सुश्री दीप्ती कुलकर्णी
☆ कवितेचा उत्सव ☆ स्मृती यात्रा ☆ सुश्री दीप्ती कुलकर्णी☆
मनाच्या प्रांगणावर उतरला पक्षी
उसवू लागला,स्मृतीरुप नक्षी
स्मृती आनंददायी
गात्रे गात्रे सुखविणार्या
स्मृती दुःख दायी
अंतःकरणास भिडणार्या
स्मृती निरोपाच्या
भावविश्व हलविणार्या
स्मृती स्वागताच्या
स्नेह जोपासणार्या
स्मृती सणवारांच्या
उत्साहास उधाण आणणार्या
स्मृती नातेसंबंधांच्या
कडु गोड बनलेल्या
स्मृती अशाही चिवट
नको नकोशा वाटणार्या
मन बनविणार्या बोथट
धारदार जिव्हेच्या
एकामागोमाग एक
जीवनपट उलगडणार्या
आपले नि परके यातील
सीमारेषा शोधणार्या
स्मृती यात्रा ही अपार
मनरुपी वारुवर
वेगाने होई स्वार
नेई मजला दूरवर.
© सुश्री दीप्ती कुलकर्णी
कोल्हापूर
≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित ≈
