Tag: #मराठी-कविता

श्री सुहास रघुनाथ पंडित

 कवितेचा उत्सव 

☆ शिक्षक दिन विशेष – गुरूदक्षिणा ☆ श्री सुहास रघुनाथ पंडित ☆

मातीच्या या गोळ्याला तुम्ही दिला आकार

आज असे सत्कार ,गुरूजी,आज असे सत्कार .

 

ज्ञानाची तुम्ही दिलीत दीक्षा

वेळप्रसंगी करूनी शिक्षा

क्षणोक्षणी घेऊन परीक्षा

त्या ज्ञानाच्या सामर्थ्याने दिला आम्हा आधार

आज असे सत्कार,आपला,आज असे सत्कार.

 

मन-भूमीतील काढूनिया तण

संस्कारांचे करून शिंपण

गुणवत्तेचे शोधुनिया धन

त्या कष्टाचे फलित,अमुचे विवेक आणि विचार

आज असे सत्कार ,आपला,आज असे सत्कार,

 

दिवस आजचा गुरुपूजनाचा

तव स्मरणाचा, कृतज्ञतेचा

ज्ञानमंदिरा आठवण्याचा

गुरूदक्षिणा एकच, तुमचे स्वप्न करू साकार

आज असे सत्कार,आपला,आज असे सत्कार

गुरूजी,आज असे सत्कार

 

©  श्री सुहास रघुनाथ पंडित

सांगली (महाराष्ट्र)

मो – 9421225491

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

सौ. स्वाती रामचंद्र कोरे

 कवितेचा उत्सव 

☆ शिक्षक दिन विशेष – अभंग ….. गुरु माझा ☆ सौ. स्वाती रामचंद्र कोरे ☆

(आज ५ सप्टेंबर शिक्षक दिन, जीवनाची उत्तम जडण घडण करणाऱ्या, शालेय पाठाबरोबरच संस्काराचे धडे देणाऱ्या, वेगवेगळ्या क्षेत्रात भेटलेल्या सर्वच शिक्षकांना, गुरूंना शब्द सुमनांची मानवंदना)

गुरुविण नाही।जगी मान पान

जगण्यास ज्ञान।गुरु देती

 

प्रेमळ वागणे।मधुर बोलणे

सर्वां मान देणे।सांगे गुरु

 

गुरु माय बाप।गुरु बंधू सखा

होय पाठीराखा। नेहमीच

 

परीक्षा ते घेती।अनुभव देती

हात न सोडती।कदापि च

 

संकट काळात।मदत करती

आधार ते देती।सदोदित

 

अंतरी विश्वास।जगण्याचा ध्यास

गुरु माझा श्वास।झाला असे

 

गुरु ऋणातून।नाही उतराई

गुरुच्याच ठायी।मन लागे

 

गुरु चरणांची।घडो सदा सेवा

आनंदाचा ठेवा।सदा लाभो

 

©  सौ. स्वाती रामचंद्र कोरे

खानापूर,जिल्हा सांगली

मो.9096818972

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

सौ. विद्या पराडकर

 कवितेचा उत्सव 

☆ शिक्षक दिन विशेष – सरस्वतीच्या आकाशातील तारा….☆ सौ. विद्या पराडकर ☆

(दिनविशेष: 5 सप्टेंबर -डाॅ.सर्वपल्ली राधाकृष्णन् जन्मदिन – शिक्षक दिन)

सरस्वतीच्या आकाशातील

तू एक तारा

विद्यारूपी वीणेच्या

छेड तू  तारा

 

बहूव्यासंगी ज्ञानगंगेचा

आहेस तू कुंभ

पण ज्ञानदान करतांना

धरू नकोस दंभ

 

हाती छिन्नी हातोडा धरूनी

जैसा शिल्पकार

तैसाच तू शिल्पकार

जिवंत मूर्तीला देई आकार

 

तव यशो मय जीवनाचा विद्यार्थी द्योतक

विश्वात कोरलेले शिल्प सुबक

तव अखंड अध्यापनाचा तोच प्रतीक

तोच खरा प्रतीक

 

© सौ. विद्या पराडकर

पुणे.

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

श्री विजय गावडे

 कवितेचा उत्सव 

☆ आम्ही जाहलो पुन्हा लहान! ☆ श्री विजय गावडे ☆  

म्हातारपण, छे दुसरं बालपण

अनुभवू आनंदून

साठी पुढील नवं वय

आता तर सुरु झालंय!

 

रेल्वे आपली समजदार

विंडो सीट अन बर्थ लोवर

आवडायचं ना बालपणी

बसावयाला खिडकीवर!!

 

काम काही खास नाही

उठावयाची घाई नाही

टिफिन नाही, तिकीट नाही

मस्टरची मस्ती नाही!!!

 

नातवंडांना करू गोळा

खेळू नाचू करू आनंदसोहळा

येवो कधीही वैकुंठ बोलावा

तोवर राहो मैत्री ओलावा.

 

© श्री विजय गावडे

कांदिवली, मुंबई 

≈संपादक–श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

श्रीमती अनिता जयंत खाडीलकर

 कवितेचा उत्सव 

☆ अभंग .. विठ्ठलाचे रुप ☆ श्रीमती अनिता जयंत खाडीलकर ☆ 

 

सुंदर सावळा लेकूरवाळा

  राहतो पंढरीसी विठराया।।ध्रु.।।

 

विठ्ठलाचे रुप

साजिरे गोजिरे

सुंदर ते ध्यान

 उभे सदा।।१।।

          सुवर्ण रत्नांचा

           मुगुट तो छान

            तुझिया शिरी

                साज चढे।।२।।

शेंदरी हा छान

अष्टगंधी टिळा

तुझिया कपाळा

   शोभिवंत।।३।।

           हऱ्या सुगंधित

         तुळशीच्या माळा

          तुझ्याच रे कंठी

             शोभे छान।।४।।

कटी हेमपट्टी

कटेवरी कर

कासे पितांबर

 शोभतसे।।५।।

          देखोनिया डोळा

          पाऊले ही तुझी

          शमे आस माझी

                पांडुरंगा।।६।।

ठेवियेला माथा

तुझिया पाऊली

देई तू साऊली

   निरंतर।।७।।

         जमविलास तू

         भक्तांचा हा मेळा

          लेकूरवाळा तू

               म्हणवीसी।।८।।

जनाईच्या साठी

जाशी तू धावूनी

चोखयाचा मळा

   फुलवीसी।।९।।

          गुण तुझे किती

          गाऊ मी अंनता

          प्रसाद दे आता

                मम करी।।१०।।

© श्रीमती अनिता जयंत खाडीलकर

सह्याद्री अपार्टमेंट, खाडीलकर गल्ली, बालगंधर्व नाट्यमंदिर समोर, ब्राह्मणपुरी, मिरज,जि. सांगली

मो 9689896341

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

श्रीशैल चौगुले

 कवितेचा उत्सव 

☆ गोपाळकाला ☆ श्रीशैल चौगुले ☆

मी न कृष्ण  तु न  राधिका

तरी कसे मन   वृंदावन.

 

मी न कृष्ण  तु न रुक्मिणी

प्रेम भक्ति धन    संतमिरा.

 

मी न कृष्ण   तु न ती भामा

पारिजात हा     तुळसीत.

 

मी न कृष्ण    तु न  गौळण

तरी रास देही  गोपाळकाला.

 

© श्रीशैल चौगुले

९६७३०१२०९०

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

प्रा. सौ. सुमती पवार

 कवितेचा उत्सव 

☆ मनातील श्रावण … ☆ प्रा. सौ. सुमती पवार ☆

मनामनात श्रावण येई आनंदा उधाण

डहाळीवर आंब्याच्या पहा झोके घेई मन

लेकी येती माहेरास सुखदु:ख्ख वाटतात

पुन्हा आशेच्या या ज्योती मनातून पेटतात…

 

असा महान महिना सणवार येती खूप

दरवळे घरातून देवापुढती हो धूप

पावसाची लागे झड शेते फुलारून येती

फुले सांडतात खाली सुगंधित होते माती ….

 

झुले झुलतात मनी साजणाचा ये आठव

माहेराहून आई मला सासरी पाठव

येती सरावरसरी हेलकावते हो मन

वेड लावतो जीवाला असा साजरा श्रावण ..

 

बांधाबांधावर पहा कशी मुरके जवार

हिरवा शालू नऊवारी उडे हवेत पदर

चावळते चावळते वारा घालतो फुगडी

चवळी गवार मुगाची पानाआड ती बुगडी ….

 

चोची उडती आकाशी शेतावरती चादर

हाती घेऊन गोफण शेतकऱ्याचा जागर

पाचू पेरतो श्रावण मनमनात हिरवा

आत बाहेर साराच प्रसन्नतेचा गारवा …..

 

© प्रा.सौ.सुमती पवार ,नाशिक

(९७६३६०५६४२)

[email protected]

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈