मराठी साहित्य – कवितेचा उत्सव ☆ “आमचा देश —” ☆ सुश्री मंजुषा सुनीत मुळे ☆

सुश्री मंजुषा सुनीत मुळे

 कवितेचा उत्सव 

☆ “आमचा देश —” ☆  सुश्री मंजुषा सुनीत मुळे  ☆

ओल्या हिरव्या मोहकशा कुरणांचा हा तर देश —

         ही कुरणे नाहीत गाई – गुरांची

         नाहीत शेळ्या वा बकऱ्यांची

                        माणसेच चरती हो येथे

                        विसरून आपला वेश –

ओल्या हिरव्या मोहकशा कुरणांचा हा तर देश —

            या कुरणी उगवतो कधी चारा

            अन कधी तेलाच्या झरती धारा

                        नवी पिके तरी शोधण्यास

                        नित प्रतिभेला उन्मेष –

ओल्या हिरव्या मोहकशा कुरणांचा हा तर देश —

              कापूस, साखर, गहू असे किती

              सर्वांसाठी हवेच म्हणती

                          चरतांना परि भान विसरती

                          उसना फक्त आवेश –

ओल्या हिरव्या मोहकशा कुरणांचा हा तर देश —

                म्हणू नका तुम्ही बी.आर.टी. वा

                मेट्रो आम्हा हवी कशाला

                             तिथेच पिकती सुपीक कुरणे

                             प्रगतीला न प्रवेश –

ओल्या हिरव्या मोहकशा कुरणांचा हा तर देश —

                  आम्हा वाटते जळोत असली

                  मोहमयी कुरणे ….

                             …अन फक्त उरावा राकट कणखर

                                दगडांचा हा देश —

                    नकोच हिरव्या मोहकशा

                                  कुरणांचा केवळ देश ——-

©  सुश्री मंजुषा सुनीत मुळे

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈