मराठी साहित्य – कवितेचा उत्सव ☆ सत्य… ☆ सौ.उज्वला सुहास सहस्त्रबुद्धे ☆

सौ.उज्वला सुहास सहस्त्रबुद्धे

?  कवितेचा उत्सव  ?

☆ सत्य… ☆ सौ.उज्वला सुहास सहस्त्रबुद्धे ☆

दुःखालाही कंटाळा आला,

वास्तव्याला राहण्याचा !

सतत प्रश्न अन् कटु सत्याला,

संगत घेऊन जगण्याचा !…..१

*

कोण तू  अन् कोण मी,

आपण सारे भाग सृष्टीचे

उत्पत्ती अन् लय यांचे,

साक्षी निसर्ग किमयेचे !….२

*

कुठे, कसे, कधी जन्मा यावे,

हे तर आपल्या हाती नाही

लक्ष योनीतून फिरता फिरता,

जगी काळ घालवतो काही !…३

*

धागे सारे मोह मायेचे ,

उगीच बांधतो स्वतःभोवती

मोहवणाऱ्या जगी  जिवाला,

गुंफून घेतो अवतीभवती !….४

*

सत्य चिरंतन मना  उमगते,

जेव्हा येते कधी आपदा

निमित्त मात्र ही असतो आपण,

भू वरी या सदा सर्वदा !…५

© सौ. उज्वला सुहास सहस्रबुद्धे

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – चित्रकाव्य ☆ बोट चार पाकळ्यांची… ☆ सुश्री वर्षा बालगोपाल ☆

सुश्री वर्षा बालगोपाल

?️?  चित्रकाव्य  ?️?

? बोट चार पाकळ्यांची?  सुश्री वर्षा बालगोपाल 

चार मित्रांमध्ये अहमहमिका अशी लागली 

बोट चार पाकळ्यांची जागी थांबली ||

*

सहकार गाव होतं, त्यात चार दोस्त 

सुख – दु:ख समान त्यांचे रहात होते मस्त 

चार दिशांची आमिशे कोणी दावली 

बोट चार पाकळ्यांची जागी थांबली ||

*

चार दिशेला तोंडे परी, एका थाळीत जेवत होते 

एकजूट होऊन संकटा ध्वस्त ते करत होते 

सत्ता मोहाने डोकी अशी का फिरली 

बोट चार पाकळ्यांची जागी थांबली ||

*

प्रकृतीच्या एका प्रवाही चौघांची ही नाव 

विरुद्ध दिशेला नेण्या जो तो खेळे डाव 

मला नाही तर तुलाही नाही, मती भ्रष्ट कशी जाहली 

बोट चार पाकळ्यांची जागी थांबली ||

*

कुठे गेली एकता अन कुठे समानता 

सोप्या गोष्टी अवघड झाल्या नुरली सहजता 

तुला नाही मला नाही, नाव भोवऱ्यात बुडली 

अशी देशाची आपल्या स्थिती असे जाहली ||

© सुश्री वर्षा बालगोपाल

मो 9923400506

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – मराठी कविता ☆ कवितेच्या प्रदेशात # 232 ☆ तो दिवस… ☆ सुश्री प्रभा सोनवणे ☆

सुश्री प्रभा सोनवणे

? कवितेच्या प्रदेशात # 232 ?

☆ तो दिवस… ☆ सुश्री प्रभा सोनवणे ☆

(जागतिकमासिकपाळीदिवस  -२८मे)

मला आठवतो

माझ्या ऋतूप्राप्तीचा दिवस-

20 नोव्हेंबर 1969!

तेरा वर्षे पूर्ण झाली तोच दिवस !

आईने बटाटेवडे आणि शिरा

केला होता ,

वाढदिवस म्हणून !

“मैत्रिणीं ना बोलव” म्हणाली होती !

पण कसं बोलवणार ?

ही गोष्ट लपवून ठेवायची होती मैत्रिणींपासून !

अपवित्र अस्पृश्य हीचभावना

बिंबवलेली मनावर –

मासिकपाळी बद्दल !

तरी ही बंडखोरी केली होती

त्या काळात ,

सत्यनारायणाचे घेतले होते

दर्शन” त्या” दिवसात !

तरी ही जनरीत रूढी म्हणून

बसावेच लागले होते “बाजूला”

माहेरी आणि सासरी ही !

आज इतक्या वर्षाने,

उठले आहे वादळ ,

बाईच्या “विटाळशी”पणाचे !

आम्ही स्विकारलेल्या अस्पृश्यतेचे आणि अपराधी

भावनेने केलेल्या त्या ऋषीपंचमीच्या उपवासाचे काय ?

आता घेतला आहे का नव्या

मनूने जन्म ?

लिहिली आहे का त्याने नवी संहिता रजस्वलेला पवित्र बनविण्याची ?

मला मात्र आज ही आठवतोय तो दिवस  –

अपराधीपणाच्या भावनेने संकोचून गेलेला !

(काही मंदिरात महिलांना प्रवेश नाही, त्या संदर्भात सुश्री तृप्ती देसाई यांनी आंदोलन केलं होतं तेव्हा सुचलेली कविता)

© प्रभा सोनवणे

20 नोव्हेंबर 1969 !

संपर्क – “सोनवणे हाऊस”, ३४८ सोमवार पेठ, पंधरा ऑगस्ट चौक, विश्वेश्वर बँकेसमोर, पुणे 411011

मोबाईल-९२७०७२९५०३,  email- [email protected]

≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – कवितेचा उत्सव ☆ विडंबन काव्य… ☆ प्रा डॉ जी आर प्रवीण जोशी ☆

प्रा डॉ जी आर प्रवीण जोशी

? कवितेचा उत्सव ?

☆ विडंबन काव्य… ☆ प्रा डॉ जी आर प्रवीण जोशी

(तुझ्या गळा माझ्या गळा कवितेचं विडंबन- कै. राजकवी भा .रा .तांबे बडोदा यांची क्षमा मागुन )

पायात कळा

डोक्यात कळा

पोटात फिरतोय

वायगोळा !!

      ।। ध्रु ।।

 

तुझी कळ

माझी कळ

कुठला भोगतो

हा छळ

कुठून येणार हे बळ

मलाच तुझा कळवळा !! ।। 1 ।।

 

तुझ्या कळा माझ्या कळा

दाखवू दोघेही डॉक्टरला

 

तुला औषध

मला गोळी

आणखी इंजेक्शन कुणाला ?

वेड लागले डॉक्टरला

आपल्याला नव्हे नर्सला !! ।। 2 ।।

 

तुझी काठी

माझी काठी

फिरू दोघे नदीकाठी

सरकली गुढघ्याची वाटी

नकोच आता अटी तटी !!

(म्हातारपण हे कश्यासाठी)

हात पाय कापतात

चळाचळा ।। 3 ।।

 

तुझ्या गळा माझ्या गळा

कळा येतात वेळोवेळां

 

तुझे पित्त

माझा संधिवात

आणखी खोकला कुणाला ?

भुर्दंड नुसता खिशाला

गावठी उपाय परवडला 🤠 ।। 4 ।।

© प्रो डॉ प्रवीण उर्फ जी आर जोशी

ज्येष्ठ कवी लेखक

मुपो नसलापुर ता रायबाग, अंकली, जिल्हा बेळगाव कर्नाटक, भ्रमण ध्वनी – 9164557779 

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – कवितेचा उत्सव ☆ श्री अशोक भांबुरे जी यांची कविता अभिव्यक्ती #239 ☆ सतार हृदयी… ☆ श्री अशोक श्रीपाद भांबुरे ☆

श्री अशोक श्रीपाद भांबुरे

? अशोक भांबुरे जी यांची कविता अभिव्यक्ती # 239 ?

सतार हृदयी ☆ श्री अशोक श्रीपाद भांबुरे ☆

छोटेखानी कपाट हृदयी

इथे मांडशी किती पसारा

घर शिस्तीचे माझे सासर

थंड ऋतुतही चढतो पारा

*

तो अश्रूचा आहे ओघळ

आरशास का कळते केवळ ?

जगा वाटते श्रावण धारा

इथे मांडशी किती पसारा

*

ऋतू कोवळे इथे फुलांचे

फूल पाखरा बागडण्याचे

माझ्यासाठी का ही कारा ?

इथे मांडशी किती पसारा

*

संसाराचे स्वप्न पाहिले

सुरात होते गीत गायिले

सतार हृदयी तुटल्या तारा

इथे मांडशी किती पसारा

*

दिसले कोठे गलबत नाही

नुसते पाणी दिशास दाही

मला रोखतो रोज किनारा

इथे मांडशी किती पसारा

© श्री अशोक श्रीपाद भांबुरे

धनकवडी, पुणे ४११ ०४३.

[email protected]

मो. ८१८००४२५०६, ९८२२८८२०२८

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – कवितेचा उत्सव ☆ निळी शाई… ☆ श्रीशैल चौगुले ☆

श्रीशैल चौगुले

? कवितेचा उत्सव ?

निळी शाई... ☆ श्रीशैल चौगुले ☆

ही निळी-निळी,शाई-शाई

माझ्या काळजाचे पान होई

भले दुःख सहजची पेई

मज जगण्याचे बळ देई

हि निळी-निळी,शाई-शाई.

*

पुस्तकांसी नाती-गोती

अंधाराला ज्ञान ज्योती

मना संवादाचा ध्यास

धागा ज्ञानेशाचा बोई

ही निळी-निळी,शाई-शाई.

© श्रीशैल चौगुले

मो. ९६७३०१२०९०.

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – वाचताना वेचलेले ☆ ‘चहा की कॉफी…’ – कवी : अज्ञात ☆ प्रस्तुती – सौ. स्मिता पंडित ☆

? वाचताना वेचलेले ?

☆ ‘चहा की कॉफी…’☕ – कवी : अज्ञात ☆ प्रस्तुती – सौ. स्मिता पंडित ☆

जो जे वांछील तो ते पिओ!

 

चहा म्हणजे उत्साह..

कॉफी म्हणजे स्टाईल..!

 

चहा म्हणजे मैत्री..

कॉफी म्हणजे प्रेम..!

 

चहा एकदम झटपट..

कॉफी अक्षरशः निवांत..!

 

चहा म्हणजे झकास..

कॉफी म्हणजे वाह मस्त..!

 

चहा म्हणजे कथा संग्रह..

कॉफी म्हणजे कादंबरी..!

 

चहा नेहमी मंद दुपारनंतर..

कॉफी एक धुंद संध्याकाळी.!

 

चहा चिंब भिजल्यावर..

कॉफी ढग दाटुन आल्यावर.!

 

चहा = discussion..

कॉफी = conversation..!

 

चहा = living room..

कॉफी = waiting room..!

 

चहा म्हणजे उस्फूर्तता..

कॉफी म्हणजे उत्कटता..!

 

चहा = धडपडीचे दिवस..

कॉफी = धडधडीचे दिवस..!

 

चहा वर्तमानात दमल्यावर..

कॉफी भूतकाळात रमल्यावर..!

 

चहा पिताना भविष्य रंगवायचे…!

कॉफी पिताना स्वप्नं रंगवायची….!

 

कवी :अज्ञात

प्रस्तुती : स्मिता पंडित 

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – चित्रकाव्य ☆ करावी कीव …पण कोणाची ? ☆ श्री आशिष बिवलकर ☆

श्री आशिष  बिवलकर

?️?  चित्रकाव्य  ?️?

?– करावी कीव …पण कोणाची? – ? ☆श्री आशिष  बिवलकर ☆

घडली घटना,

गेले जीव |

ढिसाळ व्यवस्थेची,

करावी कीव |

*

मोडले संसार,

फुटल्या बांगड्या |

पुसली कुंकू,

विस्कटल्या घड्या |

*

तुटली आधाराची काठी,

हरवले पित्याचे छत्र |

होत्याच नव्हतं झालं,

नियतीचा घाव विचित्र |

*

पाच लाखाची मदत,

गेल्या जीवाची किंमत |

बजबजल्या भ्रष्टाचाराची,

वाढलीय हिम्मत |

*

अधिकारी मोकाट,

मालक निर्धास्त |

चौकशीच्या फेऱ्या,

लाल फीत सुस्त |

*

निगरगट्ट नेत्यांची वरात,

आरोप प्रत्यारोपांच्या फैरी |

सामान्य माणसांच्या,

जीवावर उठलेले हेच वैरी |

*

फॅक्टरी इन्स्पेक्टर,

प्रदूषण मंडळ |

सगळेच खाणारे,

एकमेकांना बळ |

*

दोन दिवसाची बातमी,

मिडियाला खुराक |

पुन्हा दुसरी घटना,

कुठे बसेना चपराक |

*

कुटुंबाला दुःख,

कोसळले आभाळ |

अकाली तो गेला,

कुटुंबाची पुढे आबाळ |

© श्री आशिष  बिवलकर

बदलापूर

मो 9518942105

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – कवितेचा उत्सव ☆ वैराग्य… ☆ प्रा तुकाराम दादा पाटील ☆

श्री तुकाराम दादा पाटील

? कवितेचा उत्सव ?

वैराग्य☆ प्रा तुकाराम दादा पाटील ☆

केवढे हे भाग्य खोटे तू मला सोडून जावे

सारखे ध्यानीमनी मी दु:ख ते का आठवावे

*

थाटला दरबार आहे  स्वागताला वंचनेच्या

वाटते या सोहळ्याला चंद्रतारे बोलवावे

*

पेटलेला देह कोठे शांत होतो सावलीला

दैवताने घात केला हेच आता ओळखावे

*

संकटे आली तरीही  हात होते बांधलेले

संशयाला वाटले की माणसाला ठोकरावे

*

स्वप्न वेडे दिवस होते काळ सरला  वैभवाचा

थोडके उरलेत बाकी स्पर्श तेही संपवावे

*

राहिले बाकी न काही हात झाले संत दोन्ही

बदललेल्या वास्तवाने नेमके वैराग्य यावे

*

वासनांनी जींदगीला कैद केले कैक वेळा 

मुक्त तेचा काळ येता पाय गुंते सोडवावे

© प्रा. तुकाराम दादा पाटील

मुळचा पत्ता  –  मु.पो. भोसे  ता.मिरज  जि.सांगली

सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३

दुरध्वनी – ९०७५६३४८२४, ९८२२०१८५२६

≈ संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈

Please share your Post !

Shares

मराठी साहित्य – कवितेचा उत्सव ☆ हे शब्द अंतरीचे # 175 ☆ माणुसकी…☆ महंत कवी राज शास्त्री ☆

महंत कवी राज शास्त्री

?  हे शब्द अंतरीचे # 175 ? 

☆ माणुसकी☆ महंत कवी राज शास्त्री ☆

(अंत्यओळ काव्य…)

प्रेमाचा मळा फुलला पाहिजे

मनाला मनं, भिडलं पाहिजे

आमंगल सर्व निघूनी जाता

ऐसे हे सर्व, झालेच पाहिजे.

*

ऐसे हे सर्व, झालेच पाहिजे

ऋणानुबंध जपल्या जावा

वैरभाव संपूनी सर्वतोपरी

माणुसकीच्या जावे गावा.!!

*

माणुसकीच्या जागे गावा

मनुष्य बनूनी जगून पहावे

शांत वृत्ती समतोल वृत्ती

आपुले आपण होऊनि असावे.!!

© कवी म.मुकुंदराज शास्त्री उपाख्य कवी राज शास्त्री

श्री पंचकृष्ण आश्रम चिंचभुवन, वर्धा रोड नागपूर – 440005

मोबाईल ~9405403117, ~8390345500

≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ.गौरी गाडेकर≈

Please share your Post !

Shares