Category: कवितेचा उत्सव 2

श्रीशैल चौगुले

 कवितेचा उत्सव 

☆ हसरा वैशाख… ☆ श्रीशैल चौगुले ☆

☆

वैशाख हसतो

सत्य वाटते का ?

वैशाख,हसतोच हसतो

असत्य का वाटावे ?

बहावा-गुलमोहर फुलतो

कुठेतरी निर्मळ झरा वहातो

पाणंद झाडातून कोकिळ गातो

तापल्या मातीस आम्रतरु बिलगू पहातो

वैशाख हसतोच.

मनात आठवणी उदास भासती

रणरण उन्हाचे निसर्गही सोसती

तरी सांजवेळी डुंबताना दिवस रंगतो

वैशाख हसतोच हसतो

हे निर्विवाद सत्य….!

☆

© श्रीशैल चौगुले

डाॅ. निशिकांत श्रोत्री 

 कवितेचा उत्सव  

☆ मातृदिनानिमित्त : आई ☆ डाॅ. निशिकांत श्रोत्री ☆

☆

शीतल मोहक चांदण्यामध्ये चल ना आई जाऊ

घोस खुडूनी नक्षत्रांचे जीवनास नटवू ||धृ||

*

शिशुपणी मजला अपुल्या संगे उद्यानाअंतरी

थकली तरीही घेई उचलुनी मजला कडेवरी

कुठे पांग फेडू गे तव मी तुझाच तर सानुला

तव स्वप्नांच्या पूर्तीचा मी वसा मनी धरला   ||१||

*

बालपणीची शुभंकरोति निरांजनीची वात

भीमरूपी अन रक्षण करण्या रामरक्षेचे  स्तोत्र

स्वाध्यायी उत्कर्ष घडावा ध्यास कसा विसरू

ध्येय तुझे हे साध्य जाहले दुजा कुणा ना वाहू  ||२||

*

वियोग कधि ना तुझा घडावा  मनात एकच आंस

सुखशय्येवर तुला पहाणे हाच लागला ध्यास

सारे काही अवगत झाले तुझीच गे पुण्याई

दंभ नको ना अहंकार या संस्कारा तू देई ||३||

☆

© डॉ. निशिकान्त श्रोत्री

सौ. गौरी गाडेकर

कवितेचा उत्सव

☆ मातृदिनानिमित्त – बाईपण भारी देवा ☆ सौ. गौरी गाडेकर ☆

(This is how the mother feels 🙂

☆

मी आई आहे म्हणुनी

पिल्लांवर छाया धरते

ती मोठी झाली तरीही

मी चिंता त्यांची करते.

*

मी आई आहे म्हणुनी

अस्तित्व हरवले माझे

मज कधी वाटते भीती

पिल्लांवर माझे ओझे.

*

मी आई आहे म्हणुनी

माझी सारी पुण्याई

बछड्यांच्या कामी यावी

ही विनवणी देवापायी

*

मी आई झाले म्हणुनी

लाभला मला नव जन्म

आईपण मिरवत गेले

मम धन्य जाहला जन्म.

☆

© सौ. गौरी गाडेकर

संपर्क – 1/602, कैरव, जी. ई. लिंक्स, राम मंदिर रोड, गोरेगाव (पश्चिम), मुंबई 400104.

फोन नं. 9820206306

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री आशिष  बिवलकर

  चित्रकाव्य  

– आठवणी दाटतात… –  ☆श्री आशिष  बिवलकर ☆

☆

गुंतलेल्या रेखांचं भावविश्व माझं,

त्यात मी जगत आहे |

गुंता जरी किती असला जीवनी,

माझा मी सोडवत आहे |

*

सुखाच्या रेशांनी,

कधी हुरळून जात नाही |

दुःखाच्या रेघोट्यानी,

कधी पळून जात नाही |

*

अपेक्षाभंग जरी आला नशिबी,

निराशेची चादर ओढत नाही |

क्षणिक सुख दुःखाच्या पेल्यात,

सहजासहजी बुडत नाही |

*

वादळे किती जरी आली,

झेलण्याची जिद्द आहे उरात |

आभाळ जरी कोसळलं,

पाय रोवून संकटांच्या दारात |

*

अमृत कुंभाचा मोह नाही,

हलाहल कंठात साठवतो |

मृत्यू असो वा अमरत्व,

जटा भस्मात गोठवतो |

*

खडतर जीवन वाटेवर,

माझ्या पावलांचे ठसे उमटतात |

मागे वळून पाहताना,

संघर्षाच्या आठवणी दाटतात |

☆

© श्री आशिष  बिवलकर

बदलापूर

मो 9518942105

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री तुकाराम दादा पाटील

 कवितेचा उत्सव 

☆ साठमारी… ☆ प्रा तुकाराम दादा पाटील ☆

☆

आजच्या राजकारणापेक्षा

पूर्वीची साठमारी बरी होती

मैदानावर जीव खाऊन पळता येत होतं

अंगावर घेत पिसाळलेला हत्ती….

*

हरलो तर त्याच्या पायाखाली चिरडून एकदाच मरून मुक्त होता येत होतं

मिटत होत्या कायमच्या यातना

पण आत्ताच्या या मग्रूर सांडांच्या लढाईत

धडपणे मरताही आणि जगताही येत नाही माणसाला

नरकवासातील यातना भोगत जिवंत राहून करायचं तरी काय ?

*

जिथे परंपरागतांच्या तोंडचा मालकीहक्काचा घासच हिरावून घेतला जात आहे

त्यांनीच निवडून दिलेल्या दानवाकडून

त्याना शासनतरी करणार कोण ?

*

मायभूमीवर किड्यामुंग्यांचा नाही

माणसांचा रहीवास आहे

हेच विसरलेत शासनकर्ते

*

एकामेकांची उणीदुणी काढत ही गिधाडं सामान्यांचे लचके तोडत

आपलं अस्तित्व शाबूत ठेवून आरामात जगण्यात मश्गूल

राहून

आमचीच दिशाभूल करत आहेत

*

सामान्यानो जागे व्हा हीच ती नेमकी वेळ आहे.

देशाला सावरण्याची आणि मातलेल्या पुंडपाळेगाराना आवरण्याची

*

वणव्यात जळून मरण्यापेक्षा

तो विझवण्यासाठी प्रयत्न करुया

एकजूटीने आपल्या

जागते रहा रात्र वै-याची आहे.

☆

© प्रा. तुकाराम दादा पाटील

मुळचा पत्ता  –  मु.पो. भोसे  ता.मिरज  जि.सांगली

सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३

दुरध्वनी – ९०७५६३४८२४, ९८२२०१८५२६

≈ संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈

श्री सुनील देशपांडे

 कवितेचा उत्सव 

☆ “मतदान करू…” ☆ श्री सुनील देशपांडे ☆

☆

चला चला मतदान करू

लोकराज्य मजबूत करू

*

लोकशाहीची फळे मधुर हो

मतदानास्तव तुम्ही चतुर हो

योग्य तया मतदान करू

लोकराज्य मजबूत करू

*

लोकशाही मजबूत हवी जर

पाऊस थंडी गर्मी जरी वर

केंद्रावरती गर्दी करू

लोकराज्य मजबूत करू

*

लोकशाहीचा उत्सव करूया

सुट्टी पिकनिक नंतर करूया

चला घरा बाहेर पडू

लोकराज्य मजबूत करू

☆

© श्री सुनील देशपांडे

मो – 9657709640

email : [email protected]

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री प्रमोद वामन वर्तक

 कवितेचा उत्सव  

☆ 🕺 जा ही र ना मा ! 🤣 ☆ श्री प्रमोद वामन वर्तक ☆

☆

जा हीरनामा सर्वच पक्षांचा

असतो एक पोकळ मनोरा,

अशक्यप्राय अशा वचनांनी

उभा करती सारा डोलारा !

*

हि तगुज करती मतदार राजाशी

त्याच्या चंद्रमौळी घरात,

भाकर तुकडा “फोटोसाठी”

खाती त्याच्याच ताटात !

*

र स्तोरस्ती काढून मिरवणूका

लोकांचा करती खोळंबा उगाच,

कर्णकर्कश्य आवाजाने होतो

फुका ध्वनी प्रदूषणाचा जाच !

*

ना ही आठवत वचननामे त्यांना

एकदा निवडून आल्यावर,

 चार हात दुरून करती नमस्कार

 जे आधी असायचे खांद्यावर !

*

मा मा बनतो भोळा मतदार

 मतदान इमाने इतबारे करतो,

 न झाल्याने वचनांची पूर्ती

 पुन्हा पाच वर्षे मनी झुरतो !

 पुन्हा पाच वर्षे मनी झुरतो !

☆

© प्रमोद वामन वर्तक

संपर्क – दोस्ती इम्पिरिया, ग्रेशिया A 702, मानपाडा, ठाणे (प.)

मो – 9892561086 ई-मेल – [email protected]

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈