श्री राजकुमार दत्तात्रय कवठेकर
कवितेचा उत्सव
☆ काळजी… ☆ श्री राजकुमार कवठेकर ☆
☆
अंत का माझ्या नसावा वेदनेला
का लळा माझा न एकाही सुखाला
*
पाडती आठ्या कपाळा अंगणे ही
आपले मी कोणत्या मानू घराला?
*
सोबतीला वादळे माझ्या दिली ही
केवढी रे काळजी माझी जगाला
*
या, कुणी.. केव्हा.. कधी आतूर मी ही
आडणा ना उंबरा माझ्या मनाला
*
नेमकी ना उत्तरे येती कधीही
कोणताही प्रश्न ना लागे धसाला
*
धाऊनी आल्या सरी तेंव्हा झळांच्या
आळवाया लागता मी पावसाला
*
मी जरी थाटात गेलो उत्सवांना
दुःख तेथेही उभे रे स्वागताला
*
मी तुझ्यावाचून या सोसेन ग्रीष्मा
मी कसा सोसू परंतू श्रावणाला ?
*
वीण स्नेहाची तुटे वा सैल कोठे
राहिले नाते आता हे सांगण्याला
*
कोरड्या पात्रापरी आयुष्य सारे
(मात्र डोळा नेहमी पाणावलेला)
*
कोणत्या दारी उभा राहू तरी मी
भेटतो जो गाव तो ओसाडलेला
*
मी तुझ्या स्वप्नी पुरा हरवून गेलो
तू जरी प्रत्यक्ष, मी आभासलेला
*
का मला भेटायची दुःखास घाई?
का गळा माझाच प्यारा हुंदक्याला?
*
हे जिराईतापरी आयुष्य माझे
जीव नित्याचाच होता टांगणीला
*
शेवटी मी शोधला ‘माझा’ निवारा
पोरका जो तो इथे आहे स्वतःला
☆
© श्री राजकुमार दत्तात्रय कवठेकर
कवी / गझलकार
संपर्क : ओंकार अपार्टमेंट, डी बिल्डिंग, शनिवार पेठ, आशा टाकिज जवळ, मिरज मो ९४२११०५८१३
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
– गंधित समीर चैतन्याचा…– 