Tag: #मराठी-कविता

श्री सुहास रघुनाथ पंडित

 कवितेचा उत्सव 

☆ एक झाड गुलमोहोराचं ☆ श्री सुहास रघुनाथ पंडित ☆

☆

गुलमोहोराचं एक झाड असतं प्रत्येकाच्या घरात

आपण मात्र शोधत बसतो जाऊन दूर रानावनात

☆

पहाल तेव्हा डवरलेली ,  चैतन्याने बहरलेली

सकाळपासून रात्री पर्यंत कायम असते फुललेली

☆

वाढतो आपण तिच्याच सावलीत गोळा करत पाकळ्या

ती नेहमीच जपत असते फुलं आणि कळ्या

☆

सारं कसं निसर्गाच्या नियमानुसार चाललेलं

मी नाही पाहिलं कधी गुलमोहोराला वठलेलं

☆

दिसताच क्षणी तिच्याकडे आम्ही जातो आपोआप

आपण कसेही वागलो तरी तिच्या मनात नसते पाप.

☆

© सुहास रघुनाथ पंडित 

सांगली (महाराष्ट्र)

मो – 9421225491

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

डॉ.सोनिया कस्तुरे

 कवितेचा उत्सव 

☆ बरोबरी नको… ☆ डॉ.सोनिया कस्तुरे ☆

तू कोणाशी बरोबरी करु नकोस,

तू सदैव एक पाऊल पुढे आहेस..!

तू जन्मदात्री, तू संगोपन करणारी

तू शेतीचा शोध लावणारी

त्यागाची परिभाषा तू

सती जाणारी ही तूच

युद्धापेक्षा बुद्ध मानणारी तू

तू कोणाशी बरोबरी करु नको,

तू सदैव एक पाऊल पुढे आहेस..!

तू जिजाऊ, तू सावित्री

तू झाशीची राणी, तू रणरागीणी

तू इंदिरा, तू कल्पना चावला,

अनेक रुपात, अनेक क्षेत्रात

पाय रोवून उभी आहेस तू,

तू कोणाशी बरोबरी करु नको,

तू सदैव एक पाऊल पुढे आहेस..!

तू सुंदर आहेस, कर्तृत्वान आहेस

चेहऱ्याला लेप लावून सजवू नकोस

तू नितळ, निर्मळ, प्रेमळ, आहेस

तू निधर्मी व विज्ञानवादी हो

तू दैववादात अडकू नकोस,

प्रयत्नवाद कधी सोडू नकोस

तूच कुटुंबाचा गाभा आहेस..

तू कोणाशी बरोबरी करु नको,

तू सदैव एक पाऊल पुढे आहेस..!

तुला कुणी विकू नये.

तुला कुणी विकत घेऊ नये..

अशी आईच्या हृदयाची माणसं

तूच घडवू शकतेस..

बलात्कार, अन्याय, अत्याचार तू

स्वतःच थांबवू शकतेस…

तू सर्व सामर्थ्याने पेटून उठू शकतेस

तू कोणाशी बरोबरी करु नको,

तू सदैव एक पाऊल पुढे आहेस..!

© डॉ.सोनिया कस्तुरे

विश्रामबाग, जि. सांगली

भ्रमणध्वनी:- 9326818354

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ. उज्वला सुहास सहस्रबुद्धे

 कवितेचा उत्सव 

☆ प्रवास स्त्री – जीवनाचा ☆ सौ. उज्वला सुहास सहस्रबुद्धे ☆

शतकानुशतकांचा होता स्त्रीस बंदिवास !

स्त्री मुक्तीचा तिने घेतला सतत ध्यास !

घेऊ लागली आता जरा मोकळा श्वास !

उपभोगीत आहे स्त्री म्हणून मुक्त वास!

स्त्री आणि पुरुष निर्मिले त्या ब्रह्माने !

विभागून दिली कामे  त्यास अनुरूपतेने!

जनन संगोपन यांचे दायित्व दिले स्त्री ला!

आधार पोषणाचे कार्य मिळे पुरुषाला !

काळ बदलला अन् पुरुषी अहंकार वाढला!

पुरुष सत्तेचा जुलूम जगी दिसू लागला !

स्त्री अबला म्हणून जनी मान्य झाली!

अगतिक  दासी म्हणून संसारी ती जगली !

स्त्री शिक्षणाचा ओघ जगी या आला!

स्त्री चा चौफेर वावर जनी वाढला!

चिकाटी, संयम जन्मजात लेणे तिचे !

चहू अंगाने बहरले व्यक्तिमत्व स्त्रीचे !

सर्व क्षेत्रात मान्य झाली स्त्री पुरुष बरोबरी !

दोन पावले पुढेच गेली पण नारी!

न करी कधी ती कर्तव्यात कसूर !

जीवन जगण्याचा मिळाला तिलाच सूर!

स्त्री आणि पुरुष दोन चाके संसाराची !

समान असता वेगेची धाव घेती !

एकमेकास पूरक राहुनी आज संसारी!

दोघेही प्रयत्ने उंच नभी घेती भरारी !

© सौ. उज्वला सुहास सहस्रबुद्धे

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ. जयश्री पाटील

 कवितेच्या उत्सव 

☆ जागर… ☆ सौ. जयश्री पाटील ☆

शिक्षण घेऊन सर करूया प्रगतीची शिखरे ll

ज्ञानबळावर घेऊ भरारी होऊ स्वच्छंदी पाखरे ll

शिक्षणाची ढाल सदैव पाठीशी ठेवुनी ll

ज्ञानाच्या तलवारी तळपवू होऊ रणरागिणी ll

कोमलता नाजूकता भीती बनवू कणखर ll

संकटांशी टक्कर देण्याचा करू निर्धार ll

आत्मविश्वासाची चमक साठवू इवल्या डोळ्यात ll

स्वप्नांची पूर्तता जरी खडतर कर्तव्यात ll

अनिष्ट रूढी अज्ञानाचा विळखा मोडून काढू ll

सामाजिक न्यायासाठी उभा लढा आपण देवू ll

आधुनिक जरी जपू वंदनीय परंपरा संस्कृती ll

उघडून टाकू निर्भया भ्रूण हत्येच्या विकृती ll

एक एक पाऊल टाकू उदात्त कर्माकडे ll

स्त्री शक्तीचा जागर बघा दुमदुमतो चोहीकडे ll

© सौ. जयश्री पाटील

विजयनगर.सांगली.

मो.नं.:-8275592044

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्रीमती उज्ज्वला केळकर

 वाचताना वेचलेले 

☆ “आजी आजोबांचा व्हॅलेंटाईन वीक” – लेखक – अज्ञात ☆ प्रस्तुति – श्रीमती उज्ज्वला केळकर ☆

एक होती साधीभोळी आजी , 

पण आजोबा होते कहर !

काहीतरी वेगळं करण्याची, 

आजोबांना मध्येच आली लहर !!

“यावेळेस आपण करूया का गं, 

प्रेमाचा आठवडा साजरा ?”

लाजत मुरडत हो म्हणत , 

आजीने लगेच माळला गजरा !!

 “रोझ डे” चा गुलाबी दिवस , 

केला गोडाधोडाचा भडीमार ! 

एकमेकांना भरवला गुलकंद , 

मग रोझ सरबत थंडगार !!

हिरो प्रमाणे गुडघ्यावर बसून , 

आजोबांनी मागणी घातली आजीला !

 “प्रपोज डे” साजरा करून गेले, 

दोघं आठवडी बाजारात भाजीला !!

आता “चॉकलेट डे” ला काय द्यायचं ?,  

म्हणून आजीने केला आटापिटा !

शेवटी ग्लास भरून दूध घेतलं , 

त्यात घातला भरपूर बोर्नविटा !!

 “टेडी डे” ला आजोबांनी आणली,  

छान अस्वलाच्या आकाराची उशी !

झोपेत दुखऱ्या मानेखाली ठेवताना, 

आजीने आजोबांनाच मारली ढुशी !!

दिवसभर लवंगा चघळण्याची, 

आजोबांना सवय होती फार !

 “प्रॉमिस डे” ला आजीने दिल्या, 

त्यांना प्रॉमिस टुथपेस्ट चार !!

म्हातार वयात काय हा चावटपणा ?, 

असं म्हणत आजी बसली अडून !

 “कीस डे” लाच झालं भांडण अन् , 

दिवस सरला शब्दांचा कीस पाडून !!

वाद मिटवायला आजोबांनी आणले, 

आजीच्या आवडीचे खास बटाटेवडे !

अरेरे दुसऱ्या दिवशी पोट बिघडलं, 

पार पडला मराठीतला “हग डे” !!

अखेर एकदाचा गाठला त्यांनी , 

 “व्हॅलेंटाईन डे” चा अवघड टप्पा !

गरमागरम चहासोबत रंगल्या ,  

राहिलेल्या बऱ्याच दिवसांच्या गप्पा !!

“जमायचं नाही बुवा आपल्याला, 

असलं नाटकी प्रेम करणं !”

नुसता सोहळा करायच्या नादात , 

असं उगाचच्या उगाच झुरणं !!”

“प्रेमाचा फक्त एकच दिवस , 

आपण म्हाताऱ्यांसाठी का असावा ? “ 

“प्रत्येक दिवस प्रत्येक श्वास , 

एकमेकांवर जीव लावून सोडावा !!”

सगळ्याचं प्रदर्शन करण्यापेक्षा, 

आपलं मनातलं प्रेमच बरं !

दिसलं नाही कुणालाच तरी, 

एकमेकांवर असतं मात्र खरं !!

सगळ्याचं प्रदर्शन करण्यापेक्षा, 

आपलं मनातलं प्रेमच बरं

दिसलं नाही कुणालाच तरी, 

एकमेकांवर असतं मात्र खरं !!

लेखक : अज्ञात 

संग्राहिका : सौ उज्ज्वला केळकर 

176/2 ‘गायत्री’, प्लॉट नं 12, वसंत साखर कामगार भवन जवळ, सांगली 416416 मो.-  9403310170

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ. विद्या वसंत पराडकर

 कवितेचा उत्सव 

💐 सप्तरंग 💐 सौ. विद्या वसंत पराडकर ☆

(होळीच्या सर्व रसिकांना शुभेच्छा)

कुवासनेची करुनी होळी

दुर्गुणांची ही इंधन मोळी

मानवतेचे चंदन भाळी

उधळवु सप्तरंग आभाळी

अंहकारा देऊ मुठमाती

षडविकारा वीर जिंकती

समतेचे झेंडे फडकती

तेथे प्रेमरंग उधळती

सप्तरंग प्रतीक असता

संयम,शांती. मिळे शुचिता

सद्भभावनामय ज्याची कांती

रंग धुळवडी जाते भ्रांती

दुर्वासना विषाचे दहन

विषयांचे करु उच्चाटन

पर्व पहा प्रकाश पावन

श्रीरंगातच उजळू जीवन ☘️

© सौ विद्या वसंत पराडकर

वारजे पुणे.

ई मेल- [email protected]

मो.नंबर – 91-9225337330 

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈