श्री तुकाराम दादा पाटील
कवितेचा उत्सव
☆ नदी… ☆ प्रा तुकाराम दादा पाटील ☆
नदी दुथडी भरून आता निघाली माहेरी
काठावरी निरखती झाडं कावरी बावरी
गच्च भरतेस तेव्हा तुला ओढ भर्ताराची
ससे होलपट होते तेव्हा किती माहेराची
नको तोडू ताल बाई नको होऊस नवरी ॥ १ ॥
रानपालटत जाते दिस उगवून येतो
ओलसर पुनवेच्या मनी चांदवा रुजतो
नव्या जगण्यासाठीची होते मनाची तयारी ॥ २ ॥
आम्ही शेतकरी साधे तुझ्यावरी जडे जीव
तुझ्या कुशीत नांदते देते हुंकार वैभव
बाई तुझ्या ग पाण्याने आम्हा लाभते उभारी ॥ ३ ॥
तुझी गाताना थोरवी तुला म्हणती माऊली
भाव ठेऊन अंतरी तुझी पूजाही मांडली
तुझे पिऊन अमृत आम्ही जगतो शिवारी ॥ ४ ॥
तुझ्या काठी वसणारे तुला देवता मानती
तुला माहेरवाशीण म्हणूनीया पूजताती
तुझ्या वटी भरणाला साडी चोळी जरतारी ॥ ५ ॥
अशी नको रोडाउस उन्हातानात तापून
हरघडी टाकी बाई तुझे पाऊल जपून
माझ्या मनाचे पाखरू झुरे पाणवठ्यावरी ॥ ६ ॥
© प्रा. तुकाराम दादा पाटील
मुळचा पत्ता – मु.पो. भोसे ता.मिरज जि.सांगली
सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३
दुरध्वनी – ९०७५६३४८२४, ९८२२०१८५२६
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
