सौ.ज्योत्स्ना तानवडे
कवितेचा उत्सव
☆ शब्दसखी ☆ सौ.ज्योत्स्ना तानवडे ☆
रमले तुझ्यात आणि
झाला जीवास आधार
संवाद तुझ्याशी होता
तू शब्दसखी साकार ||
लागला तुझाच ध्यास
मन नित्य गुंतलेले
साथ तुझी लाभताना
शब्दहार गुंफलेले ||
मोठी शक्ती तुझ्याठायी
आनंद प्रसवतेस
शब्दफुले फुलताना
चांदणे फुलवतेस ||
तुझी साथ लाभल्याने
भाग्य माझे उजळले
तुझ्या संगतीत आता
सृजनात मी गुंतले ||
शब्दांचे प्रेम म्हणजे
सरस्वती वरदान
त्याच्या संगतीने घडो
नित्य लेखणी पूजन ||
© सौ.ज्योत्स्ना तानवडे
वारजे, पुणे.५८
≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈
वाचताना वेचलेले 
जरी वाजले सूप…. 
