श्रीमती अनुराधा फाटक
कवितेचा उत्सव
☆ माझी कविता ☆ श्रीमती अनुराधा फाटक ☆
माझी कविता
पोपडतो कोंभ पर्णद्वयातून
आणि उमलते फूल कळीतून
तशीच फुलते शब्द कळ्यातून
कविता माझी !
घुसमट होता शब्द छळांची
सैरभैर अस्वस्थ तळमळ
मुक्त होते प्रसववेदनेतून
कविता माझी !
विचार दगडावर शब्दांचे घण
घडते मूर्ती नामी त्यातून
शिल्पच साकारते सुंदर
कविता माझी !
आकाशी खेळते चंचल चपला
भेदून जाते घन ओथंबला
उतरते अलगद भूवर
कविता माझी !
स्वप्नामधली नुमजे पडझड
आठवत ती मनीची धडधड
शब्दा शब्दामध्ये मीच शोधते
कविता माझी !
© श्रीमती अनुराधा फाटक
≈संपादक–श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈
