प्रा. सौ. सुमती पवार
कवितेचा उत्सव
☆ पहा एका रांगोळीने… ☆ प्रा. सौ. सुमती पवार ☆
☆
अंगणात रेखियली एक रांगोळी सुंदर
माझे अंगण वाटले मग मलाच चंदन
घर झाले सुशोभित पहा एका रांगोळीने
मनोमन केले मग रांगोळीलाच वंदन…
*
येते अंगणाला शोभा फक्त एका रांगोळीने
जशी माणसाला शोभा येते पहा आंघोळीने
शुचिर्भूत होते घर दारी रांगोळी हासतां
जसे शोभतात देव लावताच चंदनाने…
*
लक्षुमीची पाऊले ती दारी शोभती गोपद्मे
लखलख निरांजने बागा शोभती उद्याने
सारी नक्षत्रे नि तारे उतरती अंगणात
मनी अस्फूट अस्फूट जणू सृष्टी गाते गाणे…
*
लखलख लखलख जणू आकाश अंगणी
असे प्रकाशाचे पर्व सारे साधती पर्वणी
आनंदाचे अंगअंग आनंदाचे रंगरंग
मनी झुलतात झोके घरोघर ते चंदनी..
*
गलगलं गलगलं असा सण दिवाळीचा
मंगल उटणे सुगंधी पवित्र त्या अभ्यंगाचा
भाऊबहिणीचा सण तसा सण पाडव्याचा
लाडू करंजी कडबोळी अनरसे चिवड्याचा…
*
घमघमाट नि तृप्ती ओसांडते मुखावर
रोषणाई नि चांदण्या उतरती घरावर
देवदेवतांची कृपा बरसती आशीर्वाद
मग दिवाळीचा वाढे पहा आणखीन स्वाद…
☆
© प्रा.सौ.सुमती पवार
नाशिक
(९७६३६०५६४२)
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री प्रमोद वामन वर्तक 
वाचताना वेचलेले 
