Tag: #मराठी-कविता

श्री अनिल वामोरकर

  चित्रकाव्य  

संध्याकाळ… ☆ श्री अनिल वामोरकर ☆

☆

पैलतीर दिसे

संध्या समयी

ऐकू येते बघ

मंजूळ सनई…

*

थकला भास्कर

जाई अस्तास विसावया

आपुले बिंब पाहूनी

लागला हसावया…

*

सुख दु:खाच्या

लाटांवरी जणू

सैरभैर मन

पैलतीराची ओढ जणू…

*

निरव शांतता

चलचित्र आठवांचा

साद घाली पैलतीर

शाश्वत आनंदाचा…

☆

© श्री अनिल वामोरकर

अमरावती

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री वर्षा बालगोपाल

  कवितेचा उत्सव 

☆ नववर्ष– – – ☆ सुश्री वर्षा बालगोपाल ☆

☆

येणार ते जाणार हे कळायलाच हवं

गेल्यावरच तर येणार ना दुसरं काही नवं?

 *

नवं नवं नवलाईचं गुणगान गावं

गाता गाता नवलाईने भारावून जावं

नव्यामध्ये जुन्याच्या आठवणीत रमावं

जुनं ते सोनं हे तेव्हा समजावं

 *

म्हणूनच जुन्याचे बोट सोडायचं नाही

नव्याचे बोट पकडले तरी त्यात वाहून जायचं नाही

जुन्याच्या कडीत नव्याची कडी सांधायची

अशी साखळी गाठवून नव्याची कास धरायची

 *

नव्या वर्षाचा प्रत्येक क्षण खास व्हावा

आपला देह हर्षोल्हासाचा आस व्हावा

नव्यावर्षात नवं आव्हानांचा करण्या सामना

आपल्या सगळ्यांना खूप खूप शुभ कामना ||

 *

Happy new year 2025

☆

© सुश्री वर्षा बालगोपाल

मो 9923400506

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्रीशैल चौगुले

 कवितेचा उत्सव 

☆ दोन शुन्य दोन पाच… ☆ श्रीशैल चौगुले ☆

☆

दोन शुन्य दोन पाच

सावधान, एकदाच

पहा जरा मागे ठसे

विसरुन गत् जाच.

*

हळू-हळू चाला बोला

सांभाळून मोद स्वाद

निरोप टाळून वाद

नवे पाऊल आल्हाद.

*

दोन शुन्य दोन चार

बंद साल बंद दार

दुःख नको कसचेही

नव वर्षाने उध्दार.

 ☆

© श्रीशैल चौगुले

श्री अनिल वामोरकर

 कवितेचा उत्सव 

☆ नूतनवर्ष… ☆ श्री अनिल वामोरकर ☆

☆

दैनंदिनी

असे आत्मा

वर्षरुपी वसन

बदलून लागू कामा…

 

करु संकल्प

राहो साधनेतील सातत्य

नकोत विकल्पाचे

अधिपत्य…

 

एकचि सदगुरु

नकोत चोविस गुरु

आत्मोन्नतीचा ध्यास धरू

उन्मन हमखास..

 

तिळा तिळाने

जसा दिन होई मोठा

तसा चढू सोपान

श्रद्धेने धिराने…

 

सोप्प नाहीए

तरी मनात आहे विश्वास

या जन्मी सुरवात जरी

निश्चित होवू विलीन परमात्म्यासी…

 

आंग्ल नूतनवर्षाच्या अनंत शुभेच्छा.

☆

© श्री अनिल वामोरकर

अमरावती

≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित  ≈

डाॅ.भारती माटे

 वाचताना वेचलेले 

☆ “प्रमाण…” – कवी : कृष्णाजी नारायण आठल्ये  ☆ प्रस्तुती – डाॅ.भारती माटे ☆

☆

अतीकोपता कार्य जाते लयाला

अती नम्रता पात्र होते भयाला ।

अती काम ते कोणतेही नसावे

प्रमाणामधे सर्व काही असावे ॥ १ ॥ 

*

अती लोभ आणी जना नित्य लाज

अती त्याग तो रोकडा मृत्य आज । 

सदा तृप्त नेमस्त सर्वां दिसावे

प्रमाणामधे सर्व काही असावे ॥ २ ॥ 

*

अती मोह हा दु:ख शोकास मूळ

अती काळजी टाकणे हेही खूळ ।

सदा चित्त हे सद्विचारे कसावे

प्रमाणामधे सर्व काही असावे ॥ ३ ॥

*

अती ज्ञान अभ्यासल्या क्षीण काया

अती खेळणे हा भिकेचाच पाया । 

न कष्टाविणे त्वा रिकामे बसावे

प्रमाणामधे सर्व काही असावे ॥ ४ ॥ 

*

अती दान तेही प्रपंचात छिद्र

अती हीन कार्पण्य मोठे दरिद्र । 

बरे कोणते ते मनाला पुसावे

प्रमाणामधे सर्व काही असावे ॥ ५ ॥

*

अती भोजने रोग येतो घराला

उपासे अती कष्ट होती नराला । 

फुका सांग देवावरी का स्र्सावे

प्रमाणामधे सर्व काही असावे ॥ ६ ॥

*

अती स्नेह तेथे अवज्ञा उदंड

अती द्वेष भूलोकीचे पंककुंड । 

अती मत्सरे त्वां कशाला कुसावे

प्रमाणामधे सर्व काही असावे ॥ ७ ॥

*

अती आळशी वाचुनी प्रेतस्र्प

अती झोप घे तोही त्याचाच भूप । 

सदा सत्कृतीमाजी आत्मा विसावे

प्रमाणामधे सर्व काही असावे ॥ ८ ॥

*

अती द्रव्यही जोडते पापरास

अती घोर दारिद्य्र तो पंकवास । 

धने वैभवे त्वां न केंव्हा फसावे

प्रमाणामधे सर्व काही असावे ॥ ९ ॥

*

अती भाषणे वीटती बुद्धिवंत

अती मौन मूर्खत्व ते मूर्तिमंत । 

खरे तत्त्व ते अल्पशब्दे ठसावे

प्रमाणामधे सर्व काही असावे ॥ १० ॥

*

अती वाद घेता दुरावेल सत्य

अती `होस हो’ बोलणे नीचकृत्य । 

विचारे तुवा ज्ञानमार्गी घुसावे

प्रमाणामधे सर्व काही असावे ॥ ११ ॥ 

*

अती औषधे वाढवितात रोग

उपेक्षा अती आणते सर्व भोग । 

हिताच्या उपायास कां आळसावे

प्रमाणामधे सर्व काही असावे ॥ १२ ॥

*

अती दाट वस्तीत नाना उपाधी

अती शून्य रानात औदास्य बाधी । 

लघुग्राम पाहून तेथे वसावे

प्रमाणामधे सर्व काही असावे ॥ १३ ॥

*

अती शोक तो देतसे दु:खवृद्धी

अती मानतो हर्ष तो क्षूद्रबुद्धी । 

ललाटाक्षरां सांग कोणी पुसावे

प्रमाणामधे सर्व काही असावे ॥ १४ ॥ 

*

अती भूषणे मार्ग तो संकटाचा

अती थाट तो वेष होतो नटाचा । 

रहावे असे की न कोणी हसावे

प्रमाणामधे सर्व काही असावे ॥ १५ ॥ 

*

स्तुतीला अती बोलती श्वानवृत्ती

अती लोकनिंदा करी दुष्ट चित्ती । 

न कोणा उगे शब्द स्पर्शे डसावे

प्रमाणामधे सर्व काही असावे ॥ १६ ॥ 

*

अती भांडणे नाश तो यादवांचा

हठाने अती वंश ना कौरवांचा । 

कराया अती हे न कोणी वसावे

प्रमाणामधे सर्व काही असावे ॥ १७ ॥

*

अती गोड खाणे नसे रोज इष्ट

कदन्ने अती सेवणे हे कनिष्ठ । 

असोनी गहू व्यर्थ खावे न सावे

प्रमाणामधे सर्व काही असावे ॥ १८ ॥ 

*

जुन्याचे अती भक्त ते हट्टवादी

नव्याचे अती लाडके शुद्ध नादी । 

खरे सार शोधोनिया नित्य घ्यावे

प्रमाणामधे सर्व काही असावे ॥ १९ ॥ 

*

सदा पद्य घोकोनियां शीण येतो

सदा गद्य वाचोनियां त्रास होतो । 

कधी ते कधी हेही वाचीत जावे

प्रमाणामधे सर्व काही असावे ॥ २० 

☆

☆ इंग्रजी नववर्षाच्या शुभेच्छा!!!!! 💐

☆

कवी : कृष्णाजी नारायण आठल्ये 

प्रस्तुती : डॉ. भारती माटे 

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री आशिष  बिवलकर

  चित्रकाव्य  

जपावी वाचन संस्कृती…  श्री आशिष  बिवलकर ☆

☆

पुस्तकांचा मेळा | पुण्य नगरीत |

वाचनाची रीत | जगवाया ||१||

*

वाचन संस्कृती | वाढवते ज्ञान |

घालवी अज्ञान | माणसाचे ||२||

*

ग्रंथ हेच गुरु | बिंबवले मनी |

वाचुनिया ज्ञानी | घडवाया ||३||

*

प्राचीन भारत | प्रसिद्ध नालंदा |

ग्रंथांची संपदा | अगणित ||४||

*

आधुनिक जग | झालं डिजीटल |

ग्रंथांकडे कल | उदासीन ||५||

*

प्रकाशन झाला | आतबट्टा धंदा |

व्यवहारी वांदा | परिस्थिती ||६||

*

सुज्ञ वाचकांनो | जपावी संस्कृती |

वृद्धिंगत मती | वाचनाने ||७||

☆

© श्री आशिष  बिवलकर

बदलापूर

मो 9518942105

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री तुकाराम दादा पाटील

 कवितेचा उत्सव 

☆ बनाव… ☆ प्रा तुकाराम दादा पाटील ☆

(जलौगवेगा)

☆

भलेपणाचा प्रभाव आहे

तसाच येथे दबाव आहे

*

नवीन संधी लुटायची तर

तसाच केला सराव आहे

*

उगीच त्रागा करू नका ना

अशांत झाला जमाव आहे

*

विरोधकांच्या पराभवाचा

जमून केला ठराव आहे

*

दबून थोडे जपून वागा

बघून जेथे तणाव आहे

*

मिळेल ते तो नमून घेतो

मलूल ज्याचा स्वभाव आहे

*

सुखात नाही कुणीच येथे

सुधारणांचा अभाव आहे

*

फसाल तेव्हा कळेल सारे

कुणाकुणाचा बनाव आहे

☆

© प्रा. तुकाराम दादा पाटील

मुळचा पत्ता  –  मु.पो. भोसे  ता.मिरज  जि.सांगली

सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३

दुरध्वनी – ९०७५६३४८२४, ९८२२०१८५२६

≈ संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈