

“उभय” साधले जेव्हा 

नाही कोणती आस 

जीवन खरा विरोधाभास||५||

*

आतच ईश्वर आहे 

रममाण जीव हा झाला 

“मी मी” करता करता 

“आतच” तल्लीन झाला 

उभय साधले जेव्हा 

नाही कोणती आस 

जीवन “नाही” विरोधाभास || ६||

*

जीवन पूर्णत्वाची रास

जीवन पूर्णत्वाची आरास…

नरनारायण मीलन घडता

“नाही” विरोधाभास…..

☆ 

🌹 भगवंत हृदयस्थ आहे 🌹

© सुश्री अपर्णा परांजपे

कात्रज, पुणे

मो. 9503045495

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री दीप्ती कुलकर्णी

 कवितेचा उत्सव 

☆ गणरायास विनवणी… ☆ सुश्री दीप्ती कुलकर्णी ☆

☆

विनवी तुजला, श्री गणराया

अज्ञाना मम दूर कराया ||धृ||

*

चतुर्थीला रे पूजिती तुजला

श्रीगणेशा, पावसी सकला

चौदा विद्या, चौसष्ट कला

देशी तू रे, तुज भक्ताला ||१||

*

गजानना रे मंगल कार्या

निमंत्रिती तुज पूर्ण कराया

हेरंबा रे, प्रार्थिती तुजला

वरदहस्त हा द्यावा सकला ||२||

*

भावभक्तीचे पुष्प अर्पण्या

अधीर जाहली अवघी काया

मनोभावे वंदन तुजला 

लोटांगण रे तुझिया पाया ||३||

☆

© सुश्री दीप्ती कोदंड कुलकर्णी

कोल्हापूर 

भ्र.९५५२४४८४६१

≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ विजया कैलास हिरेमठ

 कवितेचा उत्सव 

☆ “माझा बाप्पा… घरी येता…” ☆ सौ विजया कैलास हिरेमठ ☆

☆

बाप्पा रे बाप्पा 

तू घरी असता 

मला नाही चिंता 

कशाचीच आता…

*

तुझ्या माझ्या गप्पा

होतीलच आता

मनातलं सारं

येईल तुला सांगता…

*

तुझ्याकडे आता वेळच वेळ

तुझा माझा छान बसेल मेळ 

घरीच रंगेल प्रत्येक खेळ

सोबतीला गोड गोड प्रसादाची भेळ…

*

तू घरी आल्यावर

कोणीच नाही मला ओरडत

छोट्या छोट्या खोड्यांनी 

कुणाचे काही नाही बिघडत…..

*

घरी सर्वांना गडबड घाई

मला कोणी ओरडत बसत नाही

गोड खाऊ न मागताच हातावर येई

तुझ्यासोबत माझीही चैन मग होई….

*

तुझी माझी जमते गट्टी

मी ही नाही वागत मग हट्टी

अभ्यासाला हळूच घेऊन सुट्टी

शाळेला ही कधीतरी मारतो बुट्टी….

*

म्हणूनच देवा मी तुझी वाट पाहतो

तुझ्या येण्याची छान तयारी करतो

माझा बाप्पा मला हवाच असतो

गणेश चतुर्थीला तो माझ्याच घरी राहतो….

*

वाजत गाजत येतो

हसत खेळत राहतो

मना प्रसन्न ठेवतो

दुःख सारे संपवून टाकतो….

*

सर्वांना बुध्दी छान देतो

आम्ही सगळे त्याचेच ऐकतो

म्हणूनच मोठ्यांच्या ओरड्यापासून 

मी रोज रोज बचावतो….

*

देव बाप्पा देव बाप्पा

मला वाटते आता

तू नेहमीच आमच्या घरी रहावा

मोठ्यांनाही थोडं लहानपण दे गा देवा….

☆

💞शब्दकळी विजया 💞 

©  सौ विजया कैलास हिरेमठ

पत्ता – संवादिनी ,सांगली

मोबा. – 95117 62351

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ. वृंदा गंभीर

 कवितेचा उत्सव 

☆ गाई गुणगान आवडीने… ☆ सौ. वृंदा गंभीर ☆

☆

आगमन आज | श्री गणपतीचे ||

 प्रसन्न मनाचे | आवडीने ||1||

*

 छान सजावट | बाप्पाच्या समोर ||

रांगोळी सुंदर | रेखीयेली ||2||

*

 लाईट पताका | चमकती भारी |

मूर्ती ही साजरी |. दिसतसे ||3||

*

 मनोभावे पूजा | आज दिनी करी |

नैविद्यास पुरी | अर्पियेली ||4||

*

दुर्वा जास्वनंद | वहावी भक्तीने |

बाप्पा आरतीने | नाचतसे ||5||

*

 मोदक उकडी | गूळ खोबऱ्याचे |

गुण प्रसादाचे | दावीयेती ||6||

*

रूप मनोहर | दिसतसे फार |

जरी पितांबर | नेसलासे ||7||

*

 कंठात माणिक | मोतीयांच्या माळा |

 पायात हो वाळा | शोभतंसे ||8||

*

 गाई गुणगान | आवडीने देवा |

 वृंदाचा ठेवा | सोनियाचा ||9||

 – दत्तकन्या

☆

© सौ. वृंदा गंभीर

न-हे, पुणे. – मो न. 8799843148

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री शरद कुलकर्णी

 कवितेचा उत्सव 

☆ दयाघना तूच सांग… ☆ श्री शरद कुलकर्णी ☆

☆

पाणावले डोळे,

पापणीस पूर.

ऊर फाटून विदीर्ण,

सोडताना घर.

*

असे कसे झाले,

पाणी अनावर.

बंध संयम तोडून,

आला महापूर.

*

उघड्या डोळ्यांनी सताड,

मृत्यू सोहळे पहावे.

अशा निर्दयी पाण्याला,

कसे जीवन म्हणावे?

*

आर्ततेने आता,

हाक कोणास मारावी?

दयाघना तूच सांग,

कशी प्रार्थना करावी.

☆

© श्री शरद  कुलकर्णी

मिरज

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ. रेणुका धनंजय मार्डीकर

  चित्रकाव्य  

सांग पावसा सांग मला… ☆ सौ. रेणुका धनंजय मार्डीकर ☆

☆

सांग पावसा सांग मला

काय देऊ मी सांग तुला

फुललेला तू ऋतू दिला

रंग गुलाबी फुला फुला

*

पाकळी मजला मोहविते

कळी कळी उमलून देते

हिरव्या हिरव्या पर्णपाचुच्या

देठासंगे घेई झुला

सांग पावसा……

*

कधी मी बावरुनी जाते

गोड खळी गाली येते

प्रेम झुल्यावर घेताना

हिंदोळा हा खुला खुला

सांग पावसा……..

*

अवचित लाली आलेली

सर ओलेती न्हालेली

कुंतलात मग अलगद माळून

छेड छेढतो कानडुला

सांग पावसा………..

☆

© सौ.रेणुका धनंजय मार्डीकर

औसा.

मोबा. नं.  ८८५५९१७९१८

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈