मराठी साहित्य – कवितेचा उत्सव ☆ घन – मेघांनो… ☆ श्री रवींद्र सोनावणी ☆

श्री रवींद्र सोनावणी

 कवितेचा उत्सव 

☆ घन – मेघांनो… ☆ श्री रवींद्र सोनावणी ☆

आषाढातील घन-मेघांनो, जा घेऊन संदेश,

वने, उपवने, सरीता, सागर, शोधा सर्व प्रदेश ||धृ.||

भेटतील खग, विहंग, यात्री, मार्गामाजी तुम्हां,

लोप पावल्या नक्षत्रांच्या, दिसतील पाऊलखुणा,

पुसा वायुला, असे जयाला, जगती मुक्त प्रवेश ||१||

शैल शिखरेही, जिथे चुंबीती गगनाचे भालं,

कैलासाचे दर्शन घ्याया, थांबा क्षणकालं,

मार्ग दाखवील प्रसन्न होऊन, उमापती शैलेश ||२||

निर्मळ निर्झर मानसरोवर, कुठे पुष्प वाटिका,

कमल दलातील भृंग बावरा, मिलनोत्सुक सारिका,

कथा तयांना विरह व्यथेने, व्याकुळ यक्ष नरेश ||३||

हवा कशाला स्वर्ग, हवी मज प्रियाच स्वप्नांतली,

विरहाश्रूंचे सिंचन करुनी, प्रीती मी फुलवली,

सजल सख्यांनो, कथा तियेला, अंतरीचा आदेश ||४||

© श्री रवींद्र सोनावणी

निवास :  G03, भूमिक दर्शन, गणेश मंदिर रोड, उमिया काॅम्पलेक्स, टिटवाळा पूर्व – ४२१६०५

मो. क्र.८८५०४६२९९३

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈