Tag: #मराठी-कविता

श्री मुबारक उमराणी

 कवितेचा उत्सव 

☆ आले आले ढग… ☆ श्री मुबारक उमराणी ☆

☆

आले आले ढग ढग

रानी पेरीत काजळ

झाडे आनंदात दंग

धारा वाहे खळ खळ

 *

अवखळ पोरे खेळी

रानोमाळ सूरपाट्या

संगतीला फुलबाळे

गंध देत वाट्या वाट्या

 *

पावसाचे येता थेंब

धूळ होई थेंब धार

पान पान शहारता

झाड होई गार गार

 *

माती गंधाळ गंधाळ

रात सुगंधात दंग

हर्ष उल्हासी होऊन

वारा वाजवी मृदंग

*

थेंब स्पर्श होताक्षणी

माती होई ओली ओली

रात माऊली होऊन

गीत अंगाई ती बोली

☆

© श्री मुबारक उमराणी

राजर्षी शाहू काॅलनी, शामरावनगर, सांगली

मो.९७६६०८१०९७.

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ. गौरी गाडेकर

 वाचताना वेचलेले 

☆ आनंद… कवी – अज्ञात ☆ प्रस्तुती – सौ. गौरी गाडेकर ☆

☆

मी पेपर उघडला,

त्यात  मीच दिलेली

जाहिरात होती

 

‘हरवला आहे ..आनंद

पत्ता विसरण्याचा त्याला आहे छंद …

 

रंग … दिसेल तो

उंची ..भासेल ती

 

कपडे सुखाचे

बटण  दुःखाचे

 

कुणाला न सांगता घरातून गेला आहे निघून

थकलो आहोत सगळीकडे शोधून

 

आनंदा , परत ये

कुणीही तुझ्यावर रागवणार नाही

तुझ्यावर  कसलीही सक्ती करणार नाही

 

घरातले सगळे आसुसून बघताहेत तुझी वाट

दार उघडं ठेवलंय वाढून ठेवलंय आशेचं  ताट

 

शोधून आणणाऱ्याला दिलं  जाईल इनाम‘

 

मग म्हटलं आपणच करावं हे  काम

काय आश्चर्य! सापडला की गुलाम

 

जुन्या पुस्तकाआड

जुन्या गाण्याच्या अर्थाच्या पल्याड

 

आठवणींच्या मोरपिसात

अगरबत्तीच्या मंद वासात

 

हवेच्या थंडगार झुळूकेत

लाटांच्या हळुवार स्पर्शात

 

अवेळी येणाऱ्या पावसात

प्राण्यांच्या  मखमली स्पर्शात

 

त्यानेच मारला पाठीत धप्पा

जुन्या मित्र मैत्रिणींशी मारताना गप्पा

 

मी म्हटलं ‘अरे ,

इथेच होतास ?

उगाच दिली  मी जाहिरात‘

तो म्हणाला,’वेडी असता तुम्ही माणसं

बाहेर शोधता

मी असतो तुमच्याच मनात

☆   

 लेखक : अज्ञात 

संग्राहिका : सौ. गौरी गाडेकर

संपर्क – 1/602, कैरव, जी. ई. लिंक्स, राम मंदिर रोड, गोरेगाव (पश्चिम), मुंबई 400104.

फोन नं. 9820206306

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री प्रमोद वामन वर्तक  

  चित्रकाव्य  

🙏🌹 उ स्ता द ! 🌹🙏 श्री प्रमोद वामन वर्तक ☆

☆

बोलविता धनी तबल्याचा 

आज मैफिलितूनी उठला 

ऐकून ही दुःखद बातमी 

रसिकांचा ठोका चुकला

*

केस कुरळे शिरावरती 

बोलके डोळे जोडीला 

सुहास्य गोड मुखावरचे 

दिसत होते शोभून त्याला

*

मृदू मुलायम बोलण्याची 

होती त्याची गोड शैली 

जाता जाता करून विनोद 

हळूच मारी कोणा टपली 

*

आज झाला तबला मुका 

तो होता अल्लाला प्यारा 

करती कुर्निंसात दरबारी   

येता उस्ताद त्यांच्या दारा 

☆

© प्रमोद वामन वर्तक

संपर्क – दोस्ती इम्पिरिया, ग्रेशिया A 702, मानपाडा, ठाणे (प.) 400610 

मो – 9892561086 ई-मेल – [email protected]

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री आशिष  बिवलकर

  चित्रकाव्य  

आंतरराष्ट्रीय भ्रष्टाचार-विरोधी दिन…  श्री आशिष  बिवलकर ☆

☆

कर्तव्याचा लिलाव,

बिनधास्त चाले |

देण्याघेण्याचे काय

सर्रासच बोले |

*

वाळवी पोखरत,

जाते सर्व काही |

अंतरात्मा कुणाचा,

जिवंत न राही |

*

बुडापासून शेंड्यापर्यंत,

लागलीय ही कीड |

यंत्रणा झाली सर्व भ्रष्ट,

चेपलीय साऱ्यांची भीड |

*

पकडला  जो जाई,

त्यास म्हणते जग चोर |

पण तो सही सलामत सुटे,

कायद्यातल्या पळवाटा थोर |

☆

© श्री आशिष  बिवलकर

बदलापूर

मो 9518942105

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री तुकाराम दादा पाटील

 कवितेचा उत्सव 

☆ समर्थ वाणी… ☆ प्रा तुकाराम दादा पाटील ☆

☆

बरे असावे सुखी जगावे खरेच सारे मनात आहे

नमून घ्यावे तसेच द्यावे रिवाज हा ही जगात आहे

*

भले पणाच्या परिश्रमाने अमोल ठेवा घरात येतो

अजून नाही कुणास ठावे भविष्य लपले श्रमात आहे

*

मला कशाची जरूर नाही फिकीर नाही करावयाची

धनाढ्य मोठा असेल कोणी म्हणेल तोही भ्रमात आहे

*

पराभवाच्या अनूभवाने विशाल बुद्धी सतेज होता

जिथे कुठे मग अडेल तेथे विचार केला निवांत आहे

*

निभावताना जबाबदारी असेल कोणी हताश झाला

जपून त्याला उरी धरावा असा जगाच प्रघात आहे

*

पुराणपोथ्या लिहून गेले विचार त्यांचे समोर ठेवा

दुरावलेली मने जपाया उपाय त्यांच्या कथात आहे

*

जमेल तेथे जगावयाची सुरेख संधी लुटावयाला

सरावलेली समर्थ वाणी जपेल त्यांच्या मुखात आहे

☆

© प्रा. तुकाराम दादा पाटील

मुळचा पत्ता  –  मु.पो. भोसे  ता.मिरज  जि.सांगली

सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३

दुरध्वनी – ९०७५६३४८२४, ९८२२०१८५२६

≈ संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈

सौ. वृंदा गंभीर

कवितेचा उत्सव

☆ विरह… ☆ सौ. वृंदा गंभीर ☆

☆

तूझ्या प्रेमास मी भुलाले

तुझ्या शब्दात मी अडकले

केला नाही विचार कुणाचा

तुझ्यावर विश्वास ठेवत गेले

 *

तुझ्याकडे मी ओढत गेले

तुझ्याविना जगणे विसरून गेले

जात नाही दिवस एक ही असा

तुझ्या आठवणीत रडत राहिले

 *

प्रेम करायला का शिकवले

स्वप्न मनास का दाखवले

द्यायचा होता हा विरह मला

साथ देण्याचे का वचन दिले

 *

तुझ्या प्रेमात वाहून गेले

तुझ्या सहवासात रमुन गेले

नको करू विचार तू वेगळा

प्राण माझे कंठात आले

☆

© सौ. वृंदा पंकज गंभीर (दत्तकन्या)

न-हे, पुणे. – मो न. 8799843148

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ. ज्योती कुळकर्णी 

 कवितेचा उत्सव 

☆ निराळे कायदे…☆ सौ. ज्योती कुळकर्णी ☆

(आनंदकंद)

☆

भागीरथीत जाती पापे कितीक धुतली

होते मलीन ती जर आहे प्रथाच  इथली

 *

रानात सिंह राजा प्राणीच भक्ष्य त्याचे 

मांडून कायद्याला टाळी तुम्हीच पिटली

 *

वाटे कुणास नारी अन्याय सोसणारी

केले असूर मर्दन तेव्हा सुखात निवली

 *

विश्वास ठेवला पण त्यानेच घात केला

नात्यास शुद्ध म्हणतो जाणून लाज विकली

 *

मिळतो बरा तुम्हाला बाहेर न्याय सहजी

न्यायालयात माझी नाणी बरीच झिजली

☆

© सौ. ज्योती कुळकर्णी

अकोला

मोबा. नं. ९८२२१०९६२४

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈