कविराज विजय यशवंत सातपुते
कवितेचा उत्सव # 188 – विजय साहित्य
☆ बालकृष्णा ☆ कविराज विजय यशवंत सातपुते ☆
बालपणी बालकृष्णा
होती आवड काल्याची
दुध साय दही लोणी
होती श्रीमंती घराची…! १
धष्टपुष्ट होण्यासाठी
हवा सकस आहार
दही दुध लोण्यासाठी
पडे गोविंदाला मार…! २
गोपालांचे घरदार
दह्या दुधाचा सागर
देई मिळवोनी धन
हेची सुखाचे आगर…! ३
मथुरेच्या बाजारात
दूध दही विकोनीया
चरितार्थ गोपालांचा
दुग्धामृत सेवुनीया..! ४
दुध दही विकताना
नको मुलांची आबाळ
चोरी करून लोण्याची
येई कृष्णावर आळ..! ५
बालकांना चुकवोनी
दही हंडी शिंक्यावरी
चोरूनीया लोणी खाणे
दंगामस्ती घरोघरी…! ६
उंच मानवी मनोरा
रचुनीया गोपालांचा
हाती लागे दहीहंडी
मेवा हाती रे लोण्याचा..! ७
बाळलीला गोकुळीच्या
त्यात कृष्ण सामावला
फोडूनीया दहीहंडी
कृष्ण अंतरी धावला..! ८
हंडी दही उत्सवाने
दिला ऐक्याचा संदेश
आला आला रे गोविंदा
त्याचा आगळा आवेश..! ९
बाल गोपालांची लिला
साठवण शैशवाची
दहीहंडी जपतसे
आठवण गोकुळाची..! १०
© कविराज विजय यशवंत सातपुते
सहकारनगर नंबर दोन, दशभुजा गणपती रोड, पुणे. 411 009.
मोबाईल 8530234892/ 9371319798.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
– गुरू… – 
