श्री आशिष मुळे
कवितेचा उत्सव
☆ “किल्ला” ☆ श्री आशिष मुळे ☆
जमवून पोरांचा तो गलका
जणू अभेद्य किल्ला बांधावा
उभा करून माहोल दोस्तीचा
वाटते पुन्हा तो कल्ला करावा ।
खांद्यांवर त्या हात टाकून
मनावरचा भार हलका करावा
तिची अधुरी कहाणी सांगून
वाटते पुन्हा तो कल्ला करावा ।
बिल्डिंगच्या गच्चीत उमललेली
ती कौतुकाने पाहणारी सूर्यफूले
सुगंध त्यांचा अनुभवायला
वाटते पुन्हा तो कल्ला करावा ।
गॅलरीत उभ्या गरिबाच्या श्रीमंतीशी
संवाद भरल्या डोळ्यांनी करावा
करत निश्चय मोठं होण्याचा
वाटते पुन्हा तो कल्ला करावा ।
करून त्याग या सुन्या महालाचा
रात्रीचा तो कट्टा जागवावा
तुटलेल्या त्या पहारी घेऊन
पुन्हा एकदा किल्ला बांधावा ।
© श्री आशिष मुळे
≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
