Tag: #मराठी-कविता

श्रीशैल चौगुले

 कवितेचा उत्सव 

☆ आयुष्य… ☆ श्रीशैल चौगुले ☆

☆

निघून जातील घन

ढळत्या थेंबांची वर्षा

नाचती हरित धरा

हळव्या वायूचे स्पर्शा.

*

तिथे कुठेतरी मन

लपून अजून आहे

इंद्रधनू स्पंदनात

दुःखही सजून आहे.

*

म्हणून आवडे ऋतू

स्मृतीत स्वच्छंदी नभ

भिजरे सतत भाव

भुमीस सुखाचा लोभ.

*

किमया निसर्ग माया

कळीचे पाकळी फूल

उमले आयुष्य नवे

जन्माची गतीक भूल.

☆

© श्रीशैल चौगुले

श्री प्रमोद वामन वर्तक

 कवितेचा उत्सव  

🙏 जरी वाजले सूप 🙏 श्री प्रमोद वामन वर्तक  

   आली म्हणता म्हणता

येवून सरली दिवाळी,

ठेवा भरून डब्यात

आता शिल्लक रांगोळी !

*

चिवडा चकली शेवेचा

उरला असेल जर चुरा,

करून रविवारी मिसळ

त्याचा तुम्ही वापर करा !

*

ताट लक्ष्मी पूजनाचे

ठेवा नीट सांभाळून,

पुढच्या वर्षी दुप्पट

भर घालायची ठरवून !

*

धुरात पुन्हा फटाक्याच्या

कधी पैसे टाकू नका,

अनाथांना दान देण्याचे

मनाशी ठरवून टाका !

*

जरी संपला हा दीपोत्सव

तेवत ठेवा स्वप्नांचे दीप,

निर्धार करुनी स्वप्नपूर्तीचा

मान मिळवा जगी खूप !

मान मिळवा जगी खूप !

© श्री प्रमोद वामन वर्तक

संपर्क – दोस्ती इम्पिरिया, ग्रेशिया A 702, मानपाडा, ठाणे (प.) – 400610 

मो – 9892561086 ई-मेल – [email protected]

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री आशिष  बिवलकर

  चित्रकाव्य  

– काय पावसा…–  ☆ श्री आशिष  बिवलकर ☆

☆

काय पावसा,

मुक्काम वाढवलास तू.

दसऱ्याला सीमोल्लंघन करता करता,

दिवाळीसाठी थांबलास तू.

 

काय पावसा, 

शेतात पिकवलं होतंस तू.

तोंडात घास देता देता,

असं कसं हिसकावलंस तू.

 

काय पावसा,

तहान भागवलीस तू.

धरण भरता भरता,

काठ वाहून नेलास तू.

 

काय पावसा,

छान बरसला होतास तू.

पाय काढता काढता, 

थयथयाट केलास तू.

 

काय पावसा,

सारं हिरवंगार केलंस तू.

पण.. उन्मत्त होऊन कोसळता कोसळता,

डोळ्यात पाणी आणलेस तू. 

☆

© श्री आशिष  बिवलकर

बदलापूर

मो 9518942105

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ. वृंदा गंभीर

कवितेचा उत्सव

☆ माहेराची ओढ…  ☆ सौ. वृंदा गंभीर ☆

☆

किती लागली जीवाला ओढ

संसारातून सापडेना कधी वाट

माहेरची जाईना आठवण मनातून

अवघड आहे हा संसाराचा घाट

*

दीपावली ला जावे आईस भेटावे

भाऊबीज करून माघारी फिरावे

आठवणीने वाहे पाणी डोळ्यातून

वेड्या मनाला सांगा कसे सावरावे

*

नको काही भाऊराया फक्त प्रेम

तुझी चटणी भाकरी लागते गोड

माहेरा वाचून नाही उरला राम

भावाबहिणीचे काही सुटेना हे कोडं

*

सुखी आहे सासरी यावे माहेरी

क्षणाचा तो आनंद बळ देई संसारी

एकच आहे अपेक्षा प्रेम कमी नको

वर्षातून एकदा जागा हवी माहेरी

☆

© सौ. वृंदा पंकज गंभीर (दत्तकन्या)

न-हे, पुणे. – मो न. 8799843148

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री तुकाराम दादा पाटील

 कवितेचा उत्सव 

☆ अनोळखी… ☆ प्रा तुकाराम दादा पाटील ☆

☆

कधी तरी एखाद्या भयाण शांत वेळी

उचंबळूनयेतो मनाचा तळ आक्रस्ताळी

आकाश घुमवत जाते एक किंकाळी

तमा न बाळगता एकाकी असल्याची…

 

जगण्याच्या अनावर ओढीन जगलेले

पोरके दिवस आठवतात

हल्लेखोरासारखे येतात अंगावर

तेव्हा तरी मी कुठे असतो माझ्यात‌.

भलत्याच क्रांतीकारक गर्जनात

वाहून गेलेला असतो दूर दूर आसमंतात…

 

पुन्हा माझं अस्तित्व गोळा करायला

खूप करावे लागतात सायास

तरीही असतोच काही अंशी विखूरलेला.

इथेतिथे पडद्यामागे अस्तित्वाच्या

भविष्याचे करत अवलोकन

भयाण असणा-या…

 

एकटाच, अनोळखी

मलाच मी ओळखत नसलेला…

☆

© प्रा. तुकाराम दादा पाटील

मुळचा पत्ता  –  मु.पो. भोसे  ता.मिरज  जि.सांगली

सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३

दुरध्वनी – ९०७५६३४८२४, ९८२२०१८५२६

≈ संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈

सुश्री स्वाती सुरंगळीकर

परिचय

शिक्षण : MSc BEd,  Ex लेक्चरर (नागपुर)

कवयित्री- एकपात्री कलाकार

• कवितांचे केवळ वाचन ;पठण किंवा गायन न करता माफक देहबोली आणि वाचिक अभिनयातून कविता सादर करण्याची वेगळी शैली.
• गेल्या 25 वर्षांपासून ; देश विदेशात (अमेरिका, कॅनडा,  ऑस्ट्रेलिया, दुबई ) काव्य सादरीकरणाचे एकपात्री प्रयोग सुरू.”दिलखुलास” चा 500 वा प्रयोग नुकताच नागपूर येथे सादर झाला.
• चारोळी संग्रह, ३ कवितासंग्रह
• काव्यवाचनाची ध्वनीफीत आणि एकपात्री कार्यक्रमाची DVD प्रकाशित.
• इंटरनॅशनल पोएट्री फेस्टीव्हल अ भा साहित्य संमेलन,  विदर्भ साहित्य संमेलन, औंध साहित्य संमेलन (पुणे), पुणे फेस्टिवल, भीमाफेस्टिवल, अ .भा. नाट्य संमेलन नागपूर
• इ टीवी मराठी च्या साहित्य दरबार कार्यक्रमात सहभाग.

सन्मान –

• वर्ष २०२२ चा मानाचा “बालगंधर्व एकपात्री कलाकार पुरस्कार” प्राप्त.
• काव्यशिल्प पुणे च्या काव्यस्पर्धेत प्रथम पुरस्कार;
• रंगत संगत प्रतिष्ठान चा “हास्यरंगत “सन्मान;
• कै माई देशपांडे प्रतिष्ठान चा काव्यगौरव पुरस्कार;
• ‘पद्मगंधा प्रतिष्ठान‘ नागपुरचा “काव्यपद्म” व’अभिव्यक्ती’ ‘वैदर्भीय लेखिका संस्थेचा, “लक्षवेधी कवयित्री” सन्मान

 कवितेचा उत्सव 

☆ अनासक्त… ☆ सुश्री स्वाती सुरंगळीकर ☆

☆

त्याच्या मुखी हरिनाम ,

तो भक्तीत रंगलेला…

तीही  प्रपंचात दंग,

करी संसार चांगला !

*

सदा त्याच्या वागण्यात,

विरक्ती ही दाटलेली…

तिची सर्वांवर छाया,

नाही माया आटलेली!

*

विठोबाच्या दर्शनाला,

निघाली घरून दोघं…

डोईवर होतं थोडं,

घर-संसाराचं ओझं !

*

आड-वाटेवर त्याने,

पाहिले सोन्याचे कडे…

कसे लपवावे त्यास?

मनामध्ये प्रश्न पडे !

*

या संसारी बायकोचे,

जर का गेले लक्ष…

ती घेईल उचलून,

आहे ना संसारदक्ष !

*

कड्यावर हळू त्याने,

लोटली थोडीशी माती…

निघाला वेगाने पुढे,

घेत कानोसा मागुती !

(चमकून ती म्हणाली..)

अहो ! काय केले तुम्ही?

मती तुमची फिरली!

सांगा तुम्ही कशापायी?

माती ,मातीनं झाकली !

*

गेला तुम्ही विसरून,

माऊलीची शिकवण…

सोने चांदी हीरे मोती,

असती मृत्तिकेसमान !

असती मृत्तिकेसमान !!

☆

© सुश्री स्वाती सुरंगळीकर

≈ संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈

सुश्री नीलांबरी शिर्के

श्री हरिश्चंद्र कोठावदे

 कवितेचा उत्सव 

☆ दिव्यात ज्योती जळत राहिली… ☆ श्री हरिश्चंद्र कोठावदे ☆

☆

 तूफानांशी लढत राहिली

 दिव्यात ज्योती जळत राहिली

*

 रक्ताला या मनस्वितेचा

 जन्मजात अभिशाप असावा

 म्हणुन कदाचित घुमटामध्ये

 नाद निनावी घुमत असावा

*

 सूर आतला जपत राहिली

 दिव्यात ज्योती जळत राहिली

*

 वर्मावरती घाव कुणाचा

 छिन्नभिन्न नभ, धरा फाटली

 हळूहळू मी केली गोळा

 शकले माझी विखूरलेली

*

 राखेतुनही उठत राहिली

 दिव्यात ज्योती जळत राहिली

*

 अभिजाताच्या साहित्याने

 अक्षरांस या दिधली दीक्षा

 एकच भाषा रक्ताश्रूंची

 एकच अग्नी, अग्निपरीक्षा

*

 मंत्र दिशांचे पठत राहिली

 दिव्यात ज्योती जळत राहिली

*

 कधी अचानक गोठुन गेले

 प्राणामधले निर्झर सारे

 माझ्या सोबत अंत कथेचा

 वाटे आता सरले सारे

*

 घटात अमृत भरत राहिली

 दिव्यात ज्योती जळत राहिली

*

 सवंग पेठा अनुबंधाच्या

 लागू होत्या अटी नि शर्ती

 उपचारास्तव केवळ उरल्या

 उचंबळाच्या रेशिमगाठी

*

 बहिष्कृतासम भ्रमत राहिली

 दिव्यात ज्योती जळत राहिली

*

 सरतिल दुःखे विझतिल वणवे

 गातिल पक्षी रानोरानी

 वीराण्यांवर निशागितांच्या

 झरेल नक्षत्रांचे पाणी

*

 स्वप्नास्तव या जगत राहिली

 दिव्यात ज्योती जळत राहिली !

☆

© श्री हरिश्चंद्र कोठावदे

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈