Tag: #मराठी-कविता

सौ.अस्मिता इनामदार

☆ कवितेचा उत्सव ☆ शब्दुली….. ☆ सौ.अस्मिता इनामदार ☆ 

आकाशात    अचानक

ढग भरूनीया आले

आणि डोळ्यातून माझ्या

असे कसे कोसळले?

*

चार शब्द तुझे आणले

चार  शब्द माझे आणले

बांधला त्याचा झुला

अन् आभाळपर्यंत पोचले

*

प्रत्येक नव्या ओळखीतून

नवे नाते अंकुरले

आणि मग नकळत

जीवन उमलून आले.

*

असे कसे मन माझे

रानावनात रमते

माणसांच्या गर्दीतही

मुके मुकेच राहते.

*

नको माणसांचा संग

नको घराचा निवारा

गच्च हिरव्या रानात

फुटे सुखाला धुमारा.

*

© सौ अस्मिता इनामदार

पत्ता – युनिटी हाईटस, फ्लॅट नं १०२, हळदभवन जवळ,  वखारभाग, सांगली – ४१६ ४१६

मोबा. – 9764773842

≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित ≈

सुश्री स्नेहा विनायक दामले

 ☆ कवितेचा उत्सव ☆ कसे जगावे…. ? ☆ सुश्री स्नेहा विनायक दामले ☆ 

कसे जगावे, कसे जगावे ?

कसे जगावे, कसे जगावे ?

असे जगावे, असे जगावे.

जन्मदात्यांचा अभिमान असावे,

जोडीदाराची खंबीर साथ व्हावे,

मुलांसाठी कर्तव्यदक्ष सावली असावे,

नातवंडांसाठी प्रेमळ हाक व्हावे,

इष्टमित्रांसाठी मदतीचा हात असावे,

कुणाच्या पाठीवरची प्रेरक थाप व्हावे..

ईश्वराचे लाडके होऊन रहावे,

पडणार्‍यास आधार असावे ,

चुकलेल्यास वाट व्हावे..

चंदनाचा वृक्ष व्हावे,

आसमंतास सुगंधित करावे,

पोळलेल्यास सुखवावे..

मंडळी,

असे जगावे, असे जगावे,

सत्श्रद्धा जपत,

श्रद्धास्थानच होऊन जावे,

जगण्याचा आदर्श व्हावे.

© सुश्री स्नेहा विनायक दामले

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित  ≈

श्री शामसुंदर महादेवराव धोपटे

☆ कवितेचा उत्सव ☆ नियम सृष्टीचा ☆ श्री शामसुंदर महादेवराव धोपटे ☆

हृदयाच्या गर्भातील लाव्हा

जेव्हा  जेव्हा उसळतो

बांध मनीचा बघ कसा

माघारी त्या फिरवितो.

पण उद्रेक त्याचा होई जेव्हा

जीव वेडा तळ मळे.

सुख वेदनांचे काय असते

तेही बघ, तेव्हाची कळे

जलाशयाच्या आत्म्याला

तो ग्रीष्म जेव्हा तपवितो

बाष्प रूप करण्या धारण,

जीव कसा हो तळमळतो

पण बरसताच जलधारा

मनमोर कसा  नाचतो

मोद नवयौवनाचा वसुंधरेला  तेव्हाची कळे.

धरतीच्या पोटात

बीज वृक्षाचे जेव्हा पडते

उष्म्याच्या प्रभावी

बघ ते कसे गुदमरते

जलधारा त्या मृगाच्या

अंगार कसा हो शमविते

अंकुरण्याचा, तरू बनण्याचा आनंद मग

तेव्हाची कळे

तळमळणे, गुदमरणे.

अंकुरणे, बहरणे

सळसळणे, डोलणे

नियमसृष्टीचे सत्य असे

वेदनेविना सुख न मिळे

हेच खरे

हो हेच खरे

© श्री शामसुंदर महादेवराव धोपटे

चंद्रपूर,  मो. 9822363911

≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित  ≈

☆ कवितेचा उत्सव ☆ शाईचा रंग ☆ श्रीओंकार कुलकर्णी ☆

शाईचा रंग कोणता?

कोण आहे जाणता?

कुणी कापले किती

अन कुणी मारले किती

कोणास काय भीती

शाईचा रंग कोणता

कोण आहे जाणता?

भोगत्या झाल्या माद्या

अन बाल्य पोरके झाले

घास झाला सांडता

शाईचा रंग कोणता

कोण आहे जाणता?

झाले तह किती ते

अन फौजा सरल्या किती त्या

ईतिहास चक्र चालते

शाईचा रंग कोणता

कोण आहे जाणता?

©  श्री ओंकार कुलकर्णी

20-12-2018

≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित  ≈

☆ कवितेचा उत्सव ☆ नगण्य ☆ डाॅ.व्यंकटेश जंबगी ☆

तुझ्या एका अश्रूबिंदूने,  माझ्या हृदयात प्रलय होतो

तुझ्या एका हास्याने, तेथेच कधी स्वर्ग फुलतो.

गालावरच्या खळीने तूच खोलवर हृदयात शिरतेस

एका शब्दाने कधी कधी, तू माझे आकाश पेलतेस.

तुझ्या एका स्पर्शाने, माझ्यात अनंत सतारी वाजतात.

तुझ्या एका कटाक्षाने, हृदयात असंख्य दिवे लागतात.

पण….हा फक्त भासच…

या साऱ्या “तुझ्या” मध्ये मी कुठे असतो?

तुझ्या भोवतालच्या गर्दीमधलाच मी एक असतो.

वेड्या मनाला किती वेळा सांगितले,

तू परमाणूतलाच एक आहेस,

आकाशातल्या बिजलीसाठी उगाचच झुरतो आहेस.

“ती” कधीतरी अशीच चमकून जाईल.

ओलावल्या धरणीचे “फोटो ”

काढेल, त्या फोटोत तरी तू असशील का ?

आता तरी झुरायचं सोडशील का ?

© डाॅ.व्यंकटेश जंबगी

≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित  ≈