सौ.ज्योत्स्ना तानवडे
कवितेचा उत्सव
☆ फेर श्रावणाचा ☆ सौ.ज्योत्स्ना तानवडे ☆
आला श्रावण सणांचा
बरसणाऱ्या धारांचा
नाना रुपी फुलणाऱ्या
निसर्गाच्या किमयेचा ||
क्षणी उन क्षणी धारा
इंद्रधनुचा नजारा
सुवासिक फुले पाने
गर्द हिरवा फुलोरा ||
दरवळे पारिजात
लक्ष फुलांचा नवस
बेल पत्रींनी सजली
देवघराची आरास ||
नागपंचमीचा सण
मन माहेराला जाते
झोका बांधला लिंबाला
उंच झुलूनिया येते ||
आहे शेतात वारूळ
नागराजाचे राऊळ
पूजा करुनी सयांचे
किती रंगतात खेळ ||
झिम्मा फुगड्या रासाचे
भारी वाटे आकर्षण
श्रद्धा भक्ती उत्साहाचा
आला लाडका श्रावण ||
© सौ.ज्योत्स्ना तानवडे
वारजे, पुणे.५८
≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈
तो सागरी किनारा✒ कविराज विजय यशवंत सातपुते ☆
वे ध ! 
