श्री प्रमोद वामन वर्तक
कवितेचा उत्सव
☆ पुढल्या वर्षी…! ☆ श्री प्रमोद वामन वर्तक ☆
(गणपतीला गावाला गेलेले चाकरमानी आता मुंबईला परतू लागल्या नंतर, गावच्या घरात कायम राहणाऱ्या माऊलीच्या मनातील विचार, खालील रचनेत मांडायचा प्रयत्न केला आहे !)
☆
दहा दिवसांचा सोहळा
आता उद्या संपन्न होणार,
वाजत गाजत आले बाप्पा
वाजत गाजत जाणार !
☆
वेळ होता आरतीची
कानी घुमेल झांजेचा नाद,
गोडधोड प्रसादाचा मिळेल
पुन्हा पुढल्यावर्षी स्वाद !
☆
परत जातील चाकरमानी
घरी आपल्या मुंबईला,
येतील पुढल्या वर्षी लवकर
सारे बाप्पाच्या तयारीला !
☆
घर मोठे गजबजलेले
आता शांत शांत होईल,
सवय होण्या शांततेची
वेळ बराच बघा जाईल !
☆
होता उद्या श्रींचे विसर्जन,
रया जाईल सुंदर मखराची,
घर करून राहील मनी
मूर्ती मखरातल्या गणेशाची !
मूर्ती मखरातल्या गणेशाची !
☆
© प्रमोद वामन वर्तक
सध्या सिंगापूर +६५ ८१७७५६१९
संपर्क – दोस्ती इम्पिरिया, ग्रेशिया A 702, मानपाडा, ठाणे (प.)
मो – 9892561086 ई-मेल – [email protected]
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
