श्री आशिष बिवलकर
(श्री आशिष बिवलकरआपलं ई-अभिव्यक्तीवर हार्दिक स्वागत)
अल्प परिचय
नाव : अशिष भानुदास बिवलकर शिक्षण : B. कॉम। जन्म : ०४ ऑक्टोबर १९७९ आवड : समाज सेवा, मंदिर व्यवस्थापन। कविता लेखन (वर्ष २०१९ पासून )
व्यवसाय : नोकरी (खासगी)
चित्रकाव्य
– गजरेवाला…– ☆ श्री आशिष बिवलकर ☆
☆
गजरा मोगऱ्याचा विकता विकता,
बालपण मात्र कोमजले !
सुगंध मोगऱ्याचा दरवळता दरवळता,
गंधहीन बालपण झाले !
☆
गुंफून मोगऱ्याच्या फुलांची लडी,
हातात घेऊन उभा तो राही !
घासाघीस किंमतीची त्याच्याशी चाले,
बालकष्ट कोणीच पहात नाही !
☆
शुभ्र मोगऱ्याच्या फुलांनी,
कुणाचा तरी रंगमहाल सजला !
थकला कोवळा जीव,
क्षणभर कोपऱ्यात बसून निजला !
☆
पुस्तकाची पाने राहती ती दूर,
मीठ भाकरीचे पान त्याला दिसे !
फाटक्या परिस्थितीने नाडलेल्याला ,
जगात वाली मात्र कोणीच नसे !
☆
मिळतील दोन पैसे कष्टाचे,
तेव्हा घरातली चूल जळेल !
इवल्याश्या पोटाच्या खळगीत,
कसेबसे दोन घास पडेल !
☆
मुले म्हणजे देवाघरची फुले,
बालपणाला निर्माल्याची कळा येई !
दगडातला देव शोधणाऱ्या माणसा,
देवाघराच्या फुलांची तुला नाही उतराई !
☆
© श्री आशिष बिवलकर
बदलापूर
मो 9518942105
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
कवितेच्या प्रदेशात # 182 
जगणे… 
सौ. शुभदा भास्कर कुलकर्णी (विभावरी) ☆
वाचताना वेचलेले 
इंद्रधनुष्य 
