सुश्री नीलांबरी शिर्के
चित्रकाव्य
☆
इवली बकुळी
स्वतःही फुलते
गंधदान देते
पवनाशी
*
इवली बकुळी
फुलते झुलते
नाते जुळतेच
काळजाशी
*
इवली बकुळी
सुगंध केवढा
गंधीत जाहला
सारा घरगाडा
*
इवली बकुळी
पहाटे फुलती
गळून पडता
सुगंधीत माती
*
इवली बकुळी
कुपी अत्तराची
जपून स्मृतीत
ठेवायाची
☆
© सुश्री नीलांबरी शिर्के
सुश्री नीलांबरी शिर्के
कवितेचा उत्सव
☆ मिटे प्रकाशाचे राज्य… ☆ सुश्री नीलांबरी शिर्के ☆
☆
मिटे प्रकाशाचे राज्य
पडे काळोखाची मिठी
बंद पापण्यांच्या आत
सैलावती निरगाठी
*
मनातल्या निरगाठी
मनातच सुटतात
पापणीच्या अंधारात
उरातून फुटतात
*
उरी फुटता फुटता
शल्य पापणीच्या काठी
गळणारा अश्रु टिपे
तम हलकेच ओठी
*
या तमसावरती
तिची जडलिय प्रित
तिचे दु:ख चुंबुनीया
प्रकाशी ठेवी हसवीत
☆
© सुश्री नीलांबरी शिर्के
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सौ.उज्वला सुहास सहस्त्रबुद्धे
कवितेचा उत्सव
☆ अघटित… ☆ सौ.उज्वला सुहास सहस्त्रबुद्धे ☆
☆
हे अघटित आहे खास,
थंडीत आकाश ढगाळ !
मनास करते उदास,
अन् थेंबात उगवे सकाळ!…. १
*
उबदार थंडीची शाल,
हेमंत ऋतु पांघरतो!
घेऊनी ढगाची झूल,
नकळत दिवस उगवतो…. २
*
गेलास ऋतुरंग बदलून,
लपलास कुठे घननिळा?
प्रश्न पडला मम मनाला,
पावसाळा की हिवसाळा!… ३
*
शांत, स्तब्ध निसर्गाला,
निश्चल केले कोणी ?
चैतन्य कधी त्या येईल,
वाट पाहते मी मनी !…. ४
☆
© सौ. उज्वला सुहास सहस्रबुद्धे
सौ. ज्योती कुळकर्णी
कवितेचा उत्सव
☆ सत्याचा शोध…☆ सौ. ज्योती कुळकर्णी ☆
(व्योमगंगा)
गालगागा गालगागा गालगागा गालगागा
☆
सत्य विश्वाचे खरेतर तज्ञ नसता जाणते मी
नेहमी मसणात जेव्हा पिंडदाना पाहते मी
*
तत्त्वज्ञानी सांगतो ह्या मिथ्य विश्वाची कहाणी
वाचली नाही तरीही विश्वशांती मांडते मी
*
सूर्य येथे चंद्र येथे विश्व आहे सत्य येथे
नाशवंती जीवनाचे सत्य अंती बोलते मी
*
लागता वाटेत डोंगर वापरावा मार्ग दुसरा
वा चढूनी पार व्हावे फक्त इतके सांगते मी
*
तत्त्ववेत्ता शास्त्रवेत्ता वासनेने अंध झाला
शील माझे रक्षण्याला अंग माझे झाकते मी
☆
© सौ. ज्योती कुळकर्णी
अकोला
मोबा. नं. ९८२२१०९६२४
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
कविराज विजय यशवंत सातपुते
कवितेचा उत्सव # 238 – विजय साहित्य
☆ स्नेहामृत… ☆
☆
चहाटळ वृत्तीलाही
संजीवक असे चहा
एकांतात रमताना
चहा पिऊनीया पहा…. 1
*
चहा पिताना डोकवा
आठवांच्या आरश्यात
चहा गवती पाल्याचा
मजेशीर भुरक्यात… !
*
रंग असो कोणताही
वाफाळता हवा चहा
गोडी लागे सवयीने
वेळेवरी हवा पहा… !
*
आवडीचे पेयपान
मरगळ घालवीते
संवादाचा कानमंत्र
जीभेवरी घोळवीते… !
*
चहा नावाचे व्यसन
करी श्रम परीहार
अर्धा कप चहातून
स्नेहामृत उपचार…. !
☆
© कविराज विजय यशवंत सातपुते
सहकारनगर नंबर दोन, दशभुजा गणपती रोड, पुणे. 411 009.
मोबाईल 8530234892/ 9371319798.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सौ. अर्चना गादीकर निकारंगे
कवितेचा उत्सव
☆ दवबिंदू… ☆ सौ. अर्चना गादीकर निकारंगे ☆
☆
पहाटेच्यावेळी गवतावर
दवबिंदू विसावलेले दिसत होते.
कृत्रिम प्रकाशातही ते
खूपच गोड भासत होते.
*
पावलांना त्यांचा होणारा
तो थंडगार स्पर्श असा
नकळत मनाला सुखावतो
आपल्या जसा.
*
क्षणभंगुरतेचे जीवन असे परी त्यांचे,
न उरते भान त्यांच्या मनी ह्याचे.
प्रकाशाने उजाडण्याच्या ते गडदतात,
कुठल्याही क्षणी ते नाहीसे होतात.
*
पुढचे जीवन ते गवताला अर्पितात,
जमिनीत मुरून ते एक जीवन देतात.
परोपकारी भावना दिसते त्यांच्याठायी
फोफावत गवत त्यांच्या ह्या जाणीवेपायी.
☆
© सुश्री अर्चना गादीकर निकारंगे
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री जगदीश काबरे
कवितेचा उत्सव
☆ “दु:खद वास्तव…–” ☆ श्री जगदीश काबरे ☆
☆
सुखांमागे धावता धावता, विवेक पडतो गहाण
पाण्यात राहूनही माशाची मग भागत नाही तहान ॥१॥
*
स्वप्न सत्यात आणता आणता दमछाक होते खूप
वाटीवाटीने ओतलं तरी कमीच पडत तूप ॥ २॥
*
बायका आणि पोरांसाठी चाले म्हणे हा खेळ
पैसा आणून ओतेन म्हणतो, पण मागू नका वेळ ॥३॥
*
करिअरच होतं आहे जीवन, मात्र जगायचं जमेना तंत्र
बापाची ओळख मुलं सांगती, पैसा छापणार यंत्र ॥४॥
*
चुकून सुट्टी घेतलीच तरी, पाहुणा ‘स्वतःच्या घरी’
दोन दिवस कौतुक होतं, नंतर डोकेदुखी सारी ॥५॥
*
मुलंच मग विचारू लागतात, बाबा अजून का हो हे जात नाही घरी?
त्यांचाही दोष नसतो, त्यांना याची सवयच नसते खरी ॥६॥
*
सोनेरी वेली वाढत जातात, घराभोवती चढलेल्या,
आतून मात्र मातीच्या भिंती, कधीही न सारवलेल्या ॥७॥
*
आयुष्याच्या संध्याकाळी मग एकदम जाणवू लागत काही,
धावण्याच्या हट्टापायी आपण श्वासच मुळी घेतला नाही ॥८॥
*
सगळ काही पाहता पाहता, आरशात पाहणं राहून गेलं,
सुखाची तहान भागवता भागवता, समाधान दूर दूर वाहून गेलं! ॥ ९॥
☆
© श्री जगदीश काबरे
मो ९९२०१९७६८०
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
प्रा. भरत खैरकर
कवितेचा उत्सव
☆ “क्षितिज संग…” ☆ प्रा. भरत खैरकर ☆
☆
श्वासामधली अधीर भाषा
कशी कळेना-सखे तुला
प्रणयसुखाच्या फांदीवरती
योवनाचा झुलतो झुला !
*
धडाडती हृदय स्पंदने
अन् उधाणती उसासे
वेदनेच्या कळा साहत
वाजती देहांचे ताशे !
*
धुंद नशेच्या मंथरज्वाला
जाळी माझे अंग अंग
मिठीमाजी सखये तुझ्या
क्षितिजाचा गवसे संग!!
☆
© प्रा. भरत खैरकर
संपर्क – बी १/७, काकडे पार्क, तानाजी नगर, चिंचवड, पुणे ३३. मो. ९८८१६१५३२९
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सौ. शशी नाडकर्णी-नाईक
वाचताना वेचलेले
☆ “साडीपुराण…” – कवी : अज्ञात ☆ प्रस्तुती – सौ. शशी नाडकर्णी-नाईक ☆
☆
साड्याच साड्या….
*
आज आमच्या सरकारांनी
कपाट घेतलं आवरायला,
साड्यांचा मोठा ढीग पाहून
मी लागलो मोजायला… !
*
कॉटनच्या आहेत सोळा
त्यांचा झालाय चोळामोळा,
सिल्कच्या आठ
त्यांचा तर लई थाट… !
*
वर्कच्या बारा
त्यांचा खूप तोरा,
काठापदराच्या पंधरा
सारे सण करतात साजरा… !
*
लग्नातल्या पैठणीनंतर
वाढदिवसाला एक घेतलेली,
पैठणीची हौस चार
सेमी पैठणीनेच भागवलेली… !
*
फक्त बघू म्हणून दुकानात
जेव्हा हाताला लागल्या मऊ,
सुताला खूप छान म्हणून
सहज आणलेल्या नऊ… !
*
काळा रंग तर
आवडीचा फार,
सहज दिसल्या म्हणून
घेतलेल्या चार… !
*
असं मोजता मोजता
एकूण झाल्या पंच्याहत्तर,
आता मात्र मला तर
यायला लागली चक्कर… !
*
तरीही कुठे जाताना
सरकारांचं तोंड सुरू,
आहे का चांगली एकतरी
सांगा साडी कोणती नेसू… ?
*
अशी त्यांची अवस्था
नेहमीचीच असते,
ठेवायला नसली जागा
तरी नेसायलाही साडी नसते… !
*
तोपर्यंत येतोय आमच्या
वाढदिवस लग्नाचा,
मला भारी साडी पाहिजे
असा आतापासूनच हेका… !
*
असंच सर्व बायकांचं
साडीवर खूप प्रेम असतं,
नवऱ्याला कसं पटवायचं
हे मात्र प्रत्येकीलाच जमतं… !
*
असं हे साडीपूराण
कायमचंच चालायचं,
रागावल्यासारखं करायचं
आणि बायकोच्या
आवडीच्या साड्या घ्यायचं…. !
☆
कवी : अज्ञात
प्रस्तुती : सौ. शशी नाडकर्णी-नाईक
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री प्रमोद वामन वर्तक
चित्रकाव्य
🌹 चौसष्ट घरांचा सम्राट ! 🌹 श्री प्रमोद वामन वर्तक ☆
☆
गु णांची कदर होते नेहमी
आज ना उद्या जगात
माळ जग्गजेतेपदाची
पडे गुकेशच्या गळ्यात
*
के ला चमत्कार गुकेशने
झाले पूर्वसुरी अचंबित
बने चौसष्ट घरांचा राजा
आज जगी तरुण वयात
*
श ह काटशहाच्या खेळाचा
अनभिषिक्त सम्राट बनला
भारतभूच्या शिरावर त्याने
एक तुरा मानाचा खोवला
☆
© प्रमोद वामन वर्तक
संपर्क – दोस्ती इम्पिरिया, ग्रेशिया A 702, मानपाडा, ठाणे (प.) 400610
मो – 9892561086 ई-मेल – [email protected]
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
