सुश्री शोभना आगाशे
कवितेचा उत्सव
☆ प्रश्न… ☆ सुश्री शोभना आगाशे ☆
तूच घालतोस जन्मा
तूच निर्मितोस त्रिगुणा
तूच देतोस क्रोध कामा
कसा आठवू मी नामा?
मोहात पाडिसी पाप करण्या
सजा देतोसी भोग भोगण्या
तूच आहेस जर सर्वांभूती
फिरे कैसी मग माझी मती?
ज्ञाना, नामा, तुका, एका
नच शमविती आमुच्या भुका
त्यासाठीच देतो दिवस सारा
कधी करू रे नामाचा पुकारा?
इथे बुवा, साधु, योगी, गुरू
मुखवटे केवळ, आत लुटारू
मार्ग न ठावा मी काय करू?
कसा सावरू? भेटवी सद्गुरू
पंढरीत होता म्हणे संतभार
इथेतिथे आता फक्त पापभार
हा अन्याय नाही का आम्हावर
कल्की रूपात ये आता पृथ्वीवर
© सुश्री शोभना आगाशे
सांगली
दूरभाष क्र. ९८५०२२८६५८
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
