Tag: #मराठी-कविता

सुश्री अरुणा मुल्हेरकर

 कवितेचा उत्सव 

☆ तुला पाहता… ☆ सुश्री अरुणा मुल्हेरकर ☆

☆

मी तुला पाहता बावरले

मम चित्त कसे हे थरथरले॥धृ॥

*
झंझावातासम तो आला

कधी कसा तो नाही कळला

मनी माझिया कायम वसला

मम ह्रदय कसे हे धडधडले॥१॥

मी तुला पाहता….

*
ओढ अशी मज काय लागली

नजर तुझ्यावर भिरभिरली

नजरेचे हे भाव बोलके

ते या मुग्धेला उमजविले॥२॥

मी तुला पाहता…

*
वाटे मजसी करी धरावे

मधुर भाषणे पुलकित व्हावे

नजरेचा तव वेध घेतसे

देहभान माझे ना उरले ॥३॥

मी तुला पाहता…

*
तळमळ जीवा तव भेटीची

आस एक मज सहवासाची

नकोत वाटे अशी बंधने

धावत तुजपाशी रे आले॥४॥

*

मी तुला पाहता बावरले

मम चित्त कसे हे थरथरले॥

☆

© सुश्री अरुणा मुल्हेरकर 

डेट्राॅईट (मिशिगन) यू.एस्.ए.

≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित  ≈

सौ. वंदना अशोक हुळबत्ते

 कवितेचा उत्सव 

☆ बघ बंध तोडून… ☆ सौ. वंदना अशोक हुळबत्ते ☆ 

☆

जीवघेणा हा अबोला

कसा सहन करतेस ?

सारे दुःखाचे कढ 

एकटीच का पचवतेस ?

*
सांगून तर बघ एकदा

मन थोडं होईल हलकं 

नको मानू मला तू परकं 

*
स्वतःच विणलेल्या कोषात

किती दिवस फिरणार ?

कोष तुलाच तोडावा लागणार

*
उदासीनतेच्या प्रेशरला

बघ शिटी देऊन 

उदासीनता जाईल निचरून

*
ऐक माझं 

बघ एकदा जमतं का ?

दडपणाचे झाकण उघडून 

कोंडलेलं मन जाईल आनंदून 

*
स्वतःला दोष देणं दे सोडून 

सुख तुला जोजवेल

हाताचा पाळणा करून

*
आस धर उद्याची

अबोला दे सोडून 

दुःखाशी कर सामना 

टेंशन जाईल घाबरून……

☆

© सौ.वंदना अशोक हुळबत्ते

मो.९६५७४९०८९२

सांगली

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री प्रणिता प्रशांत खंडकर

 कवितेचा उत्सव 

☆ जागर… ☆ सुश्री प्रणिता खंडकर ☆

☆

हरवला मूळ भाव, झाला काय वेडा-खुळा,

पू्जण्याला सरस्वती, गाव करतोय गोळा?

*

कुठे देव्हारा चंदनी, सोन्या-मोत्याचा फुलोरा,

रास-गरब्याच्या नावे, कुणी घालतो धिंगाणा!

*

माय, विद्येची ही देवी, तिला शब्दांची आरास,

पुस्तकांच्या देव्हाऱ्यात, अक्षरांचे अलंकार!

*
कास ज्ञानाची धरुनी, दूर करावे अज्ञान,

धूप-दीप-नैवेद्याचा, नको सोहळा उगाच !

*

काली, दुर्गा, अंबामाता, सारी तुझ्याच घरात,

माणसाने माणसाचा, नित्य ठेवावा सन्मान !

*

शिक्षणाच्या मशालीने, करी आईचा जागर,

हृदयाच्या गाभाऱ्यात, उजळावा ज्ञानदीप !

☆

© सुश्री प्रणिता खंडकर

संपर्क – सध्या वास्तव्य… डोंबिवली, जि. ठाणे.

ईमेल [email protected] केवळ वाॅटसप संपर्क.. 98334 79845.

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री वर्षा बालगोपाल

  कवितेचा उत्सव 

☆ रतनजी टाटा… ☆ सुश्री वर्षा बालगोपाल ☆

☆

कर शिस्तीचा, देशाभिमानाचा 

कर्मचाऱ्यांसाठी केला सक्तीचा 

करद्वय जुळती आपसूक

भाव त्यांच्या प्रती कृतज्ञतेचा ||

*
सर केली उद्योगाची शिखरे 

सर त्याची ना येतसे कोणाला 

सर तुम्हास मानाचा मुजरा 

सर कर्तृत्वाचा कंठी शोभला ||

*
मानव तुम्ही आदर्श देशाचे 

जगात नारे उद्योजगतेचे 

मान व कणा ताठच आमचे 

रत्न आमच्या हे अभिमानाचे ||

*
वर तुम्हा त्रिदेवांचा लाभला 

स्वतःसवे तो जगास वाटला 

वर नेले भारतास आपल्या 

कार्यातून तुम्ही आता उरला ||

*
रत न कार्यात पळभरही 

घडले असे आजवर नाही 

रतन नाव हे सार्थ करूनी

भारतमातेच्या मुकुटी राही ||

*
टाटा करतेय जग तुम्हाला 

प्रेम ज्योतीच्या ओवाळून ताटा 

टाटा रतन तुम्ही चिरंजीव 

प्रगतीत तुमचा मोठा वाटा ||

*

पोरका झाला आता देश सारा 

तुम्ही उद्योगाची माऊली तात 

पोर का? वृद्धही जपती मनी 

ऋण फिटेल ना शतजन्मात ||

☆

© सुश्री वर्षा बालगोपाल

मो 9923400506

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री प्रमोद वामन वर्तक

 कवितेचा उत्सव  

☆ सुखी माणसाचा सदरा ! ☆ श्री प्रमोद वामन वर्तक ☆

☆

“मीच जगी सर्वात सुखी” 

मंत्र जपा सतत मनात,

ठेवा असं आपलं वागण 

सदा होई वाहवा जनांत !

*

हात सढळ तुमचा ठेवा

यथाशक्ती मदतीसाठी,

बना काठी आंधळ्याची

दिन दुबळ्या लोकांसाठी !

*

हाकून शेळ्या उंटावरूनी

उगा उपदेश करू नका,

जरी दिसला झगडा समोर 

तरी नाक खुपसू नका !

*

करून कर्तव्य गृहस्थाश्रमी 

भाजा भाकऱ्या लष्कराच्या,

चुकवू नका कधीच तुम्ही 

संधी कुठल्या लोकसेवेच्या !

*

मिळून मिसळून लोकांमध्ये 

सन्मार्गाने जीवन आचरा,

मग लोकं मागती मनापासूनी 

द्या तुमचा सुखी सदरा !

द्या तुमचा सुखी सदरा !

☆

सौ. ज्योती कुळकर्णी 

 कवितेचा उत्सव 

☆ कोजागिरीची लावणी – – ☆ सौ. ज्योती कुळकर्णी ☆

☆

रात अवघी प्यायली, चांदणं हो पुनवेचं

बारामाही पुनव, येते कोजागरी एकदाच

*
चांदोबाही हसला, आला खुशी-खुशीतच

लाडात आला खाली, धरतीच्या जवळच

जमवून चटकचांदण्या, आवतन मैत्रीचं

बारामाही पुनव, येते कोजागरी एकदाच

*
धरती म्हणाली त्याला, तू चंद्रमा एकच

ये तूच जरा खाली, निमित्त आहे प्रेमाचं

दिसलं केशरी दुधात, बिंब हो चंद्राचं

बारामाही पुनव, येते कोजागरी एकदाच

*
मित्र जमले अवघे, चांदणं पूनवेचं

लुटू या सारे मजा, देणं लाभलं आनंदाचं

आजच्या दिवसाला हो, महत्व जागरणाचं

बारामाही पुनव, येते कोजागरी एकदाच

*

रात अवघी प्यायली, चांदणं पुनवेचं 

बारामाही पुनव, येते कोजागरी एकदाच

☆

© सौ. ज्योती कुळकर्णी

अकोला

मोबा. नं. ९८२२१०९६२४

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

प्रा. सौ. सुमती पवार

 कवितेचा उत्सव 

 दि: १० ॲाक्टोबर २०२४

नाशिक

(९७६३६०५६४२)

[email protected]

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री दीप्ती कुलकर्णी

 कवितेचा उत्सव 

☆ अभिजात भाषा-मराठी… ☆ सुश्री दीप्ती कुलकर्णी ☆

☆

आज भाषा मराठी ठरे अभिजात 

लाभे सन्मान तिला अखिल विश्वात

गीतेचे सार थोर घुमतसे जगता|त

होतसे मराठी अभिमानास पात्र ||१||

*
ज्ञानदेवे रचिलासे पाया

तुकयाने केला कळस

मराठीचा तो नामघोष

कळू दे आता जगास ||२||

*
सारस्वत थोर-थोर

वर्णिती तिची गाथा

नतमस्तक. मी होते

मराठीचे गुण गाता ||३||

*
मराठीचा परिमल दरवळे

शब्दफुले लेती लेणे

साहित्याची मांदियाळी 

शब्दातुनी गाती गाणे ||४||

*

मराठीचे गुण महान

गाती मुखे थोर-सान

अमृताते पैजा जिंके

मराठीची अशी शान ||५||

☆

© सुश्री दीप्ती कोदंड कुलकर्णी

कोल्हापूर 

भ्र.९५५२४४८४६१

≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈