मराठी साहित्य – कवितेचा उत्सव ☆ श्री अशोक भांबुरे जी यांची कविता अभिव्यक्ती #203 ☆ ‘शालीन तंबोरा…’ ☆ श्री अशोक श्रीपाद भांबुरे ☆

पतंगासारखा होतो, कुणी हा छाटला दोरा

गगन हे भेदणारा मी, क्षणातच उतरला तोरा

☆

हृदय तू चोरुनी नेले, जरी कुलपात ते होते

कसा रे प्राणवायूतुन, उतरला आत तू चोरा

☆

सुका दुष्काळ पडलेला, ढगातुन होइना वृष्टी

तुला पाहून बरसूदे, असा तू नाच रे मोरा

☆

दुधावर साय धरताना, फसफसू लागले आहे

कमी कर आच तू थोडी, उतू जाऊ नको पोरा

☆

उतरते कर्ज श्वासाचे, कुडी सोडून जाताना

तनाचा सातबाराही, बघा झाला कसा कोरा

☆

असे अंधार पाठीशी, समोरी तू उभी आहे

नको ना दीप तू लावू, तुझा तर चेहरा गोरा

☆

रसिकता कालची येथे तुला दिसणारही नाही

सखे तू गा तुझे गाणे तुझा शालीन तंबोरा