श्री अशोक श्रीपाद भांबुरे
अशोक भांबुरे जी यांची कविता अभिव्यक्ती # 275
☆ कर शिलाई… ☆ श्री अशोक श्रीपाद भांबुरे ☆
☆
उसवलेली जोड नाती कर शिलाई
जोड आता सर्व जाती कर शिलाई
*
चप्पलेचा फक्त तुटला अंगठा तर
फेकतो का घेत हाती कर शिलाई
*
वार शब्दांचे किती हे खोल झाले
फाटलेली खोल छाती कर शिलाई
*
फाटक्या कपड्यातली ही माणसे बघ
आज आशेने पहाती कर शिलाई
*
जोडणारा तू असा माणूस हो ना
जगभरी होईल ख्याती कर शिलाई
*
कापडाचे कैक धागे जोडणारा
तूच धागा तू स्वजाती कर शिलाई
*
सज्जनांचे काम असते जोडण्याचे
संत हेची सांगताती कर शिलाई
☆
© श्री अशोक श्रीपाद भांबुरे
धनकवडी, पुणे ४११ ०४३.
मो. ८१८००४२५०६, ९८२२८८२०२८
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
वाचताना वेचलेले 
