मराठी साहित्य – कविता ☆ विजय साहित्य #127– रूपरेषा…! ☆ कविराज विजय यशवंत सातपुते ☆

कविराज विजय यशवंत सातपुते

कवितेचा उत्सव # 127 – विजय साहित्य

☆ रूपरेषा…! ☆ कविराज विजय यशवंत सातपुते ☆

(गालगागा गालगागा, गालगागा,गालगा.)

जीवनाची रूपरेषा,घेतली उमजून  मी

भावनांची वेषभूषा, पाहिली बदलून मी…! १

काळजाची भावबोली,‌बोलली परतायचे

यातनांची नाच गाणी, साहिली उकलून मी..! २

या दिलाची बाग तीही, सारखी भुलवायची

यौवनाची प्रेमवाणी, ऐकली उमलून मी..! ३

चाळली मी , प्रेम पाने, घेतले वाचायला

जिंदगानी आठवांची, काढली नखलून मी…! ४

तापलेल्या वाळवंटी, का मने हरखायची ?

पाजले पाणी कुणी ना , बावडी समजून मी..! ५

चाललो चालीत माझ्या, संगतीला आप्त रे

चाल माझ्या सोयऱ्यांची , नेणली परजून ‌मी..! ६

लेखणीने आज माझ्या, अंतरी जपला वसा

अंतरीची भाव बोली , छेडली जुळवून मी..! ७

© कविराज विजय यशवंत सातपुते