सौ.ज्योत्स्ना तानवडे
कवितेचा उत्सव
☆ कोडे… ☆ सौ.ज्योत्स्ना तानवडे ☆
सान होऊनी बांलकांसवे
भान विसरूनी खेळत जावे
हासत नाचत बागेमध्ये
फेर धरुनी फिरून यावे ||
मनात येते विहंग होऊन
आकाशी त्या मुक्त विहरावे
जगामधले अनन्य सुंदर
डोळे भरुनी पाहून घ्यावे ||
दुःख काळजा दूर होऊनी
ईश चरणी मन रमावे
अनन्यभावे शरण जाऊनी
नामस्मरणी रंगून जावे ||
ऐकू यावी बासरी अन
यमुनातीरी फेर धरावा
अलगुज होऊन कृष्णाची
कुंजवनी तो स्वर घुमावा ||
मन हे मोठे अजब आहे
कोडे जणू विश्वनियंत्याचे
कधी न होते इच्छापूर्ती
आवर्तन अनेक इच्छांचे ||
☆
© सौ.ज्योत्स्ना तानवडे
वारजे, पुणे.५८
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
