Marathi Kavita
श्रीशैल चौगुले
कवितेचा उत्सव
☆ आळंदीचा छंद... ☆ श्रीशैल चौगुले ☆
☆
अजब पालखी / ज्ञानेशाची दिंडी
वारकरी झुंडी / विठ्ठल पेले //
*
भक्ताची काळजी /आळंदीचा राजा/
सांभाळतो प्रजा /ग्रंथमाऊली//
*
जन्माचा सोहळा /भेटीसाठी आस/
अभंगाचे दास/लहानथोर //
*
ऐटीत पंढरी /पांडुरंगी वास /
चंद्रभागा खास/स्वर्गभुवरी //
☆
© श्रीशैल चौगुले
मो. ९६७३०१२०९०.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सुश्री नीलांबरी शिर्के
कवितेचा उत्सव
☆ पंढरीचा विठ्ठल… ☆ सुश्री नीलांबरी शिर्के ☆
☆
पंढरीच्या विठ्ठलाने
मज लावलाय लळा
तेच माहेर गा माझे
तोच आनंद सोहळा
*
व्याप संसाराचा मोठा
त्यात गुंतलेला पाय
इथे भेटालागी येते
माझी सावळी ग माय
*
सडा शिंपताना दारी
हात रेखता रांगोळी
रंगातून सुखे हासे
तिची मुरत वेगळी
*
केर काढता घरात
मल मनाचा ती काढे
संसाराची ओढ मनी
आपसूक मग वाढे
*
चुलीपाशी रांधताना
मुखी पांडुरंग नाम
घास कुटुबांच्या ओठी
तृप्त भक्तीमय धाम
*
सारे आवरता काम
पाठ टेकता धरणी
मिटलेल्या डोळ्यातुन
चंद्रभागा इंद्रायणी
*
त्या पवित्र जलातुन
वाहतसे श्रमताप
मुखी पांडुरंग हरी
उमटते आपोआप
☆
© सुश्री नीलांबरी शिर्के
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री अशोक श्रीपाद भांबुरे
अशोक भांबुरे जी यांची कविता अभिव्यक्ती # 246
☆ अळवावरचे पाणी ☆ श्री अशोक श्रीपाद भांबुरे ☆
☆
गर्दीमधल्या गोंगाटाने मी भेदरले होते
एकांताच्या कुशीत शिरले अन सावरले होते
*
शृंगाराची आवड नव्हती निरस आरसा होता
रसरसलेला मुखडा पाहुन मी गांगरले होते
*
सौंदर्याची खाण पाहुनी डोळे दिपले त्यांचे
खाणीवरती मी पदराला मग पांघरले होते
*
एक वाळवी मतभेदाची पोखरण्याला कारण
वरून सुंदर आतुन सारे घर पोखरले होते
*
वाचे इतके धरतीवरती घातक नाही काही
तुझे बोलणे इतके स्फोटक मी हादरले होते
*
भिती वाटते पक्व फळाला हलल्यावरती फांदी
फूल सहजतर फांदीवरती ते वावरले होते
*
अल्पजीवनी तरिही सुंदर या जगताला वाटे
अळवावरचे पाणी क्षणभर मोती ठरले होते
☆
© श्री अशोक श्रीपाद भांबुरे
धनकवडी, पुणे ४११ ०४३.
मो. ८१८००४२५०६, ९८२२८८२०२८
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री आशिष बिवलकर
चित्रकाव्य
– विठ्ठल विठ्ठल… – ☆श्री आशिष बिवलकर ☆
☆
विठ्ठल विठ्ठल | चाले मुखी जप |
कैवल्याचे तप | प्रेमभाव ||१||
*
विठ्ठल विठ्ठल | जगाची माऊली |
मायेची सावली | वैष्णवांसी ||२||
*
विठ्ठल विठ्ठल | नामाचा गजर |
भक्तीचा सागर | अथांग हा ||३||
*
विठ्ठल विठ्ठल | संताचे वचन |
ज्ञानाचे लोचन | पाहण्यासी ||४||
*
विठ्ठल विठ्ठल | पडते पाऊल |
सुखाची चाहूल | पंढरीत ||५||
*
विठ्ठल विठ्ठल | जीवा लागे नाद |
सावळ्यासी साद | भक्तीमय ||६||
*
विठ्ठल विठ्ठल | पंढरीचा धनी |
वसलाय मनी | अंतरात ||७||
☆
© श्री आशिष बिवलकर
बदलापूर
मो 9518942105
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री तुकाराम दादा पाटील
कवितेचा उत्सव
☆ जीवाचा जिव्हाळा… ☆ प्रा तुकाराम दादा पाटील ☆
☆
डोईवर छान / शोभे वृंदावन
हातात निशाण / वैराग्याचे
*
एकरूप झाले / निर्गुण सगूण
धरता चरण / देवा तुझे
*
मनाला लाभते / नवीन उभारी
करताना वारी / पंढरीची
*
फाटका संसार / नेटका करीन
सुखात ठेवीन / घरदार
*
कृपाळू माऊली/ जीवाला लाभली
काया वेडावली /अभंगात
*
नित्य तुझी सेवा / घडो देवराया
मला तारावया / संसारात
*
जसा तुकोबांचा /झालास तू श्वास
मनाला विश्वास / तोच राहो
☆
© प्रा. तुकाराम दादा पाटील
मुळचा पत्ता – मु.पो. भोसे ता.मिरज जि.सांगली
सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३
दुरध्वनी – ९०७५६३४८२४, ९८२२०१८५२६
≈ संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈
सौ. वंदना अशोक हुळबत्ते
कवितेचा उत्सव
☆ वारी… ☆ सौ. वंदना अशोक हुळबत्ते ☆
☆
ओढ ग लागली | विठूच्या भेटीची |
निघाली ग वारी | ऐक सखी ||
*
फुक्या संसाराची | किती आस धरी |
हिशेब कर्माचा | देवादारी ||
*
वारी आली दारी | नको ग घोटाळू |
चल वारी करू | जिवेभावे ||
*
अंगणात विठू | भाकरीत विठू |
संसार ग माझा | विठूमय ||
*
नामा, तुका सांगे | भक्ती मार्ग श्रेष्ठ |
चरणाशी लीन | लेकरू हे ||
*
विठू नाम घेता | सार्थक जीवन |
उणे काय माझ्या | संसारात ||
☆
© सौ.वंदना अशोक हुळबत्ते
मो.९६५७४९०८९२
सांगली
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
महंत कवी राज शास्त्री
हे शब्द अंतरीचे # 182
☆ असे वाटले माझ्या मनाला… ☆ महंत कवी राज शास्त्री ☆
☆
असे वाटले माझ्या मनाला
पुन्हा एकदा बालक व्हावे
सोडोनी सर्व कष्ट चिंता
आपल्यात, आपण रमून जावे.!!
*
असे वाटले माझ्या मनाला
मित्र जुने मज भेटावे
विटी दांडू गोट्या कबड्डी
खेळ लिलया मग खेळावे…!!
*
असे वाटले माझ्या मनाला
लपाछपी रंगून जावी
खोडकर वृत्ती खेळण्यातली
त्याची एकदा उजळणी व्हावी…!!
*
असे वाटले माझ्या मनाला
शाळेत पट्कन लगेच बसावे
कमरे खाली घसरणारी चड्डी
हाताचा आधार, पळत सुटावे…!!
*
असे वाटले माझ्या मनाला
उचलून मला कुणीतरी घ्यावे
रडूनी सुजले डोळे जर-तर
खाऊसाठी पैसे मिळावे…!!
*
असे वाटले माझ्या मनाला
बोबडे बोल पुन्हा बोलावे
सोडूनि सर्व, कामे हातातली
आईने मज, दूध पाजावे…!!
*
असे वाटले माझ्या मनाला
काळ पुन्हा मागे सरकावा
मुक्त विहार करतांना कधी
वडिलांचा, प्रसाद मिळावा…!!
*
असे वाटता माझ्या मनाला
स्वप्नातून भानावर आलो
क्षणभर स्तब्ध होतांनाच
गालातल्या गालात, मी हसलो…!!
☆
© कवी म.मुकुंदराज शास्त्री उपाख्य कवी राज शास्त्री
श्री पंचकृष्ण आश्रम चिंचभुवन, वर्धा रोड नागपूर – 440005
मोबाईल ~9405403117, ~8390345500
≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ.गौरी गाडेकर≈
श्री रवींद्र सोनावणी
कवितेचा उत्सव
☆ आषाढीची वारी… ☆ श्री रवींद्र सोनावणी ☆
☆
नको काशी मथुरा वृंदावन दूर
चंद्र भागेतटी आहे माझे पंढरपूर
*
ज्ञानीयाचा राजा आळंदीचे ठाई
घेऊ या दर्शन नका करू घाई
पालखी सोहळा वैष्णवांचा मेळा
भक्ती संगम हा
भरून पाहू डोळा
*
लाख टाळ जमला पालख्या अपार
चंद्र भागेतटी आहे माझे पंढरपूर
*
आषाढाचे घन भरून येई मन
पंढरीच्या वाटे वारकरी जन
टाळमृदुंगाचा होतसे गजर
विठू दर्शनाशी भक्त हे आतुर
आठवता पांडुरंग तुटते अंतर
चंद्रभागे तटी आहे माझे पंढरपूर
*
संसाराची व्यथा टोचते सर्वथा
हरिनाम घेता नुरे काही चिंता
नासले आयुष्य सुख शोधू जाता
नको मोहमाया विठू एक भ्राता
*
विश्वासून त्याचेवर सोडीयेले घर
चंद्र भागेतटी आहे माझे पंढरपूर
☆
© श्री रवींद्र सोनावणी
निवास : G03, भूमिक दर्शन, गणेश मंदिर रोड, उमिया काॅम्पलेक्स, टिटवाळा पूर्व – ४२१६०५
मो. क्र.८८५०४६२९९३
श्री सुहास सोहोनी
कवितेचा उत्सव
☆ धन्य मी – कृतार्थ मी ☆ श्री सुहास सोहोनी ☆
☆
चार विभूती जन्मा आल्या
माझ्या भूमीवरती …
दु:खे पाहुनी त्यांची, मीही
अश्रु ढाळले किती …
*
विश्वोद्धारक रूपे त्यांची
आता दिसती मला…
भाग्यशालि मी आता झाले
मान मला लाभला
*
आनंदी मी आळंदी मी
भरून आले नेत्र …
ईश कृपेने झाले माझे
पवित्र तीर्थक्षेत्र ….!!
*
तृप्त मने आळंदी वदते
काहिच नाही कमी …..
धन्य मी अन् कृतार्थ मी …..
धन्य मी अन् कृतार्थ मी …..
☘️
अंगांगी रोमांच उमटला
इंद्रायणिच्या जळी …..
काय जाहले काहि कळेना
झाली सरिता खुळी …..
*
कसला झाला, कोणी केला
दिव्यत्वाचा स्पर्श …..
आनंदाचे तरंग उठले
मनि मावेना हर्ष …..
*
तुकयाने जव जळी बुडविली
पवित्र अभंग गाथा …..
त्या गाथेचा स्पर्श अलौकिक
सरिता टेकी माथा …..
*
इंद्रायणिची सखी जाहली
तुकयाची गाथा …..
वाळवंटी या अखंड चाले
निरुपण, कीर्तन, कथा …..
*
इंद्रायणिच्या कणाकणातुन
अजून उमटे ध्वनी …..
धन्य मी अन् कृतार्थ मी …..
धन्य मी अन् कृतार्थ मी …..
☘️
© सुहास सोहोनी
रत्नागिरी
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सुश्री नीलांबरी शिर्के
चित्रकाव्य
आभाळ भरून आलं
धरती भरात आली
पाऊस भूमी मिलना
वाट हळदुली झाली
*
हळदीच्या पखरणीने
जमीन दिसते देखणी
नव्हाळी चढे अंगावर
या फुलांच्या पखरणी
*
की वाट जाहली ही
जेजुरी गडाची वाट
खंडेरायाचा भंडारा
भक्ते उधळला दाट
*
वाट जेजुरीची हिच
हीच म्हाळसाईची वाट
जाता पुढेच लागेल
असा बाणाईचा घाट
*
या पिवळ्याची जादू
त्याच्या रंगातुन बोले
पीत फुलांची पखरण
किती आठवात आले !
☆
© सुश्री नीलांबरी शिर्के
